33
Tsǝkbu mala Musa amur Isǝrayila
1 Mǝnia ka, nda tsǝkbu mana Musa, yì ɓwa mala Ɓakuli, bang amur amǝ Isǝrayila sǝ paklú ka. 2 Bang ama:
Yahweh pur nǝban Saina;
lo kǝla pwari amur Edom,
sǝ tǎ amur aɓwana male nǝ njarban Nkono Paran;
amǝturonjar á-lum yiu atè,
nǝ bǝsa mǝ'earke atà buì mǝlì.
3 Nǝ mǝsǝcau, Yahweh kǝ lǝmdǝì aɓwana male earcearǝu;
amǝfele male kat ka à nda a ɓabuì.
Acemani ka, yià kat à kǝ twalkusǝo,
sǝ nǝbano sǝ à kǝ kum kanigir,
4 yì nggurcau mana Musa pà sǝm,
mǝnana nda girkuma mala ɓwabundǝa mala Yakupu ka.
5 Yahweh yi duk murǝm amur Jesǝrun,*33:5 Jesǝrun ko aɓwana male, amǝ Isǝrayila.
lang aɓwana-mǝgule andǝ atau mala Isǝrayila kat
yi ram rǝia abanɓwáná ka.
6 Nying tàu mala Ruben ɓǝ̀ auwa, ɓǝ̀ kǝa wù ɗàng, sǝama aburana male ɓǝà ue kpokyak.†33:6 Sǝni aɓa: Tite 49:3-4; Akas 5:15-16.
7 Sǝ amur tàu mala Yahuda ka bang ama:
We Yahweh, ok ɓua mala Yahuda, sǝ wu yinǝi ɓǝ̀ kùtí aɓalǝ aɓwana male.
Kat andǝ amani ama, nǝ abui sǝ kǝ munǝo ace ɓamúrì ka,
awu nǝ bwali wi kàm arǝ aɓimǝbura!
8 Amur tàu mala Lawi ka, bang ama:
Tummim mò andǝ Urim mò‡33:8 Tummim mò andǝ Urim mò ka nda dobuno-pǝris, ko agir mǝnana apǝris pàngŋǝ̀nà-túró nǝia ace kum eare mana à alte aban Ɓakuli ka. ka, amala Lawi, ɓwa mǝɓafoe mò na,
mǝnana a mwami a Massa,
a nungirǝu wunǝi a máɗí-mùr mala Meriba ka.§33:8 Ɓalli aɓa: Pur 17:1-7; Ɓal 20:2-13; Nggur 6:16; 9:22; Ang 95:8.
9 Yì ka nacau amur tárrí andǝ ngge ama,
<<Yàle, ǝn dǝmbǝricea ɗàng.>>
Pǝlǝa lǝmdǝ ama, súrǝ̀ amǝ'eambi ɗàng, sǝ amuna male ka, būrǝcea.
Sǝama, bwal cau mò,
sǝ tsǝkiri arǝ yál kùrcau mò.
10 Yi ka, nǝ̀ kanî Yakupu anzongcau mò,
sǝ nǝ̀ kanî amǝ Isǝrayila anggurcau mò.
Nǝ̀ yinǝ pàgir mala pisǝ muku-gìr loasǝ yele mǝ'rǝmɓoarne a ɓadǝmbo,
andǝ apagir mala pisǝe kǝring amur gyangŋan mò.
11 We Yahweh, tsǝkbuo amur sǝlǝpe male,
sǝ wu ak túróbù male.
Ɓungi ankpakota aɓimǝbura andǝ mala amǝ'ɓinǝmúrí
ace mǝnana ɓǝà kǝa gandǝ lo ɗǝm raka.
12 Amur tàu mala Benjami ka, bang ama:
Ɓwa mǝnana Yahweh earkiyi ace raka, ɓǝ̀ do a nkanggari aɓata yalban male.
Acemǝnana Yahweh kǝ pu amurí koya bu-pwari ka,
a nkpamtar Yahweh sǝ kǝ usǝlǝo.
13 Amur tàu mala Yisǝfu ka, bang ama:
Ɓǝ̀ Yahweh tsǝkî nzali male bù nǝ aɓoro mǝɓoarne kat-kat mala kùli,
mala ncimna, andǝ mala amúr mǝlime mǝnana à nong atà nzali ka;
14 andǝ mala aɓoro mǝɓoarne kat-kat mǝnana pwari yikiyinǝi ka, yì aɓǝlagir,
andǝ mala aɓoro mǝɓoarne kat-kat mǝnana koya zongŋo kǝ pusǝ ka;
15 andǝ agir mǝɓoarne kat-kat mala ankono share-ɓanza,
andǝ mala ɓoro mǝɓoarne kat-kat mala amgbang-ban mala anza ɓara-ɓara;*33:15 Ɓalli gbal aɓa: Tite 49:26; Hab 3:6.
16 andǝ mala aɓoro mǝɓoarne kat-kat mala nzali,
andǝ agir mǝnana kat aɓalǝi ka;
andǝ dǝmcauwa mala ɓwa mǝnana ndanǝdo†33:16 ndanǝdo ko pusǝrǝi aɓa nkwarki‡33:16 nkwarki: nkwarki mana kǝ earki bǝsa à bangce aɓa Pur 3:3-4 ka. ka.
Agir mǝnia kat ka, ɓǝà yiu amur Yisǝfu,
a kún-múr ɓwa mǝnana à tàrì-ɗàng aɓalǝ amǝ'eambi ka.
17 Aɓa ɓoarɓwa ka, nda kǝla muna-dǝmba jamnda;
anjawe ka, anjawe ndwakan na.
Nǝ amǝnia yì anjawe ka, nǝ̀ tulki aɓwapǝndǝa mala anzali, yia kat,
sǝ nǝ̀ ramtea aban ká arǝ masǝlǝata abân mala ɓanza.
Mǝnia ka, nda tsǝkbu mem amur aɓwabundǝa mala Ifǝrem
andǝ á-pas mala aɓwana mala Manasa.
18 Amur tàu mala Zebulu ka, bang ama:
Pak banɓoarnado, we Zebulu, aɓa purgya mô,
sǝ we Isaka ka, aɓalǝ agumli mô.
19 À nǝ̀ tunǝ aɓwapǝndǝa ɓǝà yiu a nkono malea;
akano ka, à nǝ̀ pà agir'nkila mala docauɓoarna;
à nǝ̀ nun gǝna nǝɓa nyakǝti mǝnana aɓalǝ anggeamùr ka,
andǝ agir-ɓoarna mǝnana à sǝmbǝrǝa aɓa sala ka.§33:19 Ɓalli gbal aɓa: Tite 49:13; Akas 5:15,18.
20 Amur tàu mala Gad ka, bang ama:
Ɓwangsǝban ɓǝ̀ pa aban Ɓakuli mana kǝ tangsǝ nzong-nzali mala Gad ka!
Gad kǝ kumsǝo kǝla im,
ace san bù andǝ nggu-ɓamuru.
21 Tàr nzali nggea-mǝɓoarne ace ɓamúrì.
Sǝ lang aɓwana-mǝgule mala atau mala Isǝrayila yi ram ngga,
à ear ama kāmbe nzali mǝnana nda ace mǝyál-múrú ka,
ɓǝà tàrì ɓǝ̀ duk mala tàu mala Gad.
Tàu mala Gad ka kpata nzongcau mala Yahweh
sǝ pak agir mǝnana Yahweh kasǝa ama amǝ Isǝrayila ɓǝà pea ka.
22 Amur tàu mala Dan ngga, bang ama:
Dan ngga, muna im na,
mana kǝ yalki nǝɓa Bashan ngga.
23 Amur tàu mala Naftali ka, bang ama:
Naftali ka, ndanǝ kume kǝ̀rkǝ́r mala earmúrú mala Yahweh,
sǝ lùmsǝ nǝ tsǝkbu male;
yi ka, nǝ kum liɓala mala ban njar-nzali andǝ njar-kunmur.
24 Sǝ amur tàu mala Asha ka, bang ama:
Ɓwa mǝnana kútì amuna-burana kat nǝ tsǝkbu ka, nda Asha;
wu ɗeki ɓǝ̀ kum dǝmcauwa aban amǝ'eambi,
sǝ ɓǝà ɗeki ɓǝ̀ lim kusǝi aɓa mùrú.
25 Kún nggea-là male ka ɓǝà yalí nǝ bolo-candǝa andǝ bolo-bángŋá,
sǝ kǝla mana anonggio mala yilǝmi pak ka,
anggo sǝ rǝcandǝa male ɓǝ̀ pa.
26 Kǝ ɓwa pa kam kǝla Ɓakuli mala Jesǝrun ɗàng,
mana kǝ san bumkuli ace yiu a bwalo kàm,
sǝ kǝ yàl amur apǝrɓang aɓa ɓoarɓwa male ka.
27 Ɓakuli mala share-ɓanza ka, nda npù mò.
Sǝ anggwarbui mana à ndakam tàtǝ́k ka, à nǝ̀ mbalio.
Yì ka, nǝ̀ pǝr aɓio amǝbura a ɓadǝmbo,
sǝ nǝ̀ nggǝ bang ama, <<Wu twaltea!>>
28 Anggo sǝ Isǝrayila nǝ̀ do aɓa rǝpwala;
sǝ Yakupu ka, nǝ̀ do kǝɓwa pà nǝ̀ zunggǝli ɗàng,
aɓa nzali mala mǝsǝsa andǝ bǝsa mùr-anap,
yì ban mǝnana bumkuli kǝ nya ncimna ka.
29 Bumpwasǝa mô ka nda kpǝm, We Isǝrayila!
Yan ɗe kǝla we, wun aɓwana mana Yahweh amsǝ wun ngga?
Yi ka, nda ntwangŋo mana kǝ pa wun gbasha,
andǝ nggeabyau mala jali ma'wun.
Aɓiwun-amǝbura nǝ̀ ɓun aɓadǝm wun,
sǝ wun nǝ̀ parkia a nzǝmia.
*33:5 33:5 Jesǝrun ko aɓwana male, amǝ Isǝrayila.
†33:6 33:6 Sǝni aɓa: Tite 49:3-4; Akas 5:15-16.
‡33:8 33:8 Tummim mò andǝ Urim mò ka nda dobuno-pǝris, ko agir mǝnana apǝris pàngŋǝ̀nà-túró nǝia ace kum eare mana à alte aban Ɓakuli ka.
§33:8 33:8 Ɓalli aɓa: Pur 17:1-7; Ɓal 20:2-13; Nggur 6:16; 9:22; Ang 95:8.
*33:15 33:15 Ɓalli gbal aɓa: Tite 49:26; Hab 3:6.
†33:16 33:16 ndanǝdo ko pusǝrǝi
‡33:16 33:16 nkwarki: nkwarki mana kǝ earki bǝsa à bangce aɓa Pur 3:3-4 ka.
§33:19 33:19 Ɓalli gbal aɓa: Tite 49:13; Akas 5:15,18.