1 Kagi din, “Menge kedomaan ko aw obanen, penenalan kaw te ikegiyen ko kenyo.”

2 Pegdineg dan te peg-ikagi din te kagi te Hebreo, ontò dan nenenalan. Yan minikagi si Pablo, 3 “Siaken se doma niyo Judiyo. Timebaw a doton te Tarso, sebad lonsod doton te Silisya. Timilles a dini te Jerusalem. Si Gamaliel se meistro migtoladà kanak. Mig-iling a te kedita te punù egtoloen te kemonaan tadon. Measeb a egtolò te Timanem onawa te keaseb niyo songkani. 4 Yan se doun te nemilang a te otaw egpemenal ki Jesus aw inimetayan ko dan, so eden ko aw yan se ibeg te Timanem. Doen heman dinakep ko aw kineleboso ko, pengkey meama aw bayi. 5 Netegahan iyan te ontò pengolo te simbahan aw kedita te menge obanen, so sikandan se simolat diyà te doma dan doton te Damasko te mepakay aw domoton a amon dekepen ko se menge otaw nemenal ki Jesus, so ibeg ko ibingen ko dan dini te Jerusalem amon ipelumun. 6 Meneng sagwa agpet den alas dosi, aw medapag a den doton te Damasko, pegketà nesogatan a te anyag lekat te langit. 7 Nekelangkeb a diyà te tanà, aw doen dinineg ko minikagi, ‘E Saulo, nengà lay egpemilang ka kanak?’ 8 Penga niyan, minikagi a, ‘Sir, sinu ka lay?’ Yan timaba se Pengolo, ‘Siaken si Jesus tege Nasarit se egpemilangen nikaw.’ 9 Pengkey kinità te menge otaw dimoma kanak se peg-anyag, meneng wedà dan kelebeti se kagi te sìyan minikagi kanak. 10 Mig-insà a, ‘Pengolo, eden lay se inangen ko?’ Yan minikagi se Pengolo, ‘Tindeg ka aw deleg ka doton te Damasko. Yan indanan ka aw eden se keilangan inangen nikaw.’ 11 Wedà a pekekità tandà te anyag lekat te langit, meneng inagak a te doma ko pesalo doton te Damasko. 12 Doen sebad otaw eg-ogpà kidoen si Ananias ontò measeb egtolò te punù ingkeliwat i Moises aw induyun te kedita te Judiyo. 13 Dimateng sikandin diyà kanak aw minikagi, ‘Kedowa ko, bekahi se mata no, so todà ka komità.’ Na, pegketà nekekità a kandin. 14 Minikagi si Ananias, ‘Tapay ka pinemallì te Timanem egseligan te kemonaan ta, amon metaga-taga ka te ibeg din. Pinemallì ka din amon komità ka te batà din, aw amon domineg ka te kagi din, aw netoman den iyan. 15 Ibeg din, meg-indan ka diyà te kedita te otaw te kinità no aw dinineg nikaw. 16 Nayan, ayas ka. Enaw ka aw bonyagan ka. Pegtawal-tawal ka diyà te Pengolo amon mekelowà ka lekat te salà nikaw.’

17 “Penga niyan, minolì a dini te Jerusalem. Pegtawal-tawal ko doton te dakel simbahan, doen migpekità diyà kanak. 18 Minikagi se kinità ko, ‘Ayas ka kesayo lekat te Jerusalem, so eked penenalan se menge otaw dini te itoladà no tepad kanak.’ 19 Minikagi a diyà te Pengolo, ‘Meneng aneng-aneng ko menenalan dan, so netegahan dan te siaken se timeped te kedita te simbahan te Judiyo amon dekepen ko aw bedasen ko se kedita te otaw nemenal diyà kamno. 20 Netegahan dan heman te siaken se timanod te pegpengimatay dan te sogounun nikaw si Esteban, aw migsebad se pedowan ko diyà te menge otaw nengimatay kandin, so migtonggò a te saol linowas dan.’ 21 Meneng minikagi se Pengolo, ‘Kesayo ka, so isogò ta doton te mediyò ogpeanan amon megtoladà ka te kagi ko diyà te menge otaw kenà Judiyo.’ ”

22 Pegdineg dan te isogò sikandin doton te menge otaw kenà Judiyo, wedà dan ebey penenalan kandin. Migbelobansag dan, kagi dan, “Imetayan tadon den sikandin. Mèpiya pa aw matay sikandin.”

23 Migbelobansag dan, aw intayaw dan se saol, aw insabog dan heman se tanà doton diatas so ontò dan neopal. 24 Pegkità te kapitan te ontò dan neopal, impeibing din si Pablo doton didalem te kotà. Insogò din se menge sondalo memadas ki Pablo amon meg-indan te benal, so ibeg te kapitan metaga-taga aw eden se ingkeopal te otaw ki Pablo, so wedà pekelabet se kapitan te kagi te Hebreo. 25 Peggapos dan kandin, minikagi si Pablo diyà te serhinto timindeg kidoen, “Eked kepakay aw bedasen se otaw sakop te Roma singed aw onà insaen te howis.”

26 Pegdineg te serhinto te inikagi din, dimoton te kapitan aw minikagi, “Ikà egpebadas kandin, so sakop sikandin te Roma.”

27 Yan dimoton se kapitan ki Pablo aw mig-insà, kagi din, “Indani a te benal. Sakop ka lay te Roma?”

Timaba si Pablo, kagi din, “Ee.”

28 Minikagi se kapitan, “Dakel se kwarta imbayad ko amon meinang a sakop te Roma.”

Minikagi si Pablo, “Meneng se kanak, wedad imbayad ko, so timebaw a sakop te Roma.”

29 Penga niyan, wedà pemadas se sondalo ki Pablo. Nelemitan se kapitan so ginapos din se otaw sakop te Roma.

30 Ibeg te kapitan ontò metaga-taga aw eden se ingkeopal te menge Judiyo ki Pablo, so wedà pekelabet se kapitan te kagi te Hebreo. Keeldawan niyan, pigtipon din se menge obanen te simbahan aw kedita te kelengkawan te Judiyo. Inabat din si Pablo lekat te keleboso aw inibing din doton te otaw netipon. Impetindeg din doton te monà dan.