27
Gyangŋan mǝnana amur Nkono Ebal ka
1 Musa andǝ aɓwana-mǝgule mala amǝ Isǝrayila banggi aɓwe ama, <<Wu bwal anzongcau mǝnana kat ǝn nggǝ pà wun yalung ngga. 2 *27:2 Ɓalli gbal aɓa: Jes 8:30-32. Nǝ̀ do ama pwari mǝnana wu yàlǝ́nì nkaring Nggeasala Jodan aban ká a nzali mǝnana Yahweh Ɓakuli ma'wun kǝ pà wun ngga, wun nǝ̀ tàmsǝkì ɓamurǝ wun atali mǝgulke sǝ wun nǝ̀ tasǝ rǝia nǝ nshime-pwasǝa. 3 Wun nǝ̀ gilǝ acau mala mǝnia yì nggurcau kat ka amúrià, lang wu yàlnà a nkaring ace ká kutio aɓa nzali mǝnana Yahweh Ɓakuli ma'wun kǝ pa wun ngga, yì nzali mana kiura andǝ mur'nyi kǝ ɓang kàm, kǝla mǝnana Yahweh, yì Ɓakuli mala aká wun pa wun cau ace ka. 4 Sǝ lang wu yàlnà a nkaring Jodan ngga, wun nǝ̀ tamsǝki amǝnia yì atali, mana ǝn nggǝ pà wun nzongcau amúrià yalung ngga, amúr Nkono Ebal, sǝ wun nǝ̀ tasǝ rǝia nǝ nshime-pwasǝa. 5 †27:5 Ɓalli gbal aɓa: Pur 20:25Abanì ka wun nǝ̀ ɓakkî Yahweh Ɓakuli ma'wun gyangŋan, gyangŋan mǝnana à pè nǝ atali ka. Pà wun nǝ̀ pàktúró nǝ tali mǝnana à ɓunni ko à gilǝki rǝi nǝ girtúró mala bolo-candǝa ace ɓak gyangŋanì ɗàng. 6 Wun nǝ̀ ɓak gyangŋan mala Yahweh Ɓakuli ma'wun nǝ atali mǝnana à ɓunnia nǝ ɓunno ko à gilǝki rǝia raka, sǝ wun nǝ̀ pà ɓoro mǝnana à nǝ̀ pisǝi kǝring a bǝsa ka amurí aban Yahweh Ɓakuli ma'wun. 7 Wun nǝ̀ pa aɓoro mala gir'nkila ace dotarǝu, wun nǝ̀ lì, sǝ wun nǝ̀ pak bumpwasǝa aɓadǝm Yahweh Ɓakuli ma'wun. 8 Sǝ wun nǝ̀ gilǝ acau mala nggurcau mǝnia kat ka ɓǝà pur pepè amúr amǝnia yì atali ka.>>
9 Pǝlǝa Musa andǝ apǝris amǝkà Lawi bangcau nǝ amǝ Isǝrayila kat ama, <<Wu duk ɗǝong sǝ wu kwakikir wun, wun amǝ Isǝrayila! Yalung ngga wu dumǝna aɓwana mala Yahweh Ɓakuli ma'wun. 10 Acemani ka, wun nǝ̀ ok gi Yahweh Ɓakuli ma'wun sǝ wun nǝ̀ kpata anzongcau male andǝ ngguracau male, mǝnana ǝn nggǝ pa wun yalung ngga.>>
Asúban a Nkono Ebal
11 A kǝ pwari mǝno, Musa kwarkir aɓwe ama, 12 <<Anzǝm mana wu yàlǝ́nì Nggeasala Jodan ngga, atau mala Shimiyon, andǝ Lawi, andǝ Yahuda, andǝ Isaka, andǝ Yisǝfu, andǝ Benjami ngga à nǝ̀ cam amur Nkono Gerizim, sǝ à nǝ̀ ham atsǝkbu mala Yahweh amur aɓwana.‡27:12 Ɓalli gbal aɓa: Nggur 11:29; Jes 8:33-35. 13 Sǝ atau mala Ruben, andǝ Gad, andǝ Asha, andǝ Zebulu andǝ Dan andǝ Naftali na à nǝ̀ cam amur Nkono Ebal à nǝ̀ kwakikiria arǝ asúban mana à nǝ̀ hambia ka. 14 Sǝ aburana a tàu mala Lawi nǝ̀ loasǝ gia a kùli à nǝ̀ banggi amǝ Isǝrayila ama:
15 <<Suban na amur ɓwa mǝnana pàk ɓekǝ ɓǝ̀nzál nǝ tali, ko nggun, ko bolo-ntùl, nǝ túróbù mala amǝ'sǝlǝ pakkiagir, mana gìr'ɓeami na aban Yahweh, sǝ tsǝì kǝ peri abani aɓa sǝmbǝrǝa ka.§27:15 Ɓalli gbal aɓa: Pur 20:4; 34:17; Pǝris 19:4; 26:1; Nggur 4:15-18; 5:8.
<<Sǝ aɓwe kat nǝ̀ ear ama, <Ɓǝ̀ do anggo!>
16 <<Suban na amur ɓwa mǝnana pé tárrí andǝ nggé gulo raka.*27:16 Ɓalli gbal aɓa: Pur 20:12; Nggur 5:16.
<<Sǝ aɓwe kat nǝ̀ ear ama, <Ɓǝ̀ do anggo!>
17 <<Suban na amur ɓwa mǝnana tusǝ nzong-nzali mala ɓì mǝmurkala ka.†27:17 Ɓalli gbal aɓa: Nggur 19:14.
<<Sǝ aɓwe kat nǝ̀ ear ama, <Ɓǝ̀ do anggo!>
18 <<Suban na amur ɓwa mǝnana ɓosǝkikusǝ nte ɓǝ̀ kyanggî njar ka.‡27:18 Ɓalli gbal aɓa: Pǝris 19:14.
<<Sǝ aɓwe kat nǝ̀ ear ama, <Ɓǝ̀ do anggo!>
19 <<Suban na amur ɓwa mǝnana pūrǝ ɓashi-mǝsǝcau mala bǝri, ko mala káwá, ko mala mā-lú ka.§27:19 Ɓalli gbal aɓa: Pur 22:21; 23:9; Pǝris 19:33-34; Nggur 24:17-18.
<<Sǝ aɓwe kat nǝ̀ ear ama, <Ɓǝ̀ do anggo!>
20 <<Suban na amur ɓwa mǝnana nongnǝ mālá tárrí ka; acemǝnana gusǝlǝce ban-nongŋo mala tárrí ɗàng.*27:20 Ɓalli gbal aɓa: Pǝris 18:8; 20:11; Nggur 22:30.
<<Sǝ aɓwe kat nǝ̀ ear ama, <Ɓǝ̀ do anggo!>
21 <<Suban na amur ɓwa mǝnana eau girkusǝu ka.†27:21 Ɓalli gbal aɓa: Pur 22:19; Pǝris 18:23; 20:15.
<<Sǝ aɓwe kat nǝ̀ ear ama, <Ɓǝ̀ do anggo!>
22 <<Suban na amur ɓwa mǝnana nongnǝ mǝ'nggaule mǝnana tárrí nǝ̀ ɓǝli ko nggè nǝ̀ ɓǝli ka.‡27:22 Ɓalli gbal aɓa: Pǝris 18:9; 20:17.
<<Sǝ aɓwe kat nǝ̀ ear ama, <Ɓǝ̀ do anggo!>
23 <<Suban na amur ɓwa mǝnana nongnǝ nkili-mǝɓwame ka.§27:23 Ɓalli gbal aɓa: Pǝris 18:17; 20:14.
<<Sǝ aɓwe kat nǝ̀ ear ama, <Ɓǝ̀ do anggo!>
24 <<Suban na amur ɓwa mǝnana wal-lú ɓi mǝmurkala aɓa sǝmbǝrǝa ka.
<<Sǝ aɓwe kat nǝ̀ ear ama, <Ɓǝ̀ do anggo!>
25 <<Suban na amur ɓwa mǝnana eare ak pàbunǝnzali ace wal-lú mǝ'kunpwasǝa ka.
<<Sǝ aɓwe kat nǝ̀ ear ama, <Ɓǝ̀ do anggo!>
26 <<Suban na amur ɓwa mǝnana ginǝe pà nǝ̀ kpata acau mala mǝnia yì nggurcau nǝ̀ pea raka.*27:26 Ɓalli gbal aɓa: Gal 3:10
<<Sǝ aɓwe kat nǝ̀ ear ama, <Ɓǝ̀ do anggo!> >>
*27:2 27:2 Ɓalli gbal aɓa: Jes 8:30-32.
†27:5 27:5 Ɓalli gbal aɓa: Pur 20:25
‡27:12 27:12 Ɓalli gbal aɓa: Nggur 11:29; Jes 8:33-35.
§27:15 27:15 Ɓalli gbal aɓa: Pur 20:4; 34:17; Pǝris 19:4; 26:1; Nggur 4:15-18; 5:8.
*27:16 27:16 Ɓalli gbal aɓa: Pur 20:12; Nggur 5:16.
†27:17 27:17 Ɓalli gbal aɓa: Nggur 19:14.
‡27:18 27:18 Ɓalli gbal aɓa: Pǝris 19:14.
§27:19 27:19 Ɓalli gbal aɓa: Pur 22:21; 23:9; Pǝris 19:33-34; Nggur 24:17-18.
*27:20 27:20 Ɓalli gbal aɓa: Pǝris 18:8; 20:11; Nggur 22:30.
†27:21 27:21 Ɓalli gbal aɓa: Pur 22:19; Pǝris 18:23; 20:15.
‡27:22 27:22 Ɓalli gbal aɓa: Pǝris 18:9; 20:17.
§27:23 27:23 Ɓalli gbal aɓa: Pǝris 18:17; 20:14.
*27:26 27:26 Ɓalli gbal aɓa: Gal 3:10