23
1 Yan timengteng si Pablo diyà te kedita te obanen te simbahan aw minikagi sikandin, “Menge kedowa ko, pengkey eden se neinang ko, meneng netegahan ko te ontò metòlid se aneng-aneng ko diyà te Timanem lamig songkani.”
2 Si Ananias se ontò pengolo te simbahan. Insogò din se doma otaw menampak ki Pablo amon ipelumun. 3 Penga niyan, minikagi si Pablo diyà ki Ananias, “Ipelumun ka te Timanem, so eden nikaw aw ontò ka egtaking diyà te Timanem. Eden nikaw aw siak se limàpang te punù ingkeliwat i Moises, meneng sikona se limàpang te punù ingkeliwat i Moises, so impesampak a nikaw.”
4 Penga niyan, doen menge doma otaw medapag kandin aw minikagi dan, “Ikà egtompuyus te ontò pengolo te simbahan, sìyan pinemallì te Timanem.”
5 Yan minikagi si Pablo, “Menge kedowa ko, wedà ko ketegahi te sikandin se ontò pengolo te simbahan. Netegahan ko te doen kagi te Timanem insolat te keilangan eked silahi se otaw lomowan kenitadon.”
6 Netaga-taga si Pablo te kenà egsebad se kedita te obanen te simbahan, so doen egpelenged te Sadusiyo, aw doen doma otaw egpelenged te Parisiyo. Yan minikagi si Pablo diyà kandan, “Menge kedowa ko, siaken se egpelenged te Parisiyo, aw kemonaan ko heman se egpelenged te Parisiyo. Impedini a amon insaen a niyo te aldaw seini, so egpeliman a te peg-antay te Timanem te otaw lekat te nematay.”
7 Peg-ikagi din kenyan, migpedindilay se Parisiyo aw Sadusiyo. Yan migpeteniyay dan. 8 Egtoladà se Parisiyo te entayen te Timanem se otaw lekat te nematay, aw doen menge anghil, aw doen heman pedowan wedad temanan. Meneng egtoladà se Sadusiyo te wedad otaw meantay lekat te nematay, aw wedad anghil, aw wedad heman pedowan wedad temanan. 9 Yan dakel se samok dan. Penga niyan, doen menge menenoladà te punù ingkeliwat i Moises timindeg lenged te Parisiyo. Minikagi dan, “Aneng-aneng day, wedad salà din. Doen besi anghil minikagi diyà kandin.”
10 Ontò dan migsamok, aw nelemitan se kapitan aw mengimatay dan ki Pablo. Yan insogò din se menge sondalo amon engayen dan si Pablo aw ibingen dan sikandin doton te kotà.
11 Tengà te delem, migpekità se Pengolo diyà ki Pablo aw minikagi, “Ikà egkelemitan. Mig-indan ka den tepad kanak dini te Jerusalem. Meg-indan ka pa heman doton te Roma.”
Peglalang te pegpengimatay ki Pablo
12 Keeldawan niyan, doen menge Judiyo kenà egpemenal migsebad te pedowan mengimatay ki Pablo. Migpepekangay dan te eked dan kaen singed aw imetayan dan si Pablo. 13 Lampas te kepatan se otaw minakop kandan. 14 Penga niyan, dimoton dan te menge pengolo aw obanen te simbahan. Minikagi dan, “Migpepekangay kay te eked kay palos kaen singed aw imetayan day si Pablo. 15 Nayan, pemoyoi niyo diyà te kapitan te todà din ibingen si Pablo dini kenyo. Pegpelingo-lingo kaw te doen pa insaen niyo diyà kandin. Meneng benganan day sikandin amon imetayan day te eked pa dateng dini kenyo.”
16 Meneng dimineg se anak i Pablo te ibeg dan megbangan kandin. Yan dimoton te kotà amon meg-indan ki Pablo. 17 Penga niyan, tinawal i Pablo se sebad serhinto aw minikagi, “Ibingi se telaki seini doton te kapitan so doen iindan din.”
18 Yan inibing sikandin te serhinto doton te kapitan aw minikagi, “Nemoyò sìyan otaw kineleboso si Pablo te ibingen ko kamno se telaki seini, so doen iindan din kamno.”
19 Yan inibing te kapitan se telaki doton te keligbinan aw mig-insà, kagi din, “Atò, eden se iindan no kanak?”
20 Yan minikagi se telaki, “Miglalang den se menge Judiyo te memoyò dan kamno amon ibingen no si Tiyò doton te tiponanan te obanen te simbahan kealdaw. Megpelingo-lingo dan te doen pa insaen dan diyà kandin. 21 Meneng ikà egpemenal kandan, so lampas te kelowan se otaw megbangan kandin doton te dalan. Migpepekangay dan te eked dan kaen singed aw imetayan dan si Tiyò. Neketagad den dan aw tegadan dan olò se pegsogò nikaw.”
22 Minikagi se kapitan, “Ikà eg-indan diyà te doma te mig-indan ka den kanak.”
Penga niyan, impekesayo din se telaki sìyan.
Inibing si Pablo doton te Sesarya
23 Penga niyan, impeangay te kapitan se dowa serhinto, aw minikagi diyà kandan, “Tiponi niyo se dowa gatos sondalo mipanaw, aw kepitowan sondalo somakay te kodà, aw dowa gatos mengibing te dilek amon meketagad dan, so mesayo kaw kwani alas nowibi te delem pesalo doton te Sesarya. 24 Pesekayi si Pablo diyà te kodà. Imendayi niyo se pegtonggò kandin amon wedad medaet domateng kandin lamig domateng doton te gobirnador si Felis.”
25 Doen heman solat impeibing te kapitan, kagi niyan,
26 “Siak si Claudio Lisias se simolat kamno Felis ontò melangkaw gobirnador day. Mebohay ka. 27 Se otaw impeibing ko kamno seini, dinakep sikandin te menge Judiyo, aw imetayan dan peden sikandin. Meneng dimoton a sipat menge sondalo amon ipelowà sikandin, so netegahan ko te sikandin se otaw sakop te Roma. 28 Pigtipon ko se kedita te obanen te simbahan, so ibeg ko ketegahan aw eden se ingkeopal te menge Judiyo kandin. 29 Penga niyan, netegahan ko te wedad salà din mepakay ikeleboso aw iimatay kandin, so olò dan neopal kandin so limàpang ekon te punù egtoloen dan. 30 Impeibing ko sikandin doton kamno, so doen ekon menge otaw megbangan kandin amon imetayan. Isogò ko kwani heman se menge otaw neopal kandin amon meg-indan dan diyà kamno aw eden se dimanda dan tepad kandin. Taman den.”
31 Penga te pegsolat din kenyan, timolò se menge sondalo, aw inibing dan si Pablo te delem doton te Antipatriya. 32 Keeldawan niyan, minolì doton te Jerusalem se menge sondalo sìyan minipanaw. Meneng dimeleg si Pablo inibing te menge doma sondalo simakay te kodà. 33 Pegdateng dan doton te Sesarya, imbegay dan se solat diyà te gobirnador, aw inibing dan heman si Pablo doton kandin. 34 Pegbasa te gobirnador te solat, mig-insà aw kenan se probinsya linekatan i Pablo. Pegketaga-taga din te Silisya se linekatan din, 35 minikagi sikandin, “Insaen ta aw domateng se menge otaw neopal kamno.”
Penga niyan, insogò din se menge sondalo megtonggò kandin doton te keleboso impeinang te tapay selotan si Herod.