1 Penga niyan, kinità ko se Karniro timindeg kidoen te bontod iningedanan Sion. Kidoen heman doma din se sebad gatos kepatan teg epat melalan otaw, sìyan otaw doen ngadan te Karniro aw ngadan te Amay din Timanem insolat diyà te kilay dan. 2 Penga niyan, doen dinineg ko minikagi kidoen te langit, iling te logo-logo te medita wayeg dimelog, aw iling heman iyan te eleg-eg te kilat. Doen heman dinineg ko iling te daging te medita otaw egpengablit te alpa. 3 Timindeg se kedita dan kidoen medapag te onsedanan te peglowan, aw kidoen te epat ayam-ayam metolos, aw kidoen te menge obanen. Migdelangan dan te kaling delangan. Sikandan olò se nekeiling te kaling delangan sìyan, so sikandan se impelowà te Karniro lekat te salà kidoen te keneyonan. 4 Wedà dan layok te kenà kandan esawa, so wedà dan pengognan. Egtaking dan te Karniro pengkey kenan pesalo. Impelowà din dan lekat te salà kidoen te keneyonan, aw neinang dan iling te pongo monà geniyen ibegay diyà te Timanem aw diyà te Karniro. 5 Wedad palos kebolalaw inikagi dan, so wedà dan peg-inang te medaet te wedà dan pa kematay.

6 Penga niyan, kinità ko se sebad anghil limayang kidoen te tengà-tengà te langit aw tanà. Egtoladà sikandin te mèpiya indan wedad temanan. Yan se intoladà din diyà te kedita te otaw mig-ogpà kidoen te keneyonan, pengkey kenan dan peg-ogpà. 7 Timawal sikandin te dakel se kagi din, “Segmani niyo se Timanem. Duyuni niyo heman sikandin, so dimateng den se aldaw te ipelumun din se kedita te poon din. Keilangan simbahen niyo sikandin mig-inang te langit, aw tanà, aw dagat, aw kedita te wayeg.”

8 Penga niyan, doen ikedowa anghil timelokon te doma aw minikagi, “Ontò den nebàtan se lonsod nedengeg iningedanan Babilonya, so binoyo te tege Babilonya se kedita te doma otaw te keneyonan amon makop dan diyà te medaet inang dan egkebensihan te Timanem.”

9 Penga niyan, doen iketelo anghil timelokon te doma aw timawal te dakel se kagi din, “Aw megsimba kaw diyà te menenanap mebolot aw diyà te inotaw impeinang din, aw pengilelaan kaw din diyà te kilay aw diyà te belad, 10 ipesipat kaw heman diyà te otaw ipelumun te Timanem, so neketagad den sikandin megpelumun te wedad keido din. Dalem te pegtonggò te Karniro aw menge anghil te Timanem, ipelumun te Timanem se otaw te apoy aw esopri. 11 Mebel se apoy te pelumun din kandan te wedad temanan. Pengkey aldaw aw delem, eked palos lengà se pelumun din kandan, so migsimba dan te menenanap mebolot aw inotaw impeinang din, aw pinengilelaan dan te ngadan te sìyan menenanap mebolot.”

12 Yan se doun te keilangan tomayod se kedita tadon sakop te Timanem diyà te kelimahan, pengkey kedita tadon egtolò te impunù te Timanem aw egsalig diyà ki Jesus.

13 Penga niyan, doen dinineg ko minikagi diyà kanak lekat te langit, “Solati inì. Meluba se otaw matay aw tapay dan simalig diyà te Pengolo.”

Minikagi se Espiritu Santo, “Ontò dan meluba, so wedad den terbaho dan lekat seini, aw mekeetod den dan, so doen ibowang kandan tandà te mèpiya inang dan.”

14 Penga niyan, kinità ko se labon mepotì, aw doen nenenoo kidoen iling te bawa te Timanem Migpekeotaw. Doen korona ininang te bolawan insangkob din kidoen te olo din, aw doen geniyay megalang inewidan din. 15 Penga niyan, doen sebad anghil limowà te dakel simbahan, aw timawal sikandin diyà te otaw nenenoo kidoen te labon, aw dakel se kagi din, “Gemiti se geniyay no, so dimateng den se aldaw te peglegani, so ontò den neinog se keneyonan.”

16 Penga niyan, ginamit te otaw nenenoo kidoen te labon se geniyay din, aw ginani din se keneyonan.

17 Penga niyan, doen sebad anghil limowà lekat te dakel simbahan te Timanem kidoen te langit, aw doen heman geniyay din megalang. 18 Penga niyan, dimateng se sebad anghil lekat te sonoganan kidoen te dakel simbahan. Sikandin se anghil egtonggò te apoy kidoen te sonoganan. Timawal sikandin diyà te doma anghil nengibing te geniyay, aw dakel se kagi din, “Gemiti se geniyay no aw genihi se pongo te paras kidoen te keneyonan, so neinog den.”

19 Penga niyan, ginamit te anghil se geniyay din aw ginani din se kedita te paras kidoen te keneyonan. Penga niyan, insawol din dan kidoen te dakel tigmesanan te paras amon ontò dan ipelumun te Timanem. 20 Penga niyan, ginìtan se pongo te paras kidoen te tigmesanan doton te lowà te lonsod, aw dimelog se dipanog niyan lekat te tigmesanan taman te menge telo gatos kilomitro. Sebad mitro aw tengà se kedalem te dipanog sìyan.