Mbula-Bwazza Matiu 5

Yesu eau amur nkono
sǝ kanigir

(Luka 6:20-23)

1 Lang Yesu sǝn làkkì mala ɓwabundǝa ka, kya eauwe do a bum nkono. Alaggana male yiu a baní, 2 sǝ tita kania wia gìr ama:

3 Aɓwana mǝnana à sǝlǝ ama

yia ka amǝ'tǝ̀r na

aɓa bangŋo ka,

à ndanǝ tsǝkbu mala Ɓakuli,

acemana Domurǝm mala

kùli ka malea na.

4 Amǝ bumkiɗikea ka

à ndanǝ tsǝkbu mala Ɓakuli,

acemǝnana à nǝ̀ kum

girikiban.*

5 Amǝ nongsǝmúrû ka

à ndanǝ tsǝkbu mala Ɓakuli,

acemǝnana à nǝ̀ li ɓanza.†

6 Aɓwana mǝnana à

dum nǝ nzala

andǝ mǝsamur mala

cauɓoarna a bumia ka,

à ndanǝ tsǝkbu mala Ɓakuli,

acemǝnana à nǝ̀ kum

ɗǝmsǝban.‡

7 Amǝ sǝn mǝsǝswatǝr ka

à ndanǝ tsǝkbu mala Ɓakuli,

acemǝnana à nǝ̀ sǝn

mǝsǝswatǝr malea.

8 Amǝ ɓabum mǝɓoarnsari ka

à ndanǝ tsǝkbu mala Ɓakuli,

acemǝnana à nǝ̀ sǝn Ɓakuli.§

9 Amǝ gilǝki dotarǝu ka

à ndanǝ tsǝkbu mala Ɓakuli,

acemǝnana à nǝ̀ duk

amuna mala Ɓakuli.

10 Aɓwana mǝnana à kǝ

pea wia tanni

ace cauɓoarna ka,

à ndanǝ tsǝkbu mala Ɓakuli,

acemǝnana Domurǝm

mala kùli ka malea na.

11 Wu ndanǝ tsǝkbu mala Ɓakuli yi mǝnana aɓwana kǝ sáng wun, à kǝ pa wun tanni, à kǝ tsǝka wun acau mǝɓike ɗàngɗáng arǝ wun aɓa nyir, acemǝnana wu nda ka amǝkpatam ngga. 12 Wu pak bumpwasǝa, ban ɓǝ ɓoara wun, acemǝnana tangnakusǝ wun ngga mǝgule na a kùli. Anggo sǝ à pe amǝ'ɓangnǝa mala Ɓakuli mǝnana à akà wun dǝmba ka tanni.*

Tuɓamur andǝ tǎlaban
mala ɓanza

(Markus 9:50; Luka 14:34-35)

13 Wu nda ka tuɓamur mala ɓanza. Sǝ ɓǝ̀ tuɓamur ɗwanyi cyauwe male ka mana gir ni nǝ̀ tsǝì sǝ nǝ̀ cyau ɗǝm? Panǝ ɓoaro ɗǝm ɗàng; à nǝ̀ sukki aɓwana nǝ̀ parki a ɓakusǝia.†

14 Wu nda ka tǎlaban mala ɓanza. Nggea-là mǝnana à ɓè amur tali ka pà nǝ̀ sǝmbǝrǝ ɗang.‡ 15 À pà nǝ̀ tsǝk bǝsa a pitǝla sǝ à nǝ̀ kùmsǝî wi nkenye amurí ɗàng. A kun mani ka à nǝ̀ tamsǝi amur gir-tamsǝ pitǝla, a ban mǝnana nǝ̀ pa tǎlaban a ban aɓwana kat a ɓala ka.§ 16 Anggo sǝ wun nǝ̀ nying tǎlaban ma'wun ɓǝ̀ ta a ɓadǝmbǝ aɓwana ace mǝnana ɓǝà sǝn atúró ɓoarna ma'wun, sǝ ɓǝà gusǝlǝ Tár wun mana a kùli ka.*

Nggurcau mala Musa

17 Wu kǝa twali ama ǝn yiu ace tamsǝ Nggurcau mala Musa andǝ kanigir mala amǝ'ɓangnǝa mala Ɓakuli ɗang; ǝn yiu ace tamsǝia ɗang. Nda ace lùmsǝia. 18 Ən nggǝ na wun mǝsǝcau, ɓǝ̀ kùli andǝ nzali ka tea mal raka, kǝ muna-cau pà kàm, sǝ ɓè kǝgìr bǝti pà kàm aɓa Nggurcau mala Musa mǝnana nǝ̀ ndǝrmi ka ɗàng, she ɓǝ̀ nê malea kat lùmsǝ̀nà ka.† 19 Ɓǝ̀ yana kat sǝ yàllî nzong mǝkyauwe mwashat aɓalǝ amǝnia yì anzongcau, sǝ kǝ kani aɓwana ama ɓǝà pa kǝla yì ka, nǝ̀ nggá duk rítǎu aɓa Domurǝm mala kùli. Sǝ ɓwa mǝnana kǝ kpata amǝnia yì anzongcau, sǝ kǝ kani aɓwana ama ɓǝà pa kǝla yì ka, nǝ̀ nggá duk ɓwamǝgule a Domurǝm mala kùli. 20 Ən nggǝ na wun ama ɓǝ̀ ɓealɓoarna ma'wun kútì mala amǝ Farisi andǝ amǝkani Nggurcau mala Musa raka,‡wu pà wu nǝ̀ kum kutio aɓa Domurǝm mala kùli ɗang ko bǝti.

Yesu kanigir amur bumlulla

(Luka 12:57-59)

21 Wu ongŋǝna à banggi aɓwana mǝnana a pwarian ngga ama, <<A pà wu nǝ́ wal-lú ɗang; ɓwa mǝnana wal-lú ka à nǝ̀ pakki wi ɓashi.>>§ 22 Sǝ mim ngga ǝn nggǝ na wun ama ɓwa mǝnana bumi lúllô arǝ ɓi ka à nǝ̀ pakki wi ɓashi. Sǝ ɗǝm ngga à bang ama ɓwa mǝnana tunǝî ɓì ɓwaɓana ka à nǝ̀ kánǝi aban amǝ'ɓashi. Sǝ mim ngga ǝn nggǝ na wun ama ɓǝ̀ a ne ɓwa ama <<We ɓwazalǝa>> ka, a nda ɓá ká tanni mala ɓashi lú-bǝsa.

23 Ɓǝ̀ a ndarǝ pa ɓoro mo a ban gyangŋan-peri sǝ ɓālǝo kasǝa ama ɓè kǝɓwa na kam ndanǝ cau a bumi arǝò ka, 24 nying ɓoro mô aɓadǝm gyangŋan, nyare kya gilǝki cê wunǝ ɓwe peatu, sǝ wu yi pa ɓoro mô.

25 Ɓǝ̀ kǝɓwa wulio ka, gbara gilǝki nre wun wunǝi a njar aban ká ndaɓashi. Ɓǝ̀ a na raka, nǝ̀ nggá kpapio wunǝ mǝ'ɓashi, sǝ mǝ'ɓashi ka nǝ̀ tasǝo a bu amǝ'munagara, sǝ à nǝ̀ nggá oasǝo a ndàkurban. 26 Ən nggǝ no mǝsǝcau a pa nǝ́ purî nggúr ɗang sheɓǝ̀ a mbwena gìr mǝnana kat à kàsǝô ka.

Kànìgìr mala Yesu amur
cauɓikea nongnǝban mǝnana pa aɓa alban raka

27 Wu ongŋǝna à bang ama <<A pà wunǝ nongnǝ ɓwa mǝnana wu al rǝ wun wunǝi raka ɗàng.>>*

28 Sǝ mim ngga ǝn nggǝ na wun ama ɓwa mǝnana kat sǝn ɓwama nǝ sǝnban nshawari ka, angŋǝna dǝmba nongŋǝna nǝi a ɓabumi. 29 Ɓǝ̀ mǝsǝo mǝlì kǝ tsǝo a kǝ pak cauɓikea ka, pusǝì túrí. Kǝpǝna wu ɗwanyi ɓekǝ bareo mwashat amur mǝnana ɓǝà túr nggūrǝo kat aɓa tūli-bǝsa ka.† 30 Sǝ ɓǝ̀ buo mǝlì kǝ tsǝo a kǝ pak cauɓikea ka, kasǝi túrí. Kǝpǝna wu ɗwanyi ɓekǝ bareo mwashat amur mǝnana ɓǝà túr nggūrǝo kat aɓa tūli-bǝsa ka.‡

Yesu kanigir amur
gau doɓala

(Matiu 19:9; Markus 10:11-12; Luka 16:18)

31 Ɗǝm ngga à bang ama, <<Ɓǝ̀ ɓwa nǝ̀ gau andǝ māmí ka, dumǝna púp nǝ̀ pè wi takada gauwa.>>§ 32 Sǝ mim ngga ǝn nggǝ na wun ama ɓwa mǝnana pǝr māmí, sǝ pa ace cauɓikea mala nongnǝban a nza nǝ́ doɓala raka, ndarǝ tsǝie aɓa cauɓikea mala mǝ'nongginǝban nǝ aɓea aburana a nza nǝ́ doɓala. Sǝ ɓwa mǝnana al mǝnia yì ɓwama mǝnana burí pǝri ka, ndarǝ pak cauɓikea mala nongnǝ mālá ɓeɓwa.

Kànìgìr mala Yesu
amur Kángir

33 Sǝ ɗǝm ngga wu ongŋǝna à banggi aɓwana mǝnana a pwarian ngga ama, <<A pà nǝ́ kángìr aɓa nyir ɗang. She awu nǝ lùmsǝ agir mǝnana a kána a ɓadǝm Mǝtalabangŋo ama a nǝ pea ka.>>* 34 Sǝ mim ngga ǝn nggǝ na wun ama, wu kǝa kángìr ɗàng. Wu kǝa kángìr nǝ kùli ɗang, acemǝnana nda buno-murǝm mala Ɓakuli.† 35 Sǝ pa wu nǝ̀ kángìr gbal nǝ nzali ɗang, acemǝnana ndà buno'tsǝk-kusǝu male. Sǝ wu kǝa kán gbal nǝ Urǝshalima ɗàng, acemǝnana nda nggea-là mala Murǝm Mǝgule kat.‡ 36 Sǝ kǝa kán nǝ ɓamuro ɗàng, acemǝnana a pà nǝ́ gandǝ pǝlǝ nyang muro mwashat ɓǝ̀ pwasǝo ko ɓǝ̀ pǝndǝ ka ɗàng. 37 Ɗeki <<E>> mò ɓǝ̀ duk <<E,>> sǝ <<Awo>> mò ɓǝ̀ duk <<Awo>>; ɓǝ̀ wori mǝnia ka pur nǝ ban Mǝɓealɓikea.

Yesu kanigir amur pě-gbal

(Luka 6:29-30)

38 Wu ongŋǝna à bang ama, <<Ar mǝsǝu a kún ar mǝsǝu, sǝ ɓun minǝu a kún ɓun minǝu.>>§ 39 Sǝ mim ngga ǝn nggǝ na wun ama, kǝa nyesǝ mǝɓane a kún mǝɓane mǝnana à pakko ka ɗàng. Ɓǝ̀ ɓwa kweo a takiro mǝlì ka, pǝlǝi wi ɓè takiro. 40 Ɓǝ̀ ɓwa na ama nǝ̀ nggá wulio nǝ̀ ako daura mò ka, pe wi andǝ nggea-daura mò gbal. 41 Ɓǝ̀ ɓwa tsǝo púp ama ɓǝ̀ wu o wunǝi mel mwashat ka, wu kyan wunǝi mel ɓari. 42 Ɓǝ̀ ɓwa zǝmbo ka, pe wi, sǝ ɓwa mǝnana yiua ak tangna a buo ka, ce a girì nǝi ɗàng.

Yesu kanigir amur
earce aɓio amǝbura

(Luka 6:27-28,32-36)

43 Wu ongŋǝna à bang ama, <<Earce ɓio mǝ'murkala,>>*sǝ wu ɓinǝ ɓiomǝbura. 44 Sǝ mim ngga ǝn nggǝ na wun ama: Wu earce aɓi wun amǝbura sǝ wu kǝ pakhiwi ace aɓwana mǝnana à ɓinǝmǝsǝ wun sǝ à kǝ pa wun tanni ka. 45 Ɓǝ̀ wu pak anggo ka wun nǝ̀ duk amuna mala Tár wun mǝnana a kùli ka. Acemǝnana yì ka, kǝ tsǝk pwari male kǝ ta amur aɓwana amǝɓane andǝ amǝɓoarne, sǝ kǝ nya mbulo amur amǝ pàk cauɓoarna andǝ amǝ pàk ɓealɓikea. 46 Ɓǝ̀ earcearǝu ma'wun ngga nda ace amǝ'earce wun nǝmurǝia ka, ya tangnakusǝu na wu ndanǝi? Nggearǝ amǝ'cauɓikea ka anggo sǝ à pakkiyia. 47 Sǝ ɓǝ̀ amǝ'eam wun na nǝmurǝia wu makkiyia kún ngga, nǝ man sǝ wu kútì acili aɓwana mǝnana amǝkpatam na raka? Nggearǝ amǝɓanza ka anggo sǝ à pakkiyia. 48 Ace mǝno ka, wu lùmsǝ nǝ cauɓoarna kǝla mǝnana Tár wun mana a kùli ka lùmsǝ nǝ cauɓoarna ka.†

Matiu
<
5
>

*5:4 5:4 Ɓalli gbal aɓa: Isha 61:2.

†5:5 5:5 Ɓalli gbal aɓa: Ang 37:11.

‡5:6 5:6 Ɓalli gbal aɓa: Isha 55:1,2.

§5:8 5:8 Ɓalli gbal aɓa: Ang 24:3,4.

*5:12 5:12 Ɓalli gbal aɓa: 2Kpa 36:16; Mat 23:37; Atúró 7:52; 1Tas 2:15; Jem 5:10.

†5:13 5:13 Ɓalli gbal aɓa: Mar 9:50; Luk 14:34,35.

‡5:14 5:14 Ɓalli gbal aɓa: Yoh 8:12; 9:5.

§5:15 5:15 Ɓalli gbal aɓa: Mar 4:21; Luk 8:18; 11:33.

*5:16 5:16 Ɓalli gbal aɓa: Ang 2:12.

†5:18 5:18 Ɓalli gbal aɓa: Luk 16:17.

‡5:20 5:20 ɓǝ̀ ɓealɓoarna ma'wun kútì mala amǝ Farisi andǝ amǝkani Nggurcau mala Musa raka: Ko <<ɓǝ̀ do mǝsǝcau ma'wun aɓa kpata gìr mǝnana Ɓakuli earkiyi ce ka kútì mala amǝ Farisi andǝ amǝkani Nggurcau mala Musa raka.>>

§5:21 5:21 Ɓalli gbal aɓa: Pur 20:13; Nggur 5:17.

*5:27 5:27 Ɓalli gbal aɓa: Pur 20:14; Nggur 5:18.

†5:29 5:29 Ɓalli gbal aɓa: Mat 18:9; Mar 9:47.

‡5:30 5:30 Ɓalli gbal aɓa: Mat 18:8; Mar 9:43,44.

§5:31 5:31 Ɓalli gbal aɓa: Nggur 24:1-4; Mat 19:7; Mar 10:4.

*5:33 5:33 Ɓalli gbal aɓa: Pǝris 19:12; Ɓal 30:2; Nggur 23:21.

†5:34 5:34 Ɓalli gbal aɓa: Jem 5:12; Isha 66:1; Mat 23:22.

‡5:35 5:35 Ɓalli gbal aɓa: Isha 66:1; Ang 48:2.

§5:38 5:38 Ɓalli gbal aɓa: Pur 21:24; Pǝris 24:20; Nggur 19:19-21.

*5:43 5:43 Ɓalli gbal aɓa: Pǝris 19:18.

†5:48 5:48 Ɓalli gbal aɓa: Pǝris 19:2.