27
Inibing si Jesus doton ki Pilato
Mat. 27:1-2; Mar. 15:1; Luc. 23:1-2; Juan 18:28-32
Nayan, peglibtak te aldaw sìyan, netipon se kedita te pengolo te simbahan aw menge obanen te Judiyo, aw miglalang dan aw eden se idimanda dan diyà te gobirno tepad ki Jesus amon imetayan sikandin. Penga niyan, ginapos dan si Jesus, aw inibing dan sikandin doton te gobirnador si Pilato.
Pegkematay i Judas
Mat. 27:3-10; Ininang 1:18-19
Nayan, si Judas, sìyan migtolok ki Jesus, pegketaga-taga din te minikagi se menge pengolo te simbahan aw menge obanen te Judiyo te keilangan imetayan si Jesus, miglama-lama sikandin te medaet ininang din. In-olì din se kedakel te kwarta imbegay dan diyà kandin, aw minikagi sikandin diyà kandan, “Doen salà ininang ko, so migtolok a te otaw wedad palos salà din aw imetayan den sikandin.”
Meneng minikagi dan, “Wedad labut day te salà nikaw. Inday den kamno.”
Penga niyan, insabog din se kwarta doton didalem te dakel simbahan, aw nesayo sikandin aw mig-iket te lieg din.
Inimon te menge pengolo te simbahan se kwarta insabog din, aw minikagi dan, “Simpana isawol tadon se kwarta seini diyà te solanan te kwarta ibowang diyà te Timanem, mekelàpang kidon te punù ingkeliwat i Moises, so seini se imbayad te pegpengimatay te otaw.”
Penga niyan, migsebad dan tepad te kwarta sìyan, aw yan se imbayad dan te tanà te meneniyonay amon doen lebengan te menge otaw matay kidoen kenà tege Jerusalem. Yan se doun te eg-ingedanan se pawà sìyan “Pawà te Dipanog” lamig songkani.
Pineokit kenyan, netoman den se inikagi te telekeliwat te kagi te Timanem gebii si Jeremias, kagi din,
“Ketlowan se kwarta plata keelagà din pegsebadan te menge bowad-bowad i Israel, 10 aw yan se ibayad dan te tanà te meneniyonay, so yan se insogò te Timanem kanak.”
Pig-insà i Pilato si Jesus
Mat. 27:11-14; Mar. 15:2-5; Luc. 23:3-5; Juan 18:33-38
11 Nayan, pegpengibing dan ki Jesus doton te gobirnador, mig-insà se gobirnador, “Sikona lay se Selotan te menge Judiyo?”
Minikagi si Jesus, “Ee. Benal se kagi nikaw.”
12 Meneng pegdimanda te menge pengolo te simbahan aw menge obanen te Judiyo tepad ki Jesus, pengkey wedad salà din, meneng wedà palos sikandin ikagi.
13 Penga niyan, minikagi si Pilato, “Medita se indimanda dan tepad kamno. Nengà lay wedà ka taba kandan?”
14 Meneng wedà palos taba si Jesus, aw yan se doun te ontò nepela se gobirnador.
Pig-okom si Jesus te imetayan
Mat. 27:15-26; Mar. 15:6-15; Luc. 23:13-25; Juan 18:39–19:16
15 Nayan, kelikit te Pista te Pegpelowà, doen ketanem te gobirnador te ipelowà din se sebad otaw kineleboso, pengkey sinu se pemellien te kedita te otaw. 16 Na, dalem niyan, doen medaet otaw kineleboso ontò nedengeg, ngadan din si Barabas. 17 Pegketipon te medita otaw, mig-insà si Pilato, “Sinu lay se ibeg niyo ipelowà ko? Si Barabas aw si Jesus egtewalen niyo Misiyas? Sinu lay se pemellien niyo?”
18 Yan se inikagi i Pilato, so netegahan din te impedakep te menge pengolo te simbahan si Jesus so miningà dan kandin.
19 Dalem te pegpenenoo i Pilato doton te oseyanan, doen otaw insogò te esawa din amon ikeliwat se kagi din, “Ikà eg-inabut te otaw sìyan, so wedad salà din. Ontò nelemitan se pedowan ko tepad kandin pineokit te tegeinep tidelem.”
20 Dalem niyan, gayed migdeliseg se menge pengolo te simbahan aw menge obanen te Judiyo diyà te otaw netipon kidoen amon memoyò dan ki Pilato te ipelowà din si Barabas aw imetayan si Jesus. 21 Wedà kenamay, todà mig-insà se gobirnador, kagi din, “Sinu lay se pinemallì niyo ipelowà ko?”
Timaba dan, “Si Barabas.”
22 Mig-insà si Pilato, “Menonen ko si Jesus egtewalen niyo Misiyas?”
Timaba se kedita dan, “Imetayi sikandin. Lensangi diyà te kros.”
23 Mig-insà si Pilato, “Nengà lay? Eden lay se salà ininang din?”
Meneng labi pa dakel se kagi dan aw migbelobansag dan, “Imetayi sikandin. Lensangi diyà te kros.”
24 Nayan, netegahan den i Pilato te eked sikandin penalo diyà kandan, aw agpet den dan megsamok. Yan se doun te inabat din se wayeg aw mig-onaw te belad din dalem te pegtengteng dan diyà kandin. Minikagi sikandin, “Pineokit te peg-onaw ko te belad, impetaga-taga ko den kenyo te wedad labut ko aw imetayan niyo se otaw seini. Meneng aw yan se inangen niyo diyà kandin, inday den kenyo.”
25 Minikagi se kedita te otaw, “Mepakay diyà kenami aw ipelumun kay aw menge bowad-bowad day tepad te peg-imatay kandin, so salà day iyan.”
26 Penga niyan, impelowà i Pilato si Barabas lekat te keleboso. Impebadas din si Jesus, aw impeibing din amon ilansang diyà te kros.
Tinompuyus te menge sondalo si Jesus
Mat. 27:27-31; Mar. 15:16-20; Juan 19:2-3
27 Penga niyan, inibing te menge sondalo si Jesus doton didalem te balay te gobirnador, aw migtipon dan te kedita te doma dan sondalo. 28 Penga niyan, linowas dan se saol din lekat kandin, aw pineseolan dan sikandin te melalag saol iling te saol te selotan. 29 Linekò dan se belagen doen tigis, aw yan se insangkob dan diyà te olo din iling te korona te selotan. Doen heman tigbaw impeawid dan kandin iling te bangkà te selotan. Penga niyan, limongken dan diyà kandin aw migpelingo-lingo dan te sikandin se selotan egsegmanen dan. Minikagi dan, “Iduyun sikona Selotan te menge Judiyo.”
30 Penga niyan, tineptepan dan sikandin. Inabat dan se tigbaw lekat kandin, aw yan se imbadas dan te olo din. 31 Penga te pegtompuyus dan kandin, linowas dan se melalag saol lekat kandin aw impesaol dan diyà kandin se kandin saol. Penga niyan, inibing dan sikandin lekat te balay te gobirnador amon ilansang diyà te kros.
Inlansang si Jesus diyà te kros
Mat. 27:32-44; Mar. 15:21-32; Luc. 23:26-43; Juan 19:17-27
32 Pegkesayo dan lekat te Jerusalem, netelaan te menge sondalo se tege Sirene ngadan din si Simon. Lineges dan sikandin neniang te kros lensangan ki Jesus. 33 Dimoton dan te bontod iningedanan Golgota. Se kelebadan niyan, “Tòlan te Olo.” Pegdateng dan doton, 34 imbegay te sondalo diyà ki Jesus se bino sinengedan te bebolong te saka metabang amon eked din imenmani se kesakit. Meneng pegtimtim din kenyan, wedà din pedelegi inemi.
35 Penga te peglansang te sondalo kandin diyà te kros, pigtalad-talad dan se penenaktun linowas din, aw migbonot dan aw eden se penenaktun meabat te teg sebad-sebad kandan. 36 Penga niyan, nenenoo dan aw migtonggò dan kandin. 37 Doen solat insawol dan diatas te olo din tepad te indimanda kandin, kagi niyan, “Seini si Jesus, Selotan te menge Judiyo.”
38 Doen heman dowa megdedempasay inlansang diyà te kros kidoen te tangkil din, aw si Jesus diyà te tengà-tengà.
39 Migtompuyus kandin se menge otaw minokit te dalan medapag kidoen. Migkiling-kiling dan te olo dan te peg-otik dan kandin, 40 aw minikagi dan, “Minikagi ka te mekebatog ka megbaet te dakel simbahan sida, aw todà no iyan ipetindeg dalem te telo se aldaw. Aw mekebatog ka kenyan, pekitai diyà kenami te doen tolos no pineokit te pegtabang no te kamno pegkeotawun amon eked ka kematay. Aw ontò ka Batà te Timanem, tenà ka den lekat te kros.”
41 Iling heman kenyan se pegtompuyus te menge pengolo te simbahan, aw menenoladà te punù ingkeliwat i Moises, aw menge obanen te Judiyo. Minikagi dan, 42 “Migtabang sikandin te menge doma otaw netigdaan amon eked dan pa kematay. Meneng eked den sikandin peketabang te kandin pegkeotawun amon eked kematay. Minikagi sikandin te sikandin se Selotan te menge bowad-bowad i Israel. Eked kidon pemenal te kagi din singed aw tomenà sikandin lekat te kros. 43 Timanem ekon se egseligan din. Kitaen tadon den aw dakel se pedowan te Timanem kandin pineokit te pegtabang te Timanem kandin te aldaw seini, so minikagi sikandin, ‘Siaken se Batà te Timanem.’ ”
44 Iling heman kenyan se pegtompuyus te megdedempasay inlansang diyà te kros kidoen te tangkil din.
Pegkematay i Jesus
Mat. 27:45-56; Mar. 15:33-41; Luc. 23:44-49; Juan 19:28-30
45 Nayan, pegkealas dosi te aldaw, migkengitngit se langit aw tanà lamig alas tris te meapon. 46 Menge alas tris te meapon, timawal si Jesus te dakel se kagi din, kagi te Hebreo, “Eli, Eli, lama sabaktani?” Se kelebadan niyan, “E Timanem ko, nengà lay tinenanan a nikaw?”
47 Pegdineg te menge otaw netipon kidoen, minikagi dan, “Nengenganay den sikandin diyà ki Elias, sìyan telekeliwat te kagi te Timanem gebii.”
48 Doen otaw ayas minangay te ispongha aw inagem din iyan diyà te bino sinengedan te wayeg. Intangen din iyan diyà te toktok te tigbaw, aw impesopsop din iyan ki Jesus. 49 Meneng timawal se menge doma otaw, “Pebeyai sikandin, so kitaen tadon aw domini si Elias amon megtabang kandin.”
50 Penga niyan, todà timawal si Jesus te dakel se kagi din, aw penga niyan nematay.
51 Nayan, tigkan nelisì se kayad kidoen te tengà-tengà te dakel simbahan te Jerusalem. Nelisì iyan lekat diatas lamig diyà te ongan. Ontò miglinog, aw doen dedakel bato nelebak. 52 Neowang se menge ilib linebengan te otaw nematay, aw medita se otaw sinakop te Timanem neantay lekat te nematay. 53 Limowà dan lekat te lebeng dan, aw penga te pegkeantay i Jesus lekat te nematay, dimoton dan te Jerusalem, aw medita se otaw kimità kandan.
54 Na, se menge sondalo aw kapitan migtonggò ki Jesus, nelemitan dan te pegkayong te linog, aw pegkekità dan te kepelahan neinang te pegkematay i Jesus. Minikagi dan heman, “Ontò Batà te Timanem se otaw sìyan.”
55 Medita heman se bayi kidoen kenà mediyò te kros, aw kinità dan se kedita te neinang. Sikandan se tapay timaking ki Jesus lekat te Galiliya taman te Jerusalem amon megtabang dan kandin. 56 Sikandan si Maria tege Magdala, aw kesangay din si Maria inay i Santiago aw si Jose, aw sìyan esawa i Sebedeo, aw doen heman menge doma dan.
Peglebeng ki Jesus
Mat. 27:57-61; Mar. 15:42-47; Luc. 23:50-56; Juan 19:38-42
57 Pegkeapon niyan, dimateng se meyaman otaw tege Arimatiya, ngadan din si Jose. Sikandin heman se tinoledaan i Jesus. 58 Dimoton sikandin ki Pilato, aw pinemoyò din se lawa i Jesus amon ilebeng din. Yan migpunù si Pilato te mepakay aw ebaten din se lawa. 59 Penga niyan, inabat din iyan lekat te kros, aw ginakes din te kaling sapot. 60 Doen lebeng kaling impeawang i Jose diyà te pangpang, aw yan se linebengan din te lawa i Jesus. Penga niyan, kinelid din se dakel bato amon isampeng te lebeng. Penga niyan, nesayo sikandin. 61 Kinità iyan i Maria tege Magdala aw kesangay din, so nenenoo dan dapag te lebeng.
Impetonggò se lebeng
62 Keeldawan niyan, dalem te aldaw te peg-etod, dimoton ki Pilato se menge Parisiyo aw menge pengolo te simbahan, 63 aw minikagi dan, “Sir, doen neeneng-enengan day. Te wedà pa kematay se otaw sìyan migpelingo-lingo Misiyas, minikagi sikandin te meantay lekat te nematay te iketelo te aldaw. 64 Yan mèpiya aw isogò no se menge sondalo megtonggò te lebeng din te telo se aldaw, amon eked ketakaw te menge tinoledaan din se lawa din lekat te lebeng. Yan eked dan pekeindan te neantay den sikandin lekat te nematay. Medita den se otaw neekalan te sikandin se Misiyas, meneng labi pa medaet aw keekalan dan te neantay den sikandin lekat te nematay.”
65 Minikagi si Pilato, “Na, petekingi niyo se menge sondalo doton te lebeng, aw ontò niyo iyan petonggoi.”
66 Penga niyan, dimoton dan te lebeng aw impeket dan se pengilala diyà te dakel bato insampeng kenyan amon wedad otaw meg-owang kenyan. Penga niyan, tinonggoan iyan te menge sondalo.