1 Kedengan, te wedà kaw pa pemenal, iling kaw te nematay tandà te peg-inang niyo te salà. 2 Kedengan, gayed kaw egpekesalà. Mig-iling kaw te otaw eg-inang te salà dini te keneyonan. Timolò kaw ki Satanas, pengolo te kedita te bosaw. Sikandin se egbayà-bayà te kedita te otaw kenà egtolò te Timanem. 3 Kedengan, iling heman kenyan se kedita tadon, so gayed kidon egtaking te medaet ibeg te pedowan tadon. Pengkey eden se ibeg te lawa aw aneng-aneng tadon, yan se eg-inangen tadon. So yan se ketanem tadon, detengan kidon peden te pelumun te Timanem iling te kedita te otaw kenà egtolò kandin.

4 Meneng ontò kidon neidowan te Timanem, aw ontò kidon din nedekelan te pedowan, 5 so pengkey iling kidon te nematay tandà te peg-inang tadon te medaet, meneng binegayan kidon te Timanem te kaling pedowan tandà te pegpesakop tadon diyà ki Cristo. Pineokit te tabang te Timanem kenitadon, impelowà kidon din lekat te salà. 6 Inantay kidon din doma i Jesu Cristo lekat te nematay, aw impelowan kidon din doma din doton te langit pineokit ki Jesu Cristo. 7 Yan se ininang din amon gayed metaga-taga se kedita te otaw te ontò dakel se tabang din kenitadon pineokit ki Jesu Cristo. 8 Pineokit te tabang te Timanem, impelowà kaw din lekat te salà te pegpemenal niyo ki Cristo kenà pineokit te inang niyo, meneng pineokit te bowang te Timanem kenyo. 9 Wedad palos otaw megpelangkaw-langkaw, so eked pekelowà se otaw lekat te salà pineokit te eg-inangen din. 10 Meneng pineokit ki Cristo, ininang kidon den te Timanem kaling amon mekeinang kidon te mèpiya, so yan se tapay din inlalang kenitadon.

11 Sikiyo menge otaw kenà Judiyo, eneng-enengi niyo tepad te pegkeotawun niyo kedengan. Egkebensihan kaw te menge Judiyo egpemetolì, so wedà kaw taking te ketanem day sìyan. 12 Wedà kaw pekeakop diyà te menge bowad-bowad i Israel. Eked kaw heman pekekinawà te ontong ibegay te Timanem kenami, so kenà kenyo kemonaan se pinekangan din. Kedengan, te pegtaking niyo te medaet ketanem te otaw dini te keneyonan, wedad palos tabang te Timanem pinelimanan niyo, so wedà kaw pa ketaga-taga tepad kandin. 13 Pengkey mediyò kaw lekat te Timanem kedengan, meneng pegpemenal niyo ki Cristo, impedapag kaw te Timanem pineokit te pegkematay i Cristo doton te kros. 14 Pineokit kandin, migsebad den se menge Judiyo aw otaw kenà Judiyo. Yan se doun te wedad den peopalay te menge Judiyo aw otaw kenà Judiyo, so inabat din se elet diyà te tengà-tengà tadon. 15 Tandà te pegkematay i Cristo, impelowà kay din menge Judiyo lekat te menge punù ingkeliwat i Moises tinolò day, amon pegsebaden din se didowa pongan te otaw, se menge Judiyo aw otaw kenà Judiyo, pineokit te pegpesakop te kedita tadon diyà kandin. Pigsebad din se didowa kemolò te otaw, aw yan inabat din se peopalay tadon. 16 Pineokit te pegkematay i Cristo doton te kros, ininang din iling te sebad lawa se didowa kemolò te otaw, aw pigsebad din se kedita tadon aw Timanem. Pineokit te ininang i Cristo, wedad den peopalay. 17 Dimini si Cristo amon megtoladà te wedad den peopalay. Yan se intoladà din diyà te kedita te otaw, pengkey sikiyo menge otaw kenà Judiyo aw sikami menge Judiyo. 18 Pineokit ki Cristo, mekepedapag kidon den diyà te Timanem Amay tadon, so eg-ogpaan den te Espiritu Santo se kedita tadon, pengkey Judiyo aw otaw kenà Judiyo.

19 Nayan, sikiyo menge otaw kenà Judiyo, pengkey kenà kaw sakop te Timanem kedengan, meneng sinakop kaw din den sipat kedita te doma sakop din, aw ininang kaw din menge batà din. 20 Se kedita tadon egpemenal, iling kidon te balay, aw iling te tollok te balay se menge sogounun i Cristo aw menge telekeliwat te kagi te Timanem. Si Jesu Cristo se iling te bato pinetindegan te balay sìyan. 21 Dimasel se balay sìyan so pigsebad se kedita tadon diyà kandin, aw eg-inangen kidon din balay eg-ogpaan te Timanem tandà te pegsebad tadon diyà te Pengolo. 22 Sikiyo menge otaw kenà Judiyo, nekeakop kaw heman diyà te balay sìyan eg-ogpaan te Timanem pineokit te Espiritu Santo.