1 Nayan, penga te aldaw te peg-etod, te wedà pa libtak se aldaw te iselem te Linggo, dimoton si Maria tege Magdala aw kesangay din te lebeng i Jesus. 2 Te wedà dan pa dateng doton, ontò miglinog, so doen anghil te Timanem dimateng lekat te langit, aw nengelid te bato insampeng te lebeng, aw nenenoo sikandin kidoen. 3 Ontò minanyag se bawa din iling te kilem, aw ontò mepotì se penenaktun din. 4 Tinegangtang se menge sondalo tandà te lamit dan, aw nekelias dan iling te otaw nematay.

5 Na, pegdateng te didowa bayi doton te lebeng, minikagi se anghil, “Ikà niyo egkelemitan. Netegahan ko te inahà niyo si Jesus, sìyan inlansang diyà te kros. 6 Meneng wedad sikandin dini, so neantay den lekat te nematay. Yan se tapay din impakang. Awop kaw diyà amon kitaen niyo se linebengan kandin. 7 Na, kegaen kaw den doton te menge tinoledaan din, aw indani niyo dan te neantay den sikandin lekat te nematay, aw nekeonà den sikandin diyà kenyo pesalo doton te probinsya te Galiliya. Kitaen niyo sikandin doton. Yan se kagi ko kenyo.”

8 Penga niyan, migpekegaen dan se nesayo lekat te lebeng. Pengkey nelemitan dan, meneng ontò heman neluba se pedowan dan. Kimagnan dan amon meg-indan dan kenyan diyà te menge tinoledaan i Jesus.

9 Te wedà dan pa dateng doton, kinità dan si Jesus kidoen te dalan, aw minikagi sikandin, “Mèpiya iselem.”

Migpedapag dan diyà kandin, aw limongken dan, aw minawid dan te benis din, aw migsimba dan kandin. 10 Minikagi si Jesus, “Ikà niyo egkelemitan. Doton kaw den te menge tinoledaan ko. Ikagi kaw diyà kandan te ibeg ko domoton dan te Galiliya, so kitaen a dan doton.”

11 Nayan, pegkesayo te bayi, dimoton te Jerusalem se menge sondalo migtonggò te lebeng. Mig-indan dan diyà te menge pengolo te simbahan te kedita te neinang diyà kandan doton te lebeng. 12 Penga niyan, tinipon te menge obanen te Judiyo se menge doma dan, aw migpebelaw-belaway dan. Penga niyan, dakel se kwarta imbegay dan diyà te menge sondalo, 13 aw minikagi dan, “Peg-indan kaw diyà te doma otaw te dimoton se menge tinoledaan din te delem, aw tinakaw dan se lawa din dalem te pegtedogi niyo. 14 Aw dinegen iyan te gobirnador, sikami se megbalaw-balaw kandin amon eked kaw din keopali.”

15 Penga niyan, kininawà te menge sondalo se kwarta, aw timolò dan te impunù kandan. Iling kenyan se ipeg-indan-indan te keditaan te Judiyo lamig songkani.

16 Nayan, dimoton se sempolò tegusà tinoledaan i Jesus te Galiliya doton te bontod pinedotonan i Jesus kandan. 17 Pegkità dan kandin, migsimba dan kandin. Meneng doen menge tinoledaan din egdowa-dowa aw benal sikandin. 18 Migpedapag si Jesus diyà kandan aw minikagi, “Impelowan a den diyà te kedita doton te langit aw dini heman te lanto te tanà. 19 Yan isogò ko den sikiyo doton te kebelad te keneyonan. Pegtoladà kaw te kedita te otaw amon tomaking dan kanak. Pemonyagi niyo dan diyà te ngadan te Timanem Amay, aw Batà din, aw Espiritu Santo. 20 Pegtoladà kaw kandan te keilangan tomolò dan te kedita te impunù ko diyà kenyo. Na, gayed a meg-ipat kenyo pengkey lamig te temanan te keneyonan.”