10
1 Menge kedowa ko, ontò a egkeibeg te mekelowà se menge doma ko Judiyo lekat te salà, aw yan se ipegtawal-tawal ko diyà te Timanem tepad kandan. 2 Netegahan ko te ontò dan measeb tomaking te ketanem pinemenalan dan tepad te Timanem. Meneng wedà dan ketaga-taga te kebenalan. 3 Wedà dan ketegahi te doen peokit ininang te Timanem amon eneng-enengen din te metòlid dan. Yan ininang dan beling se kandan peokit. Meneng wedà eneng-enengi te Timanem te metòlid dan, so wedà dan taking te peokit ininang din. 4 Si Cristo se temanan te menge punù ingkeliwat i Moises. Lekat niyan, eneng-enengen den te Timanem te metòlid se kedita te otaw somalig diyà ki Cristo.
Mepakay aw somalig se kedita te otaw diyà ki Cristo
5 Gebii, simolat si Moises tepad te inangen te menge otaw meibeg eneng-enengen te Timanem te metòlid dan pineokit te pegtolò dan te menge punù ingkeliwat din, kagi din,
“Eneng-enengen te Timanem te metòlid se otaw ontò meketolò te menge punù ingkeliwat ko.”
6 Meneng doen heman kagi te Timanem insolat diyà te kedita tadon inaneng-aneng te Timanem te metòlid kidon pineokit te pegsalig tadon diyà ki Cristo. Pineokit kenyan, netegahan tadon te eked kepakay aw meg-aneng-aneng kidon te keilangan doen pa domoton te langit amon mangay ki Cristo. 7 Eked heman kepakay aw meg-aneng-aneng kidon te keilangan doen pa domoton didalem te tanà amon meg-antay ki Cristo lekat te nematay. 8 Doen heman kagi te Timanem insolat,
“Kidoen kenyo se kagi te Timanem, so yan se egbelaw-belewayen niyo aw eg-eneng-enengen niyo.”
Yan se kagi te Timanem ipegtoladà day te keilangan somalig kidon diyà ki Cristo. 9 Aw mikagi kaw te benal migpesakop kaw den diyà te Pengolo tadon si Jesus, aw memenal kaw te inantay sikandin te Timanem lekat te nematay, yan mekelowà kaw lekat te pelumun te Timanem. 10 Aw melobos se pedowan tadon te pegsalig tadon diyà ki Cristo, yan eneng-enengen te Timanem te metòlid kidon. Aw meg-indan kidon te menge doma otaw te benal simalig kidon den diyà ki Jesu Cristo, yan ipelowà kidon din lekat te pelumun din. 11 Doen kagi te Timanem insolat,
“Eked palos pekebollog se otaw somalig diyà kandin.”
12 Ibeg te Timanem, somalig se kedita te otaw diyà ki Jesu Cristo. Wedad elet diyà te Judiyo aw otaw kenà Judiyo, so olò sebad se Pengolo te kedita tadon. Ontò din egkeidowan se kedita te otaw memoyò te tabang din, 13 so doen kagi te Timanem insolat,
“Mekelowà lekat te salà se kedita te otaw memoyò diyà te Pengolo tadon.”
14 Meneng eked dan pekepemoyò te tabang din singed aw somalig dan diyà kandin. Eked dan pekesalig diyà kandin singed aw menenalan dan te kagi din. Eked dan heman penenalan te kagi din singed aw doen otaw megtoladà kandan. 15 Wedad heman otaw megtoladà kandan singed aw doen isogò doton kandan. Meneng doen den otaw insogò amon megtoladà kandan, so doen insolat kidoen te kagi te Timanem,
“Ontò mèpiya se pegdateng te menge otaw egtoladà te Mèpiya Indan.”
16 Meneng te pegtoladà dan te Mèpiya Indan, pilabok se Judiyo nemenal kenyan, so gebii minikagi se telekeliwat te kagi te Timanem si Isaias,
“E Pengolo ko, wedad nael otaw nemenal te intoladà day.”
17 Yan netegahan tadon te eked pemenal se otaw singed aw menenalan dan te kebenalan. Se kebenalan, yan se ipegtoladà day tepad ki Cristo.
18 Pengkey wedà pemenal se keditaan te Judiyo, meneng ikà niyo eg-aneng-aneng te wedà dan indani te kebenalan. Inindanan den dan, so doen kagi te Timanem insolat,
“Dinineg den iyan te kedita te otaw dini lanto te tanà.
In-indan den iyan doton te kebelad te keneyonan.”
19 Pengkey medita se bowad-bowad i Israel wedà pemenal, meneng ikà niyo eg-aneng-aneng te wedà dan kelebeti se intoladà kandan, so doen kagi te Timanem insolat i Moises gebii, kagi din,
“Tebangan ko se menge otaw kenà Judiyo amon mingà kaw kandan.
Keidowan ko se menge otaw egkebensihan niyo amon meopal kaw.”
20 Labi pa mebangal se kagi te Timanem insolat i Isaias tepad te menge otaw kenà Judiyo, kagi din,
“Kinità a te menge otaw wedà pengemahà kanak.
Pengkey wedà dan peg-insà tepad kanak, meneng migpekità a den diyà kandan.”
21 Doen heman kagi te Timanem insolat i Isaias tepad te menge Judiyo, kagi din,
“Pengkey gayed a egtawal kandan amon megpedapag dan diyà kanak, meneng kenà dan egtolò so metugul dan.”