Solat i Pablo diyà te Tege
Roma
1
Siak si Pablo se simolat kani. Sineligan a i Jesu Cristo. Pinemallì a din amon inangen a sebad sogounun din megtoladà te Mèpiya Indan te Timanem tepad ki Cristo.
Se Mèpiya Indan sìyan, yan se impakang te Timanem gebii aw impesolat din te menge telekeliwat te kagi din. Yan se Mèpiya Indan tepad te Batà din si Jesu Cristo migpekeotaw aw timebaw sebad bowad-bowad te selotan gebii si David. Netegahan tadon te ontò Timanem si Jesu Cristo, so pineokit te peg-antay te Timanem kandin lekat te nematay, impetaga-taga din te Batà din se Pengolo tadon si Jesu Cristo. Pineokit kandin, tinebangan a te Timanem aw ininang a din sogounun i Cristo megtoladà te kedita te otaw pengkey kenà Judiyo. Ibeg din memenal se kedita te otaw ki Cristo aw tomolò dan kandin, aw iduyun dan sikandin. Pengkey sikiyo tege Roma, tinawal kaw heman te Timanem amon megpesakop kaw diyà ki Jesu Cristo.
Seini se solat ko diyà te kedita niyo doton te lonsod te Roma. Nedekelan kaw te Timanem te pedowan, aw tinawal kaw din amon meinang kaw menge sakop din.
Ibeg ko tebangan kaw te Timanem Amay tadon aw Pengolo tadon si Jesu Cristo, aw begayan kaw dan te kelinaw te pedowan.
Pegpesiontong aw pegtawal-tawal i Pablo
Monà te kedita te kagi ko kenyo, egpesiontong a diyà te Timanem pineokit ki Jesu Cristo tepad te kedita niyo egpemenal, so pengkey doton te ogpeanan mediyò, medita den se otaw netaga-taga te nemenal kaw den ki Cristo. Netegahan te Timanem te melobos se pedowan ko kandin te pegtoladà ko te Mèpiya Indan tepad te Batà din si Jesu Cristo. Netegahan din te gayed a egtawal-tawal diyà kandin tepad kenyo. 10 Egpemoyò a kandin te ipedoton a din kenyo aw mepakay iyan diyà kandin, so nenamay den wedà a pekedoton. 11 Ibeg ko, komità a kenyo, so doen ibegay ko kenyo lekat te Espiritu Santo amon melobos se pegtaking niyo te Pengolo tadon, 12 so ibeg ko megpekegsenay kidon te pedowan pineokit te kenitadon pegpemenal.
13 Menge kedowa ko, ibeg ko ontò kaw metaga-taga te melikit a eglalang domoton kenyo, meneng gayed doen anggà ko. Ibeg ko, meketoladà a heman doton kenyo amon doen otaw memenal, iling te ininang ko doton te menge doma otaw kenà Judiyo, 14 so keilangan tomolò a te Timanem simogò kanak megtoladà te kedita te kemolò te otaw, pengkey mig-iskwila dan aw wedà, pengkey biyasa dan aw wedad toig. 15 Yan se doun te meagka se pedowan ko megtoladà heman kenyo te Mèpiya Indan tepad ki Cristo doton te Roma.
Ontong te Mèpiya Indan tepad ki Cristo
16 Nayan, ontò dakel se pegsalig ko diyà te Mèpiya Indan sìyan, so yan se tolos te Timanem mekepelowà te kedita te otaw lekat te salà aw memenal dan kenyan. Nekeonà se menge Judiyo dimineg kenyan, aw penga niyan se menge otaw kenà Judiyo. 17 Pineokit te Mèpiya Indan tepad ki Cristo, impetaga-taga te Timanem te eneng-enengen din te metòlid se otaw aw memenal dan, so doen kagi te Timanem insolat gebii, kagi din,
“Se menge otaw eneng-enengen te Timanem te metòlid dan pineokit te pegpemenal dan, yan se begayan te Timanem te kaling pedowan wedad temanan.”
Salà te kedita te otaw
18 Impetaga-taga te Timanem te ipelumun din se kedita te otaw kenà egtaking kandin aw eg-inang te medaet, so pineokit te peg-inang dan te medaet, egkebelebagan dan se pegketaga-taga te doma otaw te kebenalan tepad te Timanem. 19 Ipelumun din dan so aw meibeg dan metaga-taga te kebenalan tepad te Timanem, mola iyan ketegahan, so impetaga-taga iyan te Timanem kandan. 20 Gebii, lekat te peg-inang te Timanem te keneyonan lamig songkani, pengkey eked sikandin kitai, mola se pegketaga-taga te otaw te doen Timanem Metolos te wedad temanan, so egkitaen tadon se kedita te ininang din. Yan se doun te eked pekeikagi se otaw te wedà dan ketaga-taga te kebenalan. 21 Pengkey netaga-taga dan te doen Timanem, meneng wedà dan pegsagman kandin. Wedà dan heman pegpesiontong diyà kandin te keido din kandan. So kimulu dan, neinang kolang se aneng-aneng dan. Iling te mengitngit se aneng-aneng dan. 22 Pengkey eg-ikagi dan te biyasa dan, meneng wedad inenengen dan. 23 Wedà dan pegsimba te Timanem eked kematay, meneng migsimba dan te inotaw doen bawa te otaw egkematay, aw manok, aw ayam-ayam, aw menenanap.
24 Yan se doun te pinebeyaan den dan te Timanem, so gayed medaet se ibeg te pedowan dan. Yan se doun te medaet se ininang dan diyà te doma otaw, aw medaet heman se ininang te doma otaw diyà kandan. 25 Kimulu dan te kebenalan tepad te Timanem, aw nemenal dan te kebolalaw. Sinimba dan se ininang te Timanem, meneng wedà dan sikandin simbahi. Sinagman dan se ininang te Timanem, meneng wedà dan segmani se Timanem mig-inang te kedita. Iduyun sikandin te wedad temanan. Metoman iyan.
26 So timinàyog dan te Timanem, pinebeyaan din dan. Yan se doun te timaking dan te mekeyèyaay ibeg dan. Pengkey menge bayi, kimulu dan se limayok te esawa dan amon meg-inang dan te eked kepakay inangen. 27 Iling heman kenyan se ininang te menge meama, so kimulu dan limayok te bayi, aw nengemahà dan te doma meama amon lomayok kandan. Wedad yàyà dan meg-inang te medaet sìyan, aw yan medaet se kegemakan dimateng te pegkeotawun dan.
28 So wedà dan pegsagman te Timanem, pinebeyaan din dan. Yan se doun te tomalag den medaet se aneng-aneng dan aw medaet heman se eg-inangen dan. 29 Nelegeb dan te medita kemolò te medaet. Egkeibeg dan te kedònan te doma, aw egtindaet dan. Gayed dan eg-ingà, aw egbonò, aw egdindil, aw eg-akal, aw medaet se eg-ikegiyen dan tepad te doma otaw. Egbelikbik dan, 30 aw egbaet-baet dan, aw medaet se pedowan dan diyà te Timanem. Mebolot dan, aw egpelangkaw-langkaw dan, aw egduyun dan te kandan pegkeotawun. Gayed dan eglalang te medaet inangen. Kenà dan egtolò te amay aw inay. 31 Kolang se aneng-aneng dan. Kenà dan egtoman te pakang. Wedad palos egkedekelan dan te pedowan, aw wedad heman egkeidowan dan. 32 Pengkey netegahan dan te migpunù se Timanem te keilangan imetayan se kedita te otaw eg-inang te medaet iling kenyan, meneng kunù eg-inang dan pa gayed te medaet. Labi pa medaet se ininang dan, so induyun dan heman se doma otaw eg-inang te medaet iling kenyan.