3
Otaw memenal se begayan te kaling pedowan
1 Tay law kenyo menge otaw kidoen te Galasya, iling te wedad inenengen niyo. Impesoway kaw den te menge doma otaw kenà egtolò te kebenalan intoladà ko kenyo kedengan. Impesoway kaw dan pengkey tapay niyo dinineg se intoladà ko kenyo, pengkey tapay ko den sikiyo inindanan tepad te pegkematay i Cristo kidoen te kros. 2 Netegahan niyo den te nekekinawà kaw te Espiritu Santo kenà pineokit te pegtolò niyo te punù ingkeliwat i Moises. Meneng nekekinawà kaw te Espiritu Santo pineokit te pegpemenal niyo te intoladà ko tepad ki Jesus. 3 Ikà niyo eg-iling te menge otaw wedad inenengen. Pegtebò niyo nemenal, tinebangan kaw te Espiritu Santo. Meneng eden niyo aw meg-aneng-aneng se Timanem te metòlid kaw pineokit te pegsalig niyo te punù ingkeliwat i Moises. 4 Eked kepakay aw wedad ontong te kedita neokitan niyo te pegpemenal niyo. 5 Timanem se egpemegay kenyo te Espiritu Santo, aw sikandin se eg-inang te kepelahan doton kenyo. Se peg-inang din kani diyà kenyo, kenà pineokit te pegtolò niyo te punù ingkeliwat i Moises, meneng pineokit te pegpemenal niyo te intoladà tepad ki Jesus.
6 Ipolingun ko iling te kemonaan day si Abraham. Inaneng-aneng te Timanem te metòlid sikandin, so nemenal te metoman se impakang te Timanem kandin. 7 Se kedita te otaw memenal, yan se menge otaw inangen te Timanem iling te bowad-bowad i Abraham amon begayan din dan te impakang din ki Abraham. 8 Doen kagi te Timanem insolat te eneng-enengen din te metòlid se kedita te otaw, pengkey Judiyo aw kenà Judiyo, pineokit te pegpemenal dan. Yan se mèpiya indan tapay intoladà din ki Abraham, kagi din,
“Pineokit kamno, ibegay ko se mèpiya diyà te kedita te otaw dini te keneyonan.”
9 Na, nemenal si Abraham te inikagi te Timanem, aw yan inaneng-aneng te Timanem te metòlid sikandin. Iling heman kenyan se kedita te otaw memenal, so eneng-enengen heman te Timanem te metòlid dan.
10 Meneng se kedita te otaw meibeg eneng-enengen te Timanem te metòlid dan pineokit te pegtolò dan te punù ingkeliwat i Moises, yan se ipelumun te Timanem. So doen kagi te Timanem insolat,
“Ipelumun te Timanem se kedita te otaw kenà ontò egtolò te kedita te punù insolat i Moises.”
11 Netegahan tadon te wedad palos otaw eneng-enengen te Timanem te metòlid dan pineokit te pegtolò dan te punù ingkeliwat i Moises, so impesolat heman te Timanem,
“Se otaw memenal, yan se otaw eneng-enengen te Timanem te metòlid dan aw begayan din te pedowan wedad temanan.”
Yan se kagi din. 12 Meneng se otaw meibeg eneng-enengen te Timanem te metòlid sikandin pineokit te pegtolò din te punù ingkeliwat i Moises, yan se otaw wedad kekemowan te kandin pegpemenal. So doen kagi te Timanem insolat,
“Se otaw somalig te punù ingkeliwat i Moises, yan se otaw keilangan tomolò te kedita te punù sìyan amon kebegayan te pedowan wedad temanan.”
13 Meneng wedad otaw meketolò te kedita te punù sìyan. Se otaw egsalig diyà te punù ingkeliwat i Moises, yan se otaw ipelumun te Timanem pineokit te menge punù sìyan. Meneng si Cristo se migpelowà kenitadon lekat te pelumun, so sikandin se impelumun inselilin kenitadon. Se pegpelumun kandin, yan se pegkematay din doton te kros. So doen kagi te Timanem insolat,
“Pengkey sinu otawi se imetayan aw bitinen doton te kayo intollok, yan se pengilala te ontò dakel se pelumun kandin.”
14 Pineokit te pegkematay i Jesu Cristo, se kèpiyaan impakang te Timanem ki Abraham gebii, yan se minapet den diyà te kedita te otaw pengkey kenà Judiyo, amon mekekinawà kidon te Espiritu Santo, sìyan impakang te Timanem ibegay diyà te kedita te otaw memenal.
Eked pegkewedad se impakang te Timanem
15 Menge kedowa ko, aw doen otaw megpakang diyà te sebad otaw te doen ibegay din kandin, wedad doma otaw mepakay megtodà te pakang sìyan, aw wedad heman otaw mekebatog megwedad kenyan. 16 Na, pinekangan te Timanem si Abraham aw bowad-bowad din. Kenà aw kedita te bowad-bowad i Abraham se pinekangan te Timanem, meneng sebad olò bowad-bowad din si Cristo. 17 Seini se kedegdagan te insolat ko. Doen pakang te Timanem ki Abraham. Pegkepenga te epat gatos ketlowan se omay, impesolat te Timanem se punù ingkeliwat i Moises diyà te kedita te Judiyo. Pengkey doen punù imbegay te Timanem ki Moises, meneng eked palos pegkewedad se impakang te Timanem ki Abraham. Eked kepakay aw wedad ketomanan te impakang din sìyan. 18 Simpana meg-aneng-aneng se Timanem te metòlid kidon pineokit te pegtolò tadon te punù ingkeliwat i Moises, wedad den kekemowan te pakang, so meg-aneng-aneng se Timanem te metòlid kidon pineokit te pagod. Meneng bowang se impakang te Timanem ki Abraham.
19 Na, pengkey benal wedad otaw eneng-enengen te Timanem te metòlid dan pineokit te pegtolò te punù ingkeliwat i Moises, kenà aw wedad kekemowan te punù sìyan. Impekeliwat te Timanem se punù din diyà te menge Judiyo amon ketegahan te kedita te otaw te okomen din dan so nekeinang dan te medaet. Se kenamay te pegtolò te punù ingkeliwat i Moises, taman olò te pegdateng te sìyan sebad bowad-bowad i Abraham impakang. Pegpemegay te Timanem te punù sìyan, in-indan din iyan diyà te menge anghil. Penga niyan, ingkeliwat dan iyan diyà ki Moises, aw penga niyan sikandin se migkeliwat heman kenyan diyà te kedita te Judiyo. 20 Meneng labi pa mèpiya se pegpakang te Timanem diyà ki Abraham, so wedad palos doma migkeliwat kenyan. Timanem olò se mig-indan kandin.
Kekemowan te punù ingkeliwat i Moises
21 Ikà niyo eg-aneng-aneng te pineokit te punù sìyan migkewedad se impakang te Timanem. Kenà niyan, so simpana mekekinawà kidon te pedowan wedad temanan pineokit te pegtolò te punù ingkeliwat i Moises, yan se peokit te meg-aneng-aneng se Timanem te metòlid kidon. 22 Meneng eked iyan kebatog, so doen kagi te Timanem insolat te nekesalà se kedita te otaw. Meneng olò pineokit te pegpemenal ki Jesu Cristo se pegkekinawà te mèpiya impakang te Timanem.
23 Te wedà kay pa pemenal ki Cristo, eked kepakay aw eked kay tolò te punù ingkeliwat i Moises, aw timolò kay kenyan lamig te pegpekità te Timanem te keilangan memenal kay ki Jesu Cristo. 24 Yan heman se doun te impesolat te Timanem se punù amon doen mengibing kenami lamig te pegdateng i Cristo, amon meg-aneng-aneng se Timanem te metòlid kay pineokit te pegpemenal kandin. 25 Na, so nemenal kay den ki Jesu Cristo, wedad den kekemowan te ibingen kay pa te punù ingkeliwat i Moises.
26 Na, songkani batà kaw den heman te Timanem pineokit te pegpemenal niyo ki Jesu Cristo. 27 So nemenal den se kedita niyo ki Cristo, aw binonyagan kaw den tandà te pegtaking niyo kandin, yan ontò kaw den iling te pegkesawol din. 28 Diyà te kedita niyo egpemenal, wedad den elet diyà te menge Judiyo aw kenà Judiyo. Wedad heman elet diyà te allang aw otaw kenà allang. Wedad heman elet diyà te meama aw bayi. Mig-onawa kaw den diyà te Timanem, so migsebad den se pedowan te kedita niyo diyà ki Jesu Cristo. 29 So migsebad den se pedowan niyo diyà ki Cristo, nekeakop kaw den diyà te menge bowad-bowad i Abraham, aw begayan kaw heman te mèpiya impakang te Timanem.