4
Shetan kārǝki Yesu
(Markus 1:12-13; Luka 4:1-13)
1 Pǝlǝa Bangŋo Mǝfele loasǝ Yesu um nǝi aɓa pǝɗanban a ɓabondo ace mǝnana Shaitan ɓǝ̀ kya kārǝki ka.*4:1 Ɓalli gbal aɓa: Ib 2:18; 4:15. 2 Sǝ lang Yesu gilnamur pwari lumi-ine andǝ du lumi-ine ka, nzala wali kǝ̀rkǝ́r. 3 Mǝkārǝkiban pǝlǝa yiu a baní sǝ ne wi ama, <<Ɓǝ̀ a nda muna mala Ɓakuli ka, banggi atali mǝnia ɓǝà pǝlǝ nɗǝmo.>>
4 Sǝ Yesu nyesǝi wi ama, <<À gilǝ a Malǝmce mala Ɓakuli ama:
<< <Girlina nda nǝmurǝì
tsǝkiyi ɓwa sǝ nǝ̀ dum
nǝ yilǝmu ka ɗàng.
Nda andǝ cau mǝnana
kat kǝ pur a kun Ɓakuli ka.>†4:4 Ɓalli gbal aɓa: Nggur 8:3. >>
5 Pǝlǝa Shetan wari nǝ Yesu aɓa Urǝshalima nggea-là mǝfele, sǝ kya tamsǝi a ɓong Ndàmǝgule mala Ɓakuli, 6 sǝ ne wi ama, <<Ɓǝ̀ a nda Muna mala Ɓakuli ka ta zurro a nzali! Acemǝnana à gilǝ aɓa Malǝmce mala Ɓakuli ama,
<< <Ɓakuli nǝ̀ tsǝk amǝturonjar
male ɓǝ̀a tsǝkiro.
À nǝ̀ eo a ɓabuia,
ace mǝnana wu kǝa
tul kusǝo arǝ tali raka.>‡4:6 Ɓalli gbal aɓa: Ang 91:11,12. >>
7 Sǝ Yesu pǝlǝi wi ama, <<Malǝmce mala Ɓakuli bang gbal ama,
<< <Ce a kārǝki Mǝtalabangŋo
Ɓakuli mo ɗang.>§4:7 Ɓalli gbal aɓa: Nggur 6:16. >>
8 Shetan nyar ɗǝm wari nǝ Yesu a ɓong ɓekǝ nkono nggea mǝ'dāhre, pǝlǝa lǝmdǝki wi ala-murǝm mǝnana kat a ɓanza ka andǝ gulo andǝ gǝna mǝnana aɓalǝia ka kat. 9 Sǝ ne wi ama, <<Ɓǝ̀ awu nǝ ɓun a ɓadǝmbam sǝ a nǝ peri a banam ngga, mǝ nǝ po amǝnia yì agir ka kat.>>
10 Yesu ne wi ama, <<Shetan, upi banam! Malǝmce mala Ɓakuli ka na ama,
<< <Peri a ban Mǝtalabangŋo
Ɓakuli mo,
Kǝ yì mwashat ɓǝ̀rɓǝ̀r na
a nǝ kpate ka.> >>*4:10 Ɓalli gbal aɓa: Nggur 6:13.
11 Nda sǝ Shetan ɗekina Yesu ka, sǝ amǝturonjar yiu à yì bwalì wi kàm.
Tita túró mala Yesu a Galili
(Markus 1:14-15; Luka 4:14-15)
12 Lang Yesu ongŋǝna ama murǝm Hirǝdus Antipas kùrna Yohana a ndàkurban ngga, lo ɗeki nzali Yahudi o a bu-nzali Galili. 13 Banì sau a Nazarat ɗang, tùro kya do a Kapanahum, a kun Garang Galili a buì mala amǝ Zebulu andǝ amǝ Naftali. 14 Mǝnia ka pa anggo ace mǝnana ɓǝà lùmsǝ cau mana pur a kun Ishaya mǝɓangnǝa mala Ɓakuli ka ama:
15 <<Wu kwaki kir wun,
wun amǝ nzali Zebulu
andǝ Naftali.
Wun aɓwana mǝnana
wu do amur njargula ká
a kun Garang,
a nkaring Mur Jodan ngga.
Wu kwaki kir wun,
wun amǝ Galili,
la mala aɓwana mana
amǝ Yahudi na raka.
16 Aɓwana mǝnana
à do a pǝndǝa ka,
à sǝna tǎlaban mǝgule.
Yì aɓwana mǝnana
à do a yinggǝli lú ka,
tǎlaban sulǝna a bania.>>†4:16 Ɓalli gbal aɓa: Isha 9:1,2.
17 Lo a bàkú mǝno ka Yesu tita hamnǝ cau, kǝ na ama, <<Wu pwanzali, wu pǝlǝ nzǝm wun arǝ acauɓikea ma'wun, acemǝnana Domurǝm mala kùli gbashìnà.>>
Yesu tunǝ amǝkpate amǝdǝmbe
(Markus 1:16-20; Luka 5:1-11)
18 Yesu na ban gya a kun Garang Galili, sǝ mǝsǝì kpa arǝ aɓwana ɓari amǝ'eambǝu, Shiman mǝnana à tunǝki ama Bitǝrus ka andǝ mǝ'eambi Andǝru. À nda ban taula nǝ ndámbú aɓa Garang ace mǝnana yia ka bwal-nji nda túró malea. 19 Yesu nea wia ama, <<Wu yiu a tam, mǝ nǝ tsǝk wun, wu nǝ̀ pǝlǝ amǝ oari aɓwana acem.>> 20 À lo tù à nying andámbú malea sǝ à o atè.
21 Yesu nggǝ ká a dǝmba ka, yi sǝn aɓea amǝ'eambǝu ɓari ɗǝm, Jemis muna mala Zabadi andǝ mǝ'eambi Yohana. À nda ɓá waru andǝ tárrià Zabadi. À nda ban taliki andámbú malea. Pǝlǝa Yesu tunǝia. 22 À lo à fwa rǝia à nying waru andǝ tárrià sǝ à o atè.
Yesu kanigir sǝ twali
aɓwana ban rǝkwana
aɓwana ban rǝkwana
(Luka 6:17-19)
23 Yesu gya aɓa nzali Galili kat kǝ kanigir aɓalǝ andakpapi mala amǝ Yahudi, sǝ kǝ hamnǝ Cau Amsǝban mala Domurǝm mala Ɓakuli amur aɓwana. Twalî aɓwana ban ambalang arǝpangŋa andǝ akwánó kat. 24 Cau male gya akiban aɓa bu-nzali Suriya kat. À yinǝi wi nǝ amǝkwánó ɗàngɗáng: a mǝnana à nda ɓá rǝkwana kǝ̀rkǝ́r, andǝ a mǝnana akukwar kutia rǝia, andǝ a mǝnana à ndanǝ kwánó wukiaban, andǝ a mǝnana ɓekǝ barea wu ka, yi twalia wia ban akwánó malea kat. 25 Ɓwabunda pas mǝnana à pur a bu-nzali Galili, andǝ Dekapolis‡4:25 Dekapolis: Ko <<ala lum.>> ka, à pu atà Yesu. Aɓea gbal ka à purkio arǝ anggea-là Urǝshalima, andǝ mala acili abu-nzali mala amǝ Yahudi andǝ aban mǝnana a nkaring Nggeasala Jodan ngga, kat à o atè.