28
Doton te Malta
1 Pegdateng day doton te enay, netegahan day te sìyan se polò iningedanan Malta. 2 Ontò kay neidowan te menge otaw eg-ogpà kidoen pengkey kenà dan Judiyo. Sinagman kay dan aw nenemtem dan te dakel apoy, so minodan aw ontò kay negenawan. 3 Nengimon si Pablo te kayo itabon. Pegsawol din diyà te apoy, dimelog se memokan tandà te keinit, aw tinongkà se belad din. 4 Pegkità te menge tege Malta te memokan diyà te belad din, migpebelaw-belaway dan, kagi dan, “Sikandin besi se metibonò. Pengkey wedà sikandin kematay doton te dagat, meneng dini te tanà matay sikandin, so yan se pelumun te salà din.”
5 Meneng impilik i Pablo se memokan doton te apoy aw wedà palos elegi. 6 Migtagad se menge doma otaw te lomebag se belad din aw penga niyan matay. Pegkenamay-namay te wedà sikandin kemeno, yan nealin se aneng-aneng dan, aw minikagi dan te sikandin se sebad timanem.
7 Doen dakel tanà medapag kidoen tinig-apò te datò te polò sìyan si Publio. Neidowan aw sinagman kay din te telo se delem. 8 Nesekitan se amay din piglegenaw aw mig-indes. Dimoton si Pablo kandin aw migtawal-tawal diyà te Timanem. Nemaed si Pablo kandin, aw yan negolian se temoay. 9 Pegketaga-taga te menge doma otaw, kimidoen se kedita dan doen mesakit, aw negolian dan heman. 10 Dakel se imbowang dan kenami. Pegsakay day te doma pangkò lekat kidoen, inlolan dan se kedita te keilangan day.
Pesalo doton te Roma
11 Penga te telo se bolan, nesayo kay simakay te sebad pangkò lekat te Alejandriya ngadan din Pingin Timanem tapay impondo kidoen te Malta dalem te eked pekelowà. 12 Pegdateng day doton te Sirakusa, mig-ogpà kay doton te telo se delem. 13 Lekat te Sirakusa, dimeleg kay doton te Regyo. Keeldawan niyan, doen ebagat aw nesayo kay pesalo doton te Putiyoli. Dimateng kay kidoen te iketelo te aldaw. 14 Netelaan day se menge otaw egpemenal kidoen te Putiyoli. Nemoyò dan te meg-ogpà kay kidoen kandan te sebad simana. Penga niyan, minipanaw kay pesalo doton te Roma. 15 Doen menge otaw egpemenal kidoen te Roma. Pegketaga-taga dan te dimateng kay, doen simongon kenami doton te Foro i Apyo, aw doen menge doma simongon kenami doton te lonsod iningedanan Telo Bentokanan. Pegkità i Pablo kandan, migpesiontong sikandin diyà te Timanem, aw neluba se pedowan din.
Migtoladà si Pablo doton te Roma
16 Pegdateng day doton te Roma, wedà kelebosowi si Pablo, meneng impeogpà doton te sebad balay tinonggoan te sondalo. 17 Penga te telo se delem, pigtipon i Pablo se menge melangkaw Judiyo. Pegketipon dan, minikagi si Pablo, “Menge kedowa ko, pengkey wedad salà ko diyà te menge doma tadon Judiyo, aw diyà te ketanem te kemonaan tadon, meneng dinakep a dan doton te Jerusalem, aw in-ated a diyà te belad te gobirno te Roma. 18 Peg-osay dan kanak, ibeg dan ipelowà a dan peden, so wedad salà ko mepakay ipelumun aw iimatay kanak. 19 Meneng doen menge doma Judiyo migsagda kandan. Doun niyan, pinemoyò ko te si Cesar se meg-osay kanak. Meneng wedà a keopal diyà te menge Judiyo, so siaken heman se sebad Judiyo. 20 Yan se doun te pigtipon ko sikiyo, amon megkità kidon aw megpebelaw-belaway. Iniketan a pa te sengkalì seini so pinemenalan ko sikandin egpelimanan tadon menge bowad-bowad i Israel.”
21 Minikagi dan, “Wedad solat dimateng kenami lekat te menge Judiyo tepad kamno. Wedad heman otaw dimini amon meg-indan kenami te medaet ka otaw. 22 Meneng netegahan day olò te doen ekon otaw doton te kedita te doma lonsod neopal diyà te menge otaw egpemenal. Yan ibeg day menenalan te kamno kagi.”
23 Penga niyan, pinemallì dan se aldaw aw kano dan ketipon. Pegdateng te aldaw sìyan, ontò medita se otaw netipon doton te balay inogpaan din. Lekat te iselem lamig te meapon, migtoladà si Pablo kandan. Mig-indan sikandin kandan tepad te peglowan te Timanem, aw miglebad-lebad sikandin te punù ingkeliwat i Moises aw insolat te menge doma telekeliwat te kagi te Timanem amon memenal se otaw ki Jesus. 24 Doen menge otaw nemenal te inikagi din, aw doen heman doma wedà pemenal. 25 Wedà dan peg-onawa. Nesayo dan penga te peg-ikagi i Pablo kani, “Benal se kagi impekeliwat te Espiritu Santo ki Isaias, so minikagi sikandin tepad te menge kemonaan tadon,
26 ‘Doton ka te menge otaw Judiyo, aw seini se ikegiyen no kandan. Pengkey domineg kaw te kagi ko kenyo, meneng wedad kelebetan niyo. Pengkey tomengteng kaw diyà te ipekità ko kenyo, meneng wedad kilelaen niyo. 27 Yan se itoladà no kandan so migpekagsen dan te olo dan amon eked dan pekelabet. Sinengseng dan se telinga dan amon eked dan penenalan. Inlipedeng dan se mata dan amon eked dan kità. Aw eked dan pemenal kanak, eked ko dan begayi te mèpiya.’
Yan se kagi te Timanem. 28 Penenalan kaw kanak. Inindanan den se menge otaw kenà Judiyo te megpelowà se Timanem kandan lekat te salà, so menenalan dan kenyan.”
[ 29 Penga te peg-ikagi i Pablo kenyan, nesayo se menge Judiyo aw ontò dan migpebelaw-belaway tepad te inikagi din diyà kandan.]
30 Mig-ogpà pa si Pablo te dowa se omay doton te balay binelesan din. Egsegmanen din se kedita te otaw eglegeana kidoen kandin. 31 Migtoladà sikandin te kebenalan tepad te Pengolo si Jesu Cristo aw tepad te peglowan te Timanem. Wedà pegketalaw te pegtoladà din, aw wedad heman otaw mig-anggà kandin.