1 So ontò kay dimela kenyo, mig-aneng-aneng kay te mepakay aw megpetanan se didowa kenami doton te Atenas, 2 aw yan insogò day si Timoteo doton kenyo. Sikandin se kedowa tadon sineligan heman te Timanem te pegtoladà te Mèpiya Indan tepad ki Cristo. Insogò day sikandin meg-antag te pedowan niyo amon melobos se pegtaking niyo te Timanem, 3 so ibeg day wedad lomengà kenyo te pegpemenal tandà te pegpemilang egdateng kenitadon. Netegahan niyo te yan se pinemallì te Timanem amon okitan tadon. 4 Peg-ogpà day doton kenyo kedengan, migtoladà kay kenyo te domateng se aldaw te pegpemilang kenitadon, aw netegahan niyo den te netoman den iyan. 5 Yan se doun te insogò ko si Timoteo doton kenyo. So ontò a dimela kenyo, insogò ko sikandin amon metaga-taga a tepad te pegtaking niyo te Timanem, so netetana a aw neekalan kaw i Satanas, aw yan nebàtan besi se nebatog day doton kenyo.

6 Meneng neluba kay den so minolì den si Timoteo dini kenami lekat kenyo, aw mèpiya se in-indan din kenami tepad te pegtaking niyo te Timanem aw pegpedekelay niyo te pedowan. Minikagi heman sikandin te mèpiya se aneng-aneng niyo tepad kenami, aw dimela kaw heman kenami onawa te pegdela day kenyo. 7 Menge kedowa day, so mèpiya se dinineg day tepad kenyo, pengkey ontò kay pa egkelimahan aw egpemilangen, meneng neluba kay den tandà te pegtaking niyo te Timanem. 8 Mèpiya den se pedowan day so netegahan day den te nelobos se pegtaking niyo te Pengolo tadon. 9 Ontò kay den egpesiontong diyà te Timanem tepad kenyo, so binegayan kay din te keluba pineokit kenyo. 10 Pengkey aldaw aw delem, gayed kay egtawal-tawal diyà kandin aw egpemoyò kay te mekebatog kay komità kenyo amon meketabang kay kenyo aw kolang pa se pegtaking niyo kandin.

11 Egpemoyò kay diyà te Amay tadon Timanem aw Pengolo tadon si Jesus te tebangan kay din amon mekedoton kay kenyo te eked kenamay. 12 Egpemoyò kay heman te labi pa megkedakel se pedowan niyo te menge doma otaw egpemenal aw kedita te otaw, iling te kedakel te pedowan day kenyo. 13 Yan lobosen din se pedowan niyo kandin, aw wedad palos isila te Amay tadon Timanem kenyo te aldaw te peglikò te Pengolo tadon si Jesu Cristo tekingan te kedita te sakop te Timanem.