1 Dinineg i Jacob te migbelisì se menge bayaw din, sìyan menge batà i Laban. Minikagi dan, “Nengabat den si Jacob te kedakel te kedònan i Amà. Lekat ki Amà se kedakel te keyemanan i Jacob.”

2 Kinità heman i Jacob te deitek den se pedowan i Laban diyà kandin, so kenà den iling te kedakel te pedowan din kedengan.

3 Minikagi se Timanem diyà ki Jacob, “Olì ka den doton te tanà inogpaan te amay nikaw, apò nikaw, aw menge kedomaan nikaw. Domaan ta sikona.”

4 Yan intogon i Jacob si Raquel aw si Lea te megkità dan kandin doton te tanà tinonggoan din te menge ayam-ayam. 5 Pegdateng dan doton, minikagi si Jacob, “Kinità ko te deitek den se pedowan te amay niyo diyà kanak, so kenà den iling te kedakel te pedowan din kedengan. Meneng gayed a egdomaan te Timanem egseligan te amay ko. 6 Netegahan niyo te ontò a measeb te pegterbaho ko diyà te amay niyo. 7 Meneng gayed a din beling inekalan, so mekesempolò din todai se pakang din tepad te itandan din diyà kanak. Meneng pineokit te tabang te Timanem kanak, wedà a din peelegi. 8 Te kelikit te pegpakang te amay niyo diyà kanak, ‘Kedita te kambing boling se itandan ko diyà kamno,’ yan tomalag boling se timebaw. Aw te kelikit te pegpakang din diyà kanak, ‘Kedita te kambing beteken se itandan ko diyà kamno,’ yan tomalag beteken se timebaw. 9 Pineokit kenyan, impelowà te Timanem se menge ayam-ayam lekat te belad te amay niyo, aw imbegay din iyan diyà kanak.

10 “Kedengan dalem te pegpebelagay te kambing, migtegeinep a. Kinità ko te beteken aw boling se kedita te kambing meama migbalag. 11 Dalem te pegtegeinep ko, minikagi se anghil te Timanem diyà kanak, ‘E Jacob.’ Timaba a, ‘Seini a.’ 12 Minikagi se anghil, ‘Tengtengi iyan. Beteken aw boling olò se kedita te kambing meama migbalag. Inangen ko medita se ayam-ayam nikaw, so kinità ko se kedita te medaet eg-inangen i Laban diyà kamno. 13 Siaken se Timanem migpekità diyà kamno kedengan kidoen te Betel. Kidoen ininang no kekitaan se bato tinoyongan no te lana, aw migpakang ka heman kanak. Na, kesayo ka den lekat te ogpeanan seini, aw olì ka den doton te tanà tinebawan nikaw.’ ”

14 Minikagi si Raquel aw si Lea, “Wedad den palos nesamà ibegay diyà kenami aw matay se amay day. 15 Eg-aneng-aneng den sikandin te iling kay te kenà batà din. Imbeligyà kay din iling te allang, aw neamin den se imbayad no diyà kandin. 16 Inabat te Timanem se kedakel te keyemanan te amay day, aw kenitadon den iyan sipat te menge batà tadon. Yan keilangan tomolò ka te kedita te impunù te Timanem diyà kamno.”

17 Penga niyan, impesakay i Jacob se menge batà din aw menge esawa din diyà te menge kamilo. 18 Impeipanaw din se kedita te ayam-ayam din doton te monà, aw inlolan din heman se kedakel te kedònan neabat din kidoen te Mesopotamya. Nesayo sikandin migpesalo doton te tanà te amay din si Isaac kidoen te Canaan. 19 Pegkesayo dan, wedad kidoen si Laban, so dimoton sikandin te menge karniro din impeloyaw amon meglegonting kenyan. Nengabat si Raquel te menge inotaw lekat te balay te amay din. 20 Mig-akal si Jacob ki Laban, so wedà din sebihi tepad te pegkesayo din. 21 Inibing i Jacob se kedakel te kedònan din aw kimadas sikandin. Minatas dan te wayeg te Yofritis, aw migpesalo dan doton te bontod te Galaad.

22 Penga te telo se aldaw, inindanan si Laban te kimadas si Jacob. 23 Yan impetaking din se menge kedomaan din, aw mig-alaw dan kandin. Penga te pito se aldaw, nekesaeb dan kandin doton te bontod te Galaad. 24 Te wedà dan pa pekesaeb kandin, migpekità se Timanem diyà ki Laban te delem pineokit te tegeinep, aw minikagi sikandin, “Peg-ahà ka. Ikà egleges ki Jacob.”

25 Mig-ogpà si Jacob doton te bontod te Galaad. Pegpekesaeb i Laban aw menge kedomaan din ki Jacob, mig-ogpà dan heman kidoen. 26 Minikagi si Laban diyà ki Jacob, “Medaet se ininang nikaw. Mig-akal ka kanak, aw inibing no se menge batà ko iling te otaw nedakep te mengengayaw. 27 Nengà lay mig-akal ka kanak? Nengà lay nesayo ka te wedà a no sebihi? Aw simabi ka peden kanak, yan mèpiya se pegpekesayo ko kamno, so mèpiya se keluba tadon, aw pegdelangan tadon, aw pegpedaging tadon te edel aw sista. 28 Wedà a no peedeki te menge apò ko aw batà ko te pegkesayo niyo. Medaet se ininang no sìyan. 29 Pengkey mebatog ko se pegpeeleg kamno, meneng tidelem pinunuan a te Timanem egseligan te amay no te eked kepakay aw megleges a kamno. 30 Netegahan ko te nesayo ka den so ibeg no molì ka doton te amay nikaw. Meneng nengà lay tinakaw no se menge inotaw lekat te balay ko?”

31 Timaba si Jacob, “Mig-akal a kamno so nelemitan a. Mig-aneng-aneng a te ewien no se menge esawa ko. 32 Meneng aw kitaen no se otaw dini nenakaw te inotaw nikaw, imetayan ko sikandin. Na, megsistigos se menge kedomaan ta. Pemahà ka den. Aw doen kedònan no kitaen no dini, ebati iyan.”

Yan se inikagi i Jacob so wedà din ketegahi te si Raquel se nengabat te menge inotaw i Laban.

33 Penga niyan, nengemahà si Laban doton te tolda inogpaan i Jacob, aw tolda inogpaan i Lea, aw tolda te didowa allang bayi, meneng wedad palos kinità din kidoen. Penga niyan, minawop sikandin diyà te tolda inogpaan i Raquel. 34 Tapay in-eles i Raquel se inotaw doton te siyà te kamilo din, aw nenenoo sikandin kidoen. Kinelokad i Laban se kedita te kedònan doton te tolda inogpaan din, meneng wedad palos kinità din. 35 Minikagi si Raquel diyà te amay din, “Amà, ikà bag egkeopal diyà kanak, meneng eked a den peketindeg, so pigdònan a den.”

Yan pengkey ontò kinelokad i Laban, meneng wedà din kitai se menge inotaw din. 36 Ontò neopal si Jacob, aw nenompelà sikandin ki Laban. Minikagi sikandin, “Eden lay se salà ininang ko diyà kamno? Eden lay se punù linèpangan ko so gayed a no pig-alaw? 37 Kinelokad no den se kedakel te kedònan ko. Eden lay se tinakaw lekat kamno? Aw doen kinità nikaw, soli den iyan dini te menge kedomaan ta amon meg-osay dan kenita.

38 “Migterbaho a den diyà kamno te kelowan se omay. Dalem te pegtonggò ko te kamno menge ayam-ayam, wedà palos keogali se menge karniro aw kambing nikaw. Wedad karniro no kinaen ko. 39 Aw doen ayam-ayam no inimetayan te menenanap te kebenesan, wedà ko iyan ibingi diyà kamno, meneng kanak ayam-ayam se inselilin ko kenyan. Aw doen tinakaw pengkey aldaw aw delem, impebayad no iyan kanak. 40 Melima se terbaho ko. Melikit a egkeilad te aldaw, aw egkegenawan a te delem. Gayed a egkepolaw. 41 Yan se kelimahan ko dalem te kelowan se omay te pegterbaho ko diyà kamno. Sempolò teg epat se omay se pegterbaho ko diyà kamno amon isablag ko te didowa batà nikaw. Enem se omay se pegterbaho ko diyà kamno amon ibayad ko te menge ayam-ayam seini, aw mekesempolò nikaw todai se pakang no tepad te itandan no diyà kanak. 42 Meneng tinebangan a te Timanem egseligan te apò ko si Abraham aw amay ko si Isaac. Aw wedà a din tebangi, nenamay a nikaw den impekesayo te wedad palos ontong ko. Meneng kinità te Timanem se kelimahan ko aw pagod ko, aw yan tinompelà ka din tidelem.”

43 Minikagi si Laban, “Kanak batà se menge esawa nikaw, aw kanak apò se menge batà dan. Kanak heman se menge ayam-ayam seini. Pengkey eden se kitaen no dini, tomalag iyan kanak. Meneng eked kepakay aw megpeeleg a te menge batà ko aw menge apò ko. 44 Mèpiya aw megpepekangay ki den. Mèpiya heman aw doen kekitaan inangen ta amon eked ta kelibeli se pakang ta.”

45 Penga niyan, inabat i Jacob se dakel bato, aw impetindeg din iyan amon meinang kekitaan. 46 Minikagi sikandin diyà te menge kedomaan din, “Pengimon kaw heman te menge doma bato.”

Yan nengimon dan te menge bato, aw binonton dan iyan, aw penga niyan kimaen dan doton medapag kenyan. 47 Iningedanan iyan i Laban Jegar Sahaduta diyà te kagi te Aramea (kelebadan niyan, peg-imon te kekitaan), aw iningedanan iyan i Jacob Galeed diyà te kagi te Hebreo (onawa se kelebadan niyan).

48 Minikagi si Laban, “Se menge bato binonton seini, yan se kekitaan ta amon eked ta kelibeli se pakang ta.”

Yan se doun te iningedanan se tanà sìyan Galeed. 49 Iningedanan heman iyan Mispa (kelebadan niyan, benteyanan), so minikagi heman si Laban diyà ki Jacob, “Penga te pegsoway ta kwani, Timanem se megbantay diyà te tengà-tengà ta amon eked ki pegbolaw. 50 Aw ipeeleg no se menge batà ko, sìyan esawa nikaw, aw pengognanen no se doma bayi kenà batà ko, pengkey eked ko iyan ketegahi, meneng kitaen iyan te Timanem aw ipelumun ka din. 51 Dini den se menge bato binonton ko diyà te tengà-tengà ta, aw dini den se bato ininang kekitaan ta. 52 Insawol ta iyan dini amon eked ta kelibeli se pakang ta seini. Eked a palos làpang te menge bato seini amon megpeeleg a kamno, aw eked ka palos heman làpang kani amon megpeeleg ka kanak. 53 Aw lèpangan ta se pakang seini, ipelumun ki te Timanem egseligan i Abraham aw si Nahor.”

Penga niyan, migsapà heman si Jacob pineokit te ngadan te Timanem egseligan te amay din si Isaac. 54 Inimetayan din heman se ayam-ayam, aw sinonog din iyan, aw imbegay din iyan diyà te Timanem doton te bontod. Mig-inang heman sikandin te kànen, aw impekaen din se menge kedomaan din. Penga te pegpengaen dan, minidegà dan kidoen.

55 Pegkeiselem niyan, nengadek si Laban te menge apò din aw batà din, aw migtawal-tawal sikandin amon mèpiya se ibegay te Timanem diyà kandan. Penga niyan, nesayo sikandin aw minolì.