15
Pito anghil nengibing te pito kededàtan
1 Penga niyan, doen doma ledyawan kinità ko kidoen te langit ontò ko nepelahan. Doen pito anghil nengibing te pito kededàtan. Seini se temanan te kededàtan, so aw penga niyan, melingeb se pegpelumun te Timanem kandan kidoen te keneyonan.
2 Doen pa kinità ko iling te lanaw ontò metìngaw iling te ispiho, meneng pigsanged te apoy. Kinità ko heman kidoen se kedita te otaw nekedaeg te menenanap mebolot, so wedà dan pegsimba diyà te inotaw impeinang din, aw wedà dan pegpeinang te pengilala te bilang te ngadan din. Timindeg dan kidoen te kilid te lanaw, aw kinablit dan se menge alpa imbegay te Timanem kandan. 3 Migdelangan dan te delangan i Moises timolò te Timanem gebii, aw delangan te Karniro, kagi dan,
“E Timanem, Pengolo day,
Eglowan ka diyà te kedita te otaw.
Ontò mèpiya se kedita te inang nikaw.
Sikona se selotan diyà te kedita te lonsod.
Metòlid aw neketotok se kedita te eg-inangen nikaw.
4 E Pengolo day,
Segmanen ka aw iduyun ka te kedita te otaw,
So sebad no se eg-inang te ontò metòlid.
Simbahen ka te otaw lekat te kedita te lonsod,
So impekità no den te metòlid se kedita te ininang nikaw.”
5 Penga niyan, kinità ko te neowang den se dakel simbahan te Timanem kidoen te langit, aw kinità ko se didalem te tambì egsolan te punù te Timanem insolat. 6 Limowà lekat te dakel simbahan se pito anghil amon mengibing dan te pito kededàtan. Nenaol dan te tila iningedanan linon ontò mepotì, aw doen elen dan ininang te bolawan. 7 Doen pito lipong ininang te bolawan sinolan te pelumun te Timanem eked palos kematay. Yan se imbegay te sebad ayam-ayam metolos diyà te pito anghil. 8 Penga niyan, ontò dakel se ebel kidoen didalem te dakel simbahan te Timanem tandà te kelangkaw din aw tolos din. Yan se doun te wedad otaw mekeawop te dakel simbahan lamig mepenga se pito kededàtan inibing te pito anghil.