1 Si Melkisedec se selotan doton te lonsod te Salem, aw sikandin se telekagon te menge otaw egsimba te Timanem ontò melangkaw. Peg-olì i Abraham lekat te pegdaeg din te menge selotan migpoon kandin, simongon si Melkisedec kandin aw migtawal-tawal sikandin tepad ki Abraham amon begayan sikandin te Timanem te mèpiya. 2 Si Melkisedec heman se binegayan i Abraham te ikesempolò ketengà te kedita neabat din. Se kedegdagan te ngadan i Melkisedec, yan se kagi metòlid. Yan tewalen sikandin “Selotan Eglowan te Metòlid.” Doen heman kedegdagan te kagi Salem, yan se kagi kelinaw. Yan tewalen heman sikandin “Selotan te Kelinaw.” 3 Kidoen te kagi te Timanem insolat, wedà solati aw sinu se amay aw inay din. Wedà tadon heman ketegahi aw sinu se menge kemonaan din. Wedad heman insolat tepad te pegtebaw din aw tepad te pegkematay din. So iling te wedad netegahan tadon tepad te linekatan din aw detengan din, yan iling sikandin te Batà te Timanem wedad temanan te pegkagon din.

4 Yan netegahan tadon te ontò melangkaw si Melkisedec, so sikandin se binegayan te kemonaan tadon si Abraham te ikesempolò ketengà te kedita neabat din lekat te menge otaw dinaeg din. 5 Nayan, doen punù te Timanem insolat te keilangan memegay se kedita te Judiyo te ikesempolò ketengà te gamad diyà te menge kedowa dan bowad-bowad i Levi ininang telekagon, pengkey bowad-bowad heman i Abraham se menge bowad-bowad i Levi sipat te kedita te doma dan Judiyo. 6 Meneng labi pa melangkaw si Melkisedec diyà te menge telekagon te Judiyo, so pengkey kenà bowad-bowad i Levi si Melkisedec, meneng sikandin se binegayan i Abraham te ikesempolò ketengà te neabat din.

Labi pa heman melangkaw si Melkisedec diyà ki Abraham, so sikandin se migtawal-tawal tepad ki Abraham tapay pinekangan te Timanem, 7 so se otaw megtawal-tawal tepad te doma, yan se labi pa melangkaw diyà te otaw tewal-tewalan din.

8 Nayan, se menge telekagon te Judiyo egbegayan te ikesempolò ketengà, olò dan otaw egkematay. Meneng labi pa melangkaw si Melkisedec se binegayan i Abraham te ikesempolò ketengà. So wedad indan tepad te pegkematay din, iling te wedad temanan te pegkagon din.

9-10 Pengkey egbegayan se menge bowad-bowad i Levi te ikesempolò ketengà so telekagon dan te Judiyo, meneng labi pa melangkaw si Melkisedec diyà kandan. Pegsongon din ki Abraham te pegpemegay i Abraham kandin te ikesempolò ketengà, iling te nemegay heman si Levi diyà kandin, so si Levi se bowad-bowad i Abraham.

11 Nayan, gebii, ininang telekagon se menge bowad-bowad i Levi, aw si Aaron se tagnà telekagon dan. Pengkey timolò dan te menge punù ingkeliwat i Moises, meneng wedà peg-aneng-aneng se Timanem te metòlid dan pineokit te eg-inangen dan, aw yan se doun te keilangan isogò te Timanem se sebad kemolò Telekagon tadon iling te pegkagon i Melkisedec. 12 Pegselilin te Timanem te pegkagon te Judiyo, keilangan selilinan din heman se menge tapay punù. 13-14 Netegahan tadon te sinelilinan iyan, so se Pengolo tadon si Cristo, kenà sikandin sakop te pongan i Levi, meneng sakop sikandin te pongan i Juda. Wedad palos bowad-bowad i Juda neinang telekagon te Judiyo, so wedà pegtoladà si Moises te mepakay aw meinang telekagon se sakop te pongan i Juda.

15 Ontò den mebangal te sinelilinan se pegkagon te menge bowad-bowad i Levi, so doen den kaling Telekagon tadon iling ki Melkisedec. 16 Ininang Telekagon tadon si Cristo kenà pineokit te punù tepad te pongan te kemonaan din, meneng ininang sikandin Telekagon tadon so doen pedowan din metolos wedad temanan. 17 So doen kagi te Timanem insolat tepad kandin,

20 Labi pa mèpiya se pegkagon i Jesus, so doen impakang te Timanem tepad kenyan. Kedengan, pegkeinang te menge bowad-bowad i Levi telekagon te Judiyo, wedad impakang te Timanem tepad kandan. 21 Meneng peg-inang te Timanem ki Jesus Telekagon tadon, impesipat din se kandin ngadan diyà te pakang din kandin, so doen kagi te Timanem insolat,

23 Pegkagon te menge telekagon te Judiyo, keilangan medita dan, so pegketemoay te sebad aw pegkematay, doen doma simelilin kandin, aw yan gayed dan migpetondogay. 24 Meneng labi pa mèpiya se pegkagon i Jesus, so wedad temanan niyan, so eked den sikandin kematay. 25 Yan se doun te gayed sikandin mekebatog megpelowà te kedita te otaw megpedapag diyà te Timanem pineokit kandin. So wedad temanan din, gayed sikandin egpemoyò diyà te Amay din te itabang din kandan.

26 Yan si Jesus se Telekagon neketepad kenitadon. Ontò sikandin metòlid. Wedad palos salà din so wedad medaet ininang din. Kenà sikandin iling te otaw egpekesalà. Ininang sikandin te Timanem ontò melangkaw diyà te kedita, pengkey doton te langit. 27 Labi pa sikandin mèpiya diyà te menge telekagon te Judiyo, so keilangan doen ayam-ayam imetayan aw sonogen dan te kelikit te aldaw tandà te peg-inang dan te salà. Meneng wedad palos salà te Telekagon tadon. Keilangan doen heman ayam-ayam imetayan te menge telekagon te Judiyo diyà te Timanem te kelikit te aldaw tandà te pegpekesalà te kedita dan Judiyo. Meneng labi pa mèpiya se ininang te Telekagon tadon, so mekesebad olò sikandin pemegay te pegkeotawun din amon imetayan, so botong se sebad pegkematay din. 28 Kedengan, pineokit te menge punù ingkeliwat i Moises, eg-inangen telekagon te Judiyo se menge otaw egpekesalà. Meneng songkani, doen den pakang te Timanem nekeselilin te menge punù ingkeliwat i Moises, so ininang te Timanem se Batà din Telekagon tadon wedad salà din te wedad temanan.