32
Pegpeketagad i Jacob te pegkità din ki Esau
Nayan, dimeleg si Jacob, aw migkità sikandin te menge anghil kidoen te dalan. Pegkità din kandan, minikagi sikandin, “Seini se eg-ogpaan te Timanem.” Yan iningedanan iyan Mahanaim (kelebadan niyan, dowa ogpeanan).
Doen menge otaw insogò i Jacob impeonà din doton te kedowa din si Esau kidoen te tanà te Edumea. Migpunù si Jacob diyà kandan, “Keliwati niyo se kagi ko seini diyà te kakay ko si Esau egsegmanen ko. ‘Siaken se sineligan no si Jacob. Mig-ogpà a doton ki Tiyò Laban lamig te peg-olì ko seini. Medita den se baka, asno, karniro, kambing, aw allang tinig-apò ko. Simabi a den kamno Akay, tepad te pegdateng ko, so doen pa besi keido no diyà kanak.’ ”
Peglikò te otaw insogò i Jacob, minikagi dan, “Dimoton kay te kedowa no si Esau, aw nesayo den sikandin amon somongon kamno. Epat gatos se otaw impetaking din.”
Yan nelemitan si Jacob, aw netetana se pedowan din. Tinengà din se otaw timaking kandin, aw tinengà din heman se menge karniro, kambing, baka, aw kamilo din. Mig-aneng-aneng sikandin, “Aw lompaken i Esau se monà ebong, mekelowà besi se modi ebong.”
Penga niyan, migtawal-tawal si Jacob, “E Timanem egseligan te apò ko si Abraham aw amay ko si Isaac. Pengolo ko, sikona se minikagi diyà kanak te keilangan molì a doton te tanà tinebawan ko aw menge kedomaan ko, aw migpakang ka heman te dakel se ibegay no diyà kanak. 10 Pelaban dakel se keido no diyà kanak wedad temanan niyan, so ontò a medanà diyà kamno. Kedengan te pegbatas ko te wayeg te Jordan pesalo doton ki Laban, wedad palos inibing ko olò bangkà. Meneng songkani doen den dowa dakel ebong ko seini. 11 Tebangi a bag seini amon eked a peelegi te kedowa ko si Esau. Nelemitan a aw lomompak sikandin diyà kenami, aw megelà se kedita day sipat te menge esawa ko aw menge batà ko. 12 Meneng migpakang ka te mèpiya se ibegay no diyà kanak, aw inangen no medita se bowad-bowad ko iling te enay doton te dagat eked kebilang.”
13 Minidegà si Jacob kidoen. Pinemallì din se menge ayam-ayam din kidoen amon doen ibowang din diyà ki Esau. 14 Dowa gatos se kambing bayi, kelowan se kambing meama, dowa gatos se karniro bayi, kelowan se karniro meama, 15 ketlowan se kamilo bayi sipat nati niyan, kepatan se baka bayi, sempolò se baka meama, kelowan se asno bayi, aw sempolò se asno meama. 16 Impeebong-ebong din se kedita dan, aw doen sineligan impetonggò din diyà te tegsebad-sebad ebong. Minikagi sikandin diyà te menge sineligan din, “Keilangan mengibing kaw te menge ayam-ayam doton te monà day, aw keilangan doen heman elet diyà te tegsebad-sebad ebong.”
17 Minikagi si Jacob diyà te sineligan ontò din impeonà, “Aw kitaen no se kedowa ko si Esau, aw meg-insà sikandin aw sinu se amo nikaw aw kenan ka pesalo aw sinu se tig-apò te menge ayam-ayam inibing nikaw, 18 keilangan tomaba ka diyà kandin, ‘Seini se menge ayam-ayam te sineligan no si Jacob. Impeibing din iyan amon ibowang diyà kamno. Doton pa sikandin te modi.’ ”
19 Yan heman se impunù i Jacob diyà te ikedowa aw iketelo te otaw aw diyà te kedita te doma otaw nengibing te menge ayam-ayam. Minikagi sikandin, “Aw komità kaw kandin, keilangan onawa heman se ikegiyen niyo. 20 Keilangan mikagi kaw diyà kandin, ‘Doton pa te modi se sineligan no si Jacob.’ ”
Yan se impunù din diyà kandan, so mig-aneng-aneng sikandin, “Pineokit te ibowang ko diyà kandin, megkèpiya se pedowan din diyà kanak. Yan aw megkità kay, pegwedaden din besi se salà ininang ko diyà kandin.”
21 Yan impeonà i Jacob se ibowang din, meneng minidegà pa sikandin kidoen.
Pegpeliyangay i Jacob aw Timanem
22 Pegkedelem niyan, minenaw si Jacob aw inibing din se dowa esawa din, aw dowa allang dan, aw sempolò tegusà batà din meama, aw impebatas din dan diyà te wayeg te Jordan kidoen te Jaboc. 23 Penga te pegpebatas din kandan, impebatas din heman se kedita te ayam-ayam tinig-apò din. 24 Olò si Jacob se wedà batas.
Penga niyan, doen migpekità diyà ki Jacob aw migpeliyangay dan lamig te iselem. 25 Pegketaga-taga te otaw sìyan te eked dàgi si Jacob, inewidan din se pangkol i Jacob, aw neliyu iyan. 26 Minikagi se otaw sìyan, “Pelowai a den, so agpet den lomibtak se aldaw.”
Meneng minikagi si Jacob, “Eked a singed aw begayan a no te mèpiya.”
27 Mig-insà se otaw sìyan, “Sinu lay se ngadan nikaw?”
Timaba sikandin, “Siak si Jacob.”
28 Minikagi se otaw sìyan, “Lekat seini, eked ka den ingedani ki Jacob, meneng ingedanan ka beling ki Israel (kelebadan niyan, minato diyà te Timanem). So migpeliyangay ka aw Timanem, domaeg ka heman te menge otaw.”
29 Mig-insà si Jacob, “Sinu ka lay bag?”
Timaba se otaw sìyan, “Ikà eg-insà aw sinu a.”
Penga niyan, mèpiya se impakang din diyà ki Jacob, aw nesayo sikandin. 30 Iningedanan i Jacob se tanà sìyan Peniel (kelebadan niyan, bawa te Timanem), so minikagi sikandin, “Kinità ko den se bawa te Timanem, meneng wedà a kedì kematay.”
31 Peglibtak te aldaw, nesayo si Jacob lekat te Peniel. Miglengkiyod sikandin tandà te pegkeliyu te pangkol din. 32 Doun niyan, pengkey lamig songkani, kenà egpengànen te menge bowad-bowad i Israel se ogat te pangkol te ayam-ayam eg-iyawen dan, so yan se inewidan te Timanem te pangkol i Jacob.