16
Pito lipong sinolan te pelumun te Timanem
Penga niyan, doen dinineg ko timawal kidoen te dakel simbahan, aw simogò sikandin te pito anghil, kagi din, “Ibingi niyo se pito lipong doton te keneyonan, aw olai niyo se awop niyan, so yan se pelumun te Timanem.”
Penga niyan, inibing te tagnà anghil se lipong, aw in-olà din iyan kidoen te tanà. Peg-olà din te lipong, pigbekokang se kedita te otaw pinengilelaan te menenanap mebolot, aw kedita dan migsimba diyà te inotaw impeinang din. Mahò aw ontò medaet se bekokang dan.
Inibing te ikedowa anghil se lipong, aw in-olà din iyan kidoen te dagat. Yan neinang dipanog se dagat, iling te dipanog te otaw binonò, aw nematay se kedita doton didalem te dagat.
Inibing te iketelo anghil se lipong, aw in-olà din iyan kidoen te kedita te wayeg aw selep, aw neinang dipanog se kedita niyan. Dinineg ko se inikagi te anghil insogò kidoen te wayeg, kagi din, “E Timanem eg-inang te metòlid, doen ka seini aw doen ka heman gebii. Ontò metòlid se pegpelumun no te otaw seini. Nemonò dan te menge sakop no aw telekeliwat te kagi no gebii, aw yan se doun te impeinem no den dan te dipanog. Mèpiya den, so nesàban den dan te ontong dan.”
Doen heman dinineg ko timawal kidoen te sonoganan, kagi din, “Timanem, Pengolo eglowan diyà te kedita te otaw, benal iyan. Ontò neketotok aw metòlid se pegpelumun nikaw.”
In-olà te ikeepat anghil se lipong kidoen te aldaw, aw yan se doun te nekesonog se aldaw te otaw. Tinollonan dan se Timanem simogò te menge kededàtan seini, so ontò meinit se aldaw. Meneng wedà dan pegselsel te medaet ininang dan, aw wedà dan heman duyun kandin.
10 In-olà te ikelima anghil se lipong kidoen te onsedanan te peglowan te menenanap mebolot, aw migkengitngit se peglowan din. Nemangà se menge sakop din te dilà dan tandà te kesakit te kededàtan dimateng kandan. 11 Nenollon dan te Timanem tandà te kesakit aw menge bekokang dan. Meneng wedà dan pegselsel te medaet ininang dan.
12 In-olà te ikeenem anghil se lipong kidoen te dakel wayeg te Yofritis, aw yan neeti se wayeg sìyan aw migkepangkag amon tapay meketagad se baog te peg-okit te menge selotan domateng lekat te lonsod kidoen te eglibtakan te aldaw. 13 Penga niyan, kinità ko heman se telo bosaw ontò medaet, aw iling te bakbak se bawa dan. Limowà se sebad lekat te bahà te nagan, aw limowà se ikedowa lekat te bahà te menenanap mebolot, aw limowà se iketelo lekat te bahà te telekeliwat te kebolalaw i Satanas. 14 Nekeinang se telo bosaw sìyan te menge kepelahan, aw insogò dan i Satanas doton te kedita te selotan te keneyonan, amon megtipon dan te kedita te sondalo, so mato dan diyà te Timanem aw domateng se aldaw te peglowan din diyà te kedita te otaw. 15-16 Yan tinipon te telo bosaw se kedita te selotan aw sondalo dan kidoen te bontod iningedanan Armagidon diyà te kagi te Hebreo. Meneng minikagi se Pengolo, “Na, iling te pegdateng te menenakaw se pegdateng ko, so wedad metaga-taga aw kano. Mèpiya se otaw eked tedogi so megpeliman kanak. Meluba se otaw gayed egpenenaktun so meketagad te pegdateng ko amon eked sikandin keyàyà aw megkità a kandin.”
17 In-olà te ikepito anghil se lipong diyà te kelamag, aw doen timawal kidoen te dakel simbahan te Timanem, aw kidoen te onsedanan te peglowan, kagi din, “Nepenga den se kedita.”
18 Penga niyan, migkilem, aw doen ontò dakel eleg-eg, aw migkilat, aw doen ontò dakel linog. Wedad palos otaw mig-imanman te linog iling kenyan lekat te gebii, so ontò neantag se tanà. 19 Netengà te telo se lonsod sìyan nedengeg, aw nebàtan se kedita te lonsod te keneyonan. Tinoman te Timanem se pakang din tepad te tege Babilonya, aw yan dinetengan dan te keopal din, aw ontò din dan impelumun. 20 Migkewedad se kedita te polò aw kedita heman te bontod. 21 Nedegdagan se otaw te dedakel odan netikbolò aw megenaw, aw keliman kilo se kebegat te teg sebad-sebad kenyan. Nenollon dan te Timanem tandà te kededàtan te dedakel odan netikbolò aw megenaw, so ontò iyan medaet kededàtan.