1 Na, siak si Pablo, kineleboso a so egtaking a ki Jesu Cristo aw migtoladà a tepad kandin diyà kenyo menge otaw kenà Judiyo. 2 Netegahan niyo den besi te insogò a te Timanem amon megtoladà a kenyo te doen tabang din kenyo pengkey kenà kaw Judiyo. 3 Netegahan niyo den heman te doen kebenalan impetaga-taga te Timanem diyà kanak pengkey wedà iyan petega-tegahi gebii. Simolat a den te mebabà olò tepad kenyan diyà te solat ko seini. 4 Aw megbasa kaw kenyan, ketegahan niyo heman se netegahan ko tepad ki Cristo wedà petega-tegahi gebii. 5 Wedà iyan petega-tegahi te Timanem diyà te menge kemonaan tadon. Meneng pineokit te Espiritu Santo, impetaga-taga din den se kebenalan diyà kenami pinemallì din menge sogounun i Cristo aw menge telekeliwat te kagi din. 6 Seini se kebenalan impetaga-taga din den. Sikiyo menge otaw kenà Judiyo, so nemenal kaw te Mèpiya Indan tepad ki Jesu Cristo, aw migpesakop kaw diyà kandin, begayan kaw heman te Timanem te kedita onawa te ibegay din diyà te menge Judiyo egpemenal. Ipeakop kaw din heman diyà te otaw lowanan i Cristo doma te menge Judiyo. Begayan kaw heman te Timanem te impakang din, onawa te ibegay din diyà te menge Judiyo egpemenal.

7 Tandà te tabang te Timanem kanak, ininang a din sogounun megtoladà te Mèpiya Indan pineokit te tolos din. 8 Pengkey siak se ontò medanà diyà te kedita te sakop te Timanem, meneng pinemallì a din amon megtoladà kenyo menge otaw kenà Judiyo tepad te ontò mèpiya tabang i Cristo kenitadon eked tadon ontò kelebeti. 9 Insogò a din amon ipetaga-taga ko diyà te kedita te otaw aw eden se tod te Timanem mig-inang te kedita. Wedà din petega-tegahi diyà te otaw gebii aw eden se tod din, 10 amon pineokit te kedita te otaw egpemenal, ipetaga-taga din den diyà te kedita te melangkaw aw metolos doton te langit te ontò mèpiya se kebiyasa din. 11 Yan se tod te Timanem gebii te wedad pa keneyonan, meneng tinoman din den iyan pineokit te Pengolo tadon si Jesu Cristo. 12 So nemenal kidon den ki Cristo, yan se doun te wedad den lamit tadon megpedapag diyà te Timanem. Eked kidon den sagkà te pegtawal-tawal tadon diyà kandin. 13 Yan doen ipunù ko kenyo. Ikà niyo eglengà tandà te kelimahan dimateng kanak lekat te pegtoladà ko kenyo menge otaw kenà Judiyo, so pineokit te kelimahan ko sìyan, doen kèpiyaan niyo.

14 Peg-aneng-aneng ko tepad te ontò mèpiya tabang te Timanem kenitadon, eglongken a aw egtawal-tawal a diyà te Timanem Amay. 15 Sikandin se eg-ingadan te kedita, pengkey doton te langit aw dini lanto te tanà. 16 Egtawal-tawal a diyà te Timanem Melangkaw egpemegay te ontò mèpiya, so ibeg ko pekegsenen din se pegsalig niyo diyà kandin pineokit te Espiritu Santo. 17 Egpemoyò a diyà te Timanem te gayed meg-ogpà si Cristo diyà te pedowan niyo tandà te pegpemenal niyo kandin. Egpemoyò a heman diyà kandin amon labi pa megkedakel se pedowan niyo diyà te Timanem aw diyà te doma otaw. 18 Pineokit kenyan, ontò kaw metaga-taga sipat kedita tadon menge sakop te Timanem te kebelad aw kelayat aw kelangkaw aw kedalem te kedakel te pedowan i Cristo. 19 Ibeg ko metaga-taga kaw te egkedekelan kaw i Cristo te pedowan, pengkey eked tadon ontò kelebeti se kedakel te pedowan din. Aw metaga-taga kaw te egkedekelan kaw i Cristo te pedowan, kinewaen niyo se kedakel te ibegay te Timanem diyà kenyo lamig mesikop kaw onawa te pegkesikop din.

20 Iduyun tadon den se Timanem egtabang kenitadon pineokit te tolos din, so ontò dakel se mebatog din inangen labi pa dakel diyà te kedita te egpemoyoen tadon aw eg-eneng-enengen tadon. 21 Iduyun sikandin pineokit te kedita tadon egpemenal aw pineokit heman ki Jesu Cristo. Iduyun sikandin te wedad palos temanan. Metoman iyan.