8
Si Cristo se Telekagon doton te langit
1 Nayan, tiboken ko den se kedita te intoladà ko kenyo. Doen den Telekagon tadon ontò neketepad kenitadon iling kenyan. Sikandin se impeonsad te Timanem Melangkaw kidoen te tangkil din doton te langit, aw impelowan din heman sikandin doma din. 2 Sikandin se Telekagon tadon kidoen te Ontò Tambì te Timanem doton te langit, sìyan balay kenà ininang te otaw, meneng ininang te Timanem.
3 Se kedita te menge telekagon te Judiyo, keilangan doen bowang dan aw ayam-ayam eg-imetayan dan ibegay diyà te Timanem. Iling heman kandan se Telekagon tadon si Jesus, so keilangan doen heman ibegay din diyà te Timanem. 4 Doton den se Telekagon tadon te langit, so simpana dini pa sikandin te tanà, eked kepakay aw meinang sikandin telekagon te Judiyo, so nenamay den doen menge telekagon te Judiyo egpemegay diyà te Timanem iling te punù ingkeliwat i Moises gebii. 5 Iling olò te ininang doton te langit se eg-inangen te menge telekagon te Judiyo. Doen heman simbahan doton te langit pig-ilingan te simbahan te menge Judiyo, so te wedà pa peg-inang si Moises te balay egsimbahan dan, migpunù se Timanem diyà kandin, kagi din, “Keilangan ipeinang no iyan iling te sìyan impekità ko kamno kedengan doton diatas te bontod.”
6 Se eg-inangen i Cristo diyà kenitadon, yan se labi pa mèpiya diyà te ininang te menge telekagon te Judiyo. Se kaling peokit ininang i Cristo, yan se labi pa mèpiya diyà te tapay peokit, so labi pa mèpiya se impakang te Timanem tepad kenyan.
7 Simpana aw botong se tapay peokit, wedad keilangan te selilinan iyan te kaling peokit. Meneng kenà iyan botong, aw sinelilinan din iyan, 8 so wedà sikandin keluba tandà te medaet ininang te menge otaw limàpang te punù ingkeliwat i Moises. Yan minikagi se Timanem,
“Doen aldaw domateng aw meg-inang a te kaling peokit amon megsebad se kedita te Judiyo diyà kanak, pengkey bowad-bowad dan i Israel aw bowad-bowad dan i Juda.
9 Se kaling peokit inangen ko, kenà iyan iling te tapay peokit ininang ko tepad te menge kemonaan dan gebii te pegpengibing ko kandan lekat te Ehipto.
Wedà dan taking te tapay peokit, aw yan timinggetan a kandan.”
10 Minikagi heman se Timanem, “Iling kani se kaling peokit inangen ko te menge bowad-bowad i Israel te modi aldaw.
Ipeaneng-aneng ko kandan se menge punù ko amon eked dan iyan kelibeli. Iling te isolat ko se menge punù ko kidoen te pedowan dan amon meibeg dan tomolò kenyan.
Penga niyan, siaken se Timanem simbahen dan, aw sikandan se otaw ipaten ko.
11 Aw metoman iyan, wedad den keilangan te megtoladà se otaw te menge doma din te keilangan meg-iling dan tepad kanak, so metaga-taga se kedita te otaw tepad kanak, pengkey sagkep aw melangkaw dan.
12 Keidowan ko dan, aw pegwedaden ko se salà dan. Eked a palos peg-aneng-aneng tepad te salà ininang dan.”
13 Pineokit te peg-ikagi te Timanem te meg-inang sikandin te kaling peokit, impetaga-taga din kenitadon te sinelilinan din den se tapay peokit. So sinelilinan den se tapay, megkewedad iyan te eked kenamay, so wedad den kekemowan niyan.