9
Menge otaw pinemallì te Timanem
1 Nayan, doen den ipetaga-taga ko kenyo seini. Ontò iyan benal, so migpesakop a diyà ki Cristo. Netegahan ko te kenà kebolalaw se kagi ko kenyo seini, so egbeyà-beyaan a te Espiritu Santo. 2 Ibeg ko ketegahan niyo te ontò nelidò se pedowan ko, aw iling te eked a kesinalay, 3 so pengkey kedomaan ko se menge doma Judiyo, meneng wedà dan pa salig diyà ki Cristo. Ibeg ko somelilin a peden kandan aw ipelumun a te Timanem amon ketebangan ko dan. Pegwedaden ko peden heman se pegpesakop ko diyà ki Cristo amon meinang dan menge sakop din. 4 Ontò den dan netebangan, so gebii pinemallì te Timanem se menge bowad-bowad i Israel, aw pigbatà din dan. Sikandan se pinekitaan din te kelangkaw din. Sikandan heman se pinekangan din te tebangan din dan. Sikandan se sineligan din te menge punù ingkeliwat i Moises. Sikandan se tinoledaan din tepad te pegsimba dan kandin. Medita heman se pakang din kandan. 5 Nedengeg se menge kemonaan dan pinemallì din gebii. Pegpekeotaw te Misiyas, timebaw sikandin diyà te kandan pongan. Sikandin se Timanem eglowan diyà te kedita. Iduyun sikandin te wedad temanan. Metoman iyan.
6 Nayan, pengkey doen menge Judiyo wedà salig diyà ki Cristo, meneng eked a ikagi te wedà ketoman te Timanem se pakang din. Kenà kedita te bowad-bowad i Israel se pinemallì te Timanem. 7 Iling heman kenyan, wedà pemellii te Timanem se kedita te menge bowad-bowad i Abraham, so minikagi se Timanem diyà ki Abraham,
“Se menge bowad-bowad te batà no si Isaac, yan olò se eneng-enengen ko te ontò bowad-bowad nikaw.”
8 Pineokit te kagi te Timanem sìyan, impetaga-taga din kenitadon te eked din eneng-enengi te menge batà din se kedita te otaw, so eked eneng-enengi te Timanem te menge batà din se otaw singed aw doen pakang din tepad kandan. 9 Olò sebad se batà i Abraham pinemallì te Timanem, so tapay migpakang se Timanem ki Abraham tepad ki Isaac, kagi din,
“Doen inangen ko metolos te modi omay, so doen batà meama tomebaw diyà te esawa no si Sara.”
10 Doen heman pinemallì te Timanem diyà te didowa batà te kemonaan tadon si Isaac, so tinebawan se esawa din si Rebecca te pingin. 11-12 Pengkey wedà dan pa tebaw, pengkey wedad pa ininang dan mèpiya aw medaet, minikagi se Timanem diyà te inay dan, kagi din,
“Lomowan se modi tomebaw diyà te monà tomebaw.”
Yan pinemallì te Timanem se modi timebaw amon ipetaga-taga din te kenà din egpemellien se otaw tandà te ininang dan mèpiya, meneng egpemellien din se otaw lekat te tod din aw ibeg din, 13 so doen kagi te Timanem insolat,
“Si Jacob se nedekelan ko te pedowan, kenà si Esau.”
14 Nayan, doen besi menge otaw meg-aneng-aneng te medaet se ininang te Timanem so sebad olò se pinemallì din aw wedà din pemellii se doma. Meneng kenà medaet se pegpemallì din kenyan, 15 so minikagi se Timanem diyà ki Moises, kagi din,
“Siak se memallì aw sinu se keidowan ko. Siak se memallì aw sinu se kedekelan ko te pedowan.”
16 Yan netegahan tadon den te kenà egpemellien te Timanem se otaw lekat te ibeg dan aw kepagod dan, meneng lekat te keido te Timanem se pegpemallì din. 17 Insolat se inikagi te Timanem diyà te selotan te Ehipto gebii wedà din keidowi, kagi din,
“Impelowan ko sikona selotan amon ipetaga-taga ko te ontò a metolos pineokit te pegdaeg ko kamno amon medengeg a kidoen te kebelad te keneyonan.”
18 Yan netegahan tadon den te Timanem se egpemallì aw sinu se otaw keidowan din aw sinu se otaw pebeyaan din metugul.
19 Nayan, so Timanem se egpemallì aw sinu se sekopen din, doen besi otaw doton kenyo meg-aneng-aneng te nengà lay ipelumun te Timanem se otaw wedà din pemellii, so eked dan kebatog se megtodà te ibeg te Timanem. 20 Meneng eked kepakay aw somila kidon te Timanem, so olò kidon otaw ininang din. Eked kepakay aw meg-insà se koden diyà te otaw migtiyon kenyan te nengà lay ininang din iyan iling kenyan. 21 Aw meg-inang se otaw te koden, sikandin se memallì aw eden se bawa te koden inangen din. Pengkey sebad olò kumù se tanà, mepakay aw tengaen din iyan, amon inangen din se sebad koden mepalas aw sebad koden wedad palas.
22 Iling heman kenyan se ininang te Timanem, so pengkey keilangan ipelumun din se otaw neopalan din amon ipetaga-taga din te sikandin se ontò melangkaw, meneng tandà te kedalem te pedowan din, wedà din dan tagmon pelumuni. 23 Yan se ininang din amon ipetaga-taga din diyà te kedita tadon neidowan din te ontò sikandin mèpiya, so impetagad kidon din amon begayan kidon din te kèpiyaan doton te langit. 24 Sikitadon se otaw sìyan tinawal te Timanem. Kenà olò menge Judiyo se tinawal din, meneng otaw heman kenà Judiyo. 25 Kidoen te libro insolat i Oseas, doen kagi te Timanem insolat, kagi din,
“Sekopen ko den se menge otaw wedà ko pa sekopi. Kedekelan ko den te pedowan se menge otaw wedà ko pa kedekeli te pedowan. 26 Pengkey doton te ogpeanan te menge otaw nebensihan so kenà dan sakop ko, tewalen dan menge batà te Timanem wedad temanan din.”
27 Seini heman se inikagi i Isaias tepad te menge Judiyo,
“Pengkey megkedita se menge Judiyo igsà eked dan kebilang iling te enay doton te dagat, meneng olò pilabok se mekelowà lekat te pelumun. 28 So domateng se aldaw ayas tomanen te Timanem se kagi din te ontò din ipelumun se otaw dini lanto te tanà.”
29 Iling kenyan se tapay inikagi i Isaias, kagi din,
“Simpana sikitadon menge Judiyo eked keidowi te Timanem Metolos, wedad palos mesamà kenitadon, so tigkan megelà se kedita tadon iling te pegkegelà te tege Sodoma aw tege Gomora.”
Wedà taking se menge Judiyo te peokit ininang te Timanem
30 Nayan, netegahan tadon den ini. Pengkey wedà pegpeliman se menge otaw kenà Judiyo te eneng-enengen te Timanem te metòlid dan, meneng doen den kandan inaneng-aneng din te metòlid dan pineokit te pegsalig dan diyà ki Cristo. 31 Meneng pengkey ontò measeb se menge Judiyo timolò te menge punù ingkeliwat i Moises amon eneng-enengen te Timanem te metòlid dan, meneng wedà dan iyan kebatog. 32 Wedà dan iyan kebatog so wedà dan salig diyà ki Cristo, meneng simalig dan diyà te mèpiya inang dan. So kimulu dan ki Cristo, iling dan te otaw nekedogsò diyà te bato kidoen te dalan. 33 Iling kenyan se kagi te Timanem insolat,
“Isawol ko se otaw doton te lonsod te menge Judiyo iningedanan Sion. Iling sikandin te bato mekebangkil kandan, aw iling te bato kedogsoan dan. Meneng eked palos pekebollog se otaw somalig diyà kandin.”