1 Nayan, medita se iskribinti aw doma otaw nelegeb te salà migpedapag diyà ki Jesus amon domineg dan te itoladà din. 2 Yan se doun te migtindaet se menge Parisiyo aw menenoladà te punù, aw minikagi dan, “Medaet se eg-inangen din, so egsigelaken din se menge otaw egpekesalà aw eglàpang te punù ingkeliwat i Moises. Medaet so egpengaen sikandin doma dan.”

3 Pegketaga-taga i Jesus te eg-ikegiyen dan, mig-indan sikandin te tegdeyanan seini, kagi din, 4 “Aw doen otaw doen sebad gatos ayam-ayam din karniro, aw metalon se sebad, tenanan din se kesyaman teg siyam doton te tanà doen sagbet, aw pemehaen din se sebad netalon lamig kitaen din. 5 Pegkità din, ontò sikandin meluba aw ibingen din molì. 6 Aw molì sikandin, tewalen din se menge sigalak din aw simbalay din, kagi din, ‘Keilangan meluba kaw heman, so kinità ko den se karniro netalon.’ 7 Nayan, penenalan kaw te kagi ko. Iling heman kenyan, pengkey sidebok se otaw nelegeb te salà, aw megselsel sikandin, doen keluba doton te langit labi pa dakel diyà te keluba tepad te kesyaman teg siyam otaw wedà pegselsel so eg-inang dan te metòlid.”

8 “Aw doen sempolò se kwarta te bayi plata meelagà, aw metalon se sebad, temteman din se solò, aw ponasan din heman se balay, aw ontò din pemehaen lamig kitaen din. 9 Aw kitaen din iyan, tewalen din se menge sigalak din aw menge simbalay, kagi din, ‘Keilangan meluba kaw heman, so kinità ko den se kwarta netalon.’ 10 Penenalan kaw te kagi ko. Iling heman kenyan, meluba se menge anghil te Timanem pengkey olò sebad se otaw megselsel te salà din.”

11 Minikagi heman si Jesus, “Doen otaw dowa se batà din meama. 12 Minikagi se adi diyà te amay din, ‘Amà, ibeg ko ibegay no den kanak se ketengà te tanà aw kedònan tenanan no kenami aw matay ka.’ Penga niyan, tinengà te amay se tanà din, aw imbegay din iyan diyà te didowa batà din. 13 Penga niyan te wedà kenamay, imbeligyà te adi se tanà imbegay kandin, aw nesayo sikandin nengibing te kwarta din. Dimoton sikandin te ontò mediyò ogpeanan, aw pigbàtan din se kwarta din kidoen pineokit te medaet eg-inangen din wedad ontong. 14 Pegkeamin te kwarta din, dimateng se ontò medaet bayil, aw ontò den sikandin nelidò. 15 Penga niyan, migpeido-ido sikandin diyà te sebad otaw doen tanà kidoen, aw impetonggò sikandin te menge osa. 16 Ontò sikandin binallos, aw kànen din peden se egpengànen te osa, so wedad doma kànen din. Wedad otaw neido kandin, aw wedad heman kànen imbegay kandin. 17 Meneng mig-aneng-aneng sikandin, ‘Se kedita te otaw egterbaho kidoen te amay ko, ontò dakel se kànen dan. Meneng siak, agpet a matay dini tandà te ballos ko. 18 Mèpiya aw molì a den doton te amay ko, aw megselsel a diyà te Timanem aw diyà te amay ko. 19 Mikagi a heman diyà kandin te mepakay aw eked a din peden tewali batà din, meneng inangen a din iling te otaw egtendanan din.’ 20 Penga niyan, timindeg sikandin aw minolì.

“Pengkey mediyò pa se balay, meneng kinità sikandin te amay din aw neidowan din. Kimagnan se amay doton te batà din, aw kimeles kandin, aw nengadek kandin. 21 Minikagi se batà din, ‘Amà, doen salà ininang ko diyà te Timanem aw diyà heman kamno. Eked a no peden tewali batà nikaw.’ 22 Meneng timawal se amay din diyà te menge sineligan, kagi din, ‘Kegaen kaw. Ibingi niyo se ontò mèpiya saol ekasan din. Pepeningsingi niyo heman sikandin, aw pesepetosi niyo. 23 Engayi niyo se nati te baka melambò amon iyawen, so meg-inang kidon te dakel kànen tandà te luba tadon. 24 Eden ko aw nematay den se batà ko seini, meneng neantay pa kedì. Netalon sikandin, meneng kinità.’ Penga niyan, migtebò dan se migpista.

25 “Nayan, te peg-olì te adi, doton pa te pawà se kakay din. Meneng pegkedapag te kakay din diyà te balay, dinineg din se menge otaw migdelangan aw simayaw. 26 Pegdineg din kenyan, tinawal din se sebad sineligan aw mig-insà aw eden se neinang. 27 Timaba sikandin, ‘Minolì den se adi no, aw impeiyaw te amay niyo se nati te baka melambò, so nekeolì den se adi no aw wedad mesakit.’ 28 Pegdineg din kenyan, ontò neopal se kakay igsà wedà penayit diyà te balay. Penga niyan, timenà se amay din amon ipepenayit. 29 Meneng minikagi se kakay batà din, ‘Tay law. Pengkey pila se omay, gayed a pa timolò kamno, aw wedad palos punù no linèpangan ko. Meneng wedad palos imbegay no kanak, pengkey kambing deitek, amon lelahen ko se menge sigalak ko. 30 Meneng se doma batà no sida, pigbàtan din den se kwarta no imbayad din te bayi. Meneng peg-olì din, impeiyaw no ekon se melambò nati te baka amon meluba sikandin.’ 31 Minikagi se amay din, ‘Atò, gayed ki egpetekingay, aw pengkey eden se kanak, kamno heman iyan. 32 Meneng keilangan megpelelahay kidon aw megpelubahay kidon, so eden ko aw nematay den se adi no, meneng neantay pa kedì. Netalon sikandin, meneng kinità.’ ”