Sǝna
mala Yohana
Mǝncau
Sǝna mala Yohana ka à gilǝì a bàkú mǝnana amǝkpata Yesu na arǝ kum patanni ace paɓamuru malea a bani ka. À gilǝì ace pe amǝ ɓalle tsǝkɓalǝu andǝ ɓakɓabum, sǝ kwarkiru ace do nǝ mǝsǝcau aɓalǝ apwari mala tanni andǝ patanni.
Bangula mǝnia yì malǝmce ka lùmsǝ nǝ asǝna aɓa bangŋo, andǝ asǝndǝmba, andǝ agir-lǝmdǝa mana amǝkpata Yesu mǝnana ɗiɗyal ka à nǝ̀ gandǝ bwaltea, sǝama a ban acilia aɓwana kat ka à duk gir'sǝmbǝrǝa. À camarǝ ɓǝsǝlǝki nacau mala asǝngir aɓa bangŋo arǝ anjar ɗàngɗáng, mana lǝmdǝ ama amǝno yì agir kat ka, à nǝ̀ kumban a koya nza mala ɓwapǝndǝa. Mugula cau mǝnana aɓalǝi ka nda mǝnana ama, nǝ ban Kǝrǝsti Mǝtalabangŋo, sǝ Ɓakuli nǝ limurǝm amur aɓi-mǝbura kpapia kat, a masǝlǝate, kat andǝ Shetan, sǝ nǝ̀ mbwe ka aɓwana male amǝ'mǝsǝcau nì tangnakusǝu mala atsǝkbu mala bǝsa kùli andǝ bǝsa ɓanza, ɓǝ̀ mǝnia yì limurǝm yi lumsǝna ka.
Agir mǝnana aɓalǝi ka
Mǝn Cau1:1-8
Mǝn sǝne aɓa bangŋo andǝ acauterǝa aban ká aban a'ikǝlisiya tongno-nong-ɓari1:9--3:22
Malǝmce mǝnana à lanzǝ kúni nǝ agbatali myang tongno-nong-ɓari ka4:1--8:1
Anjawe tongno-nong-ɓari8:2--11:19
Dǝragon andǝ anyamɓikea ɓari12:1--13:18
Asǝndǝmba aɓa bangŋo ɗàngɗáng14:1--15:8
Bumlulla mala Ɓakuli aɓalǝ atasau tongno-nong-ɓari16:1-21
Kiɗikea mala Babila andǝ limurǝm amur nyamɓikea, andǝ mǝɓangnǝa mǝ'nyirì, andǝ Mǝɓealɓikea17:1--20:10
Masǝlǝata ɓashi20:11-15
Bǝsa kùli, andǝ bǝsa nzali, sǝ bǝsa Urǝshalima21:1--22:5
Masǝlǝata cau22:6-21
1
Cau mǝnana Yohana bang
amur mǝnia yì Sǝna ka
amur mǝnia yì Sǝna ka
1 Mǝnia ka nda sǝngir aɓa bangŋo nǝ bu Yesu Kǝrǝsti mǝnana Ɓakuli pe wi acemǝnana ɓǝ̀ lǝmdǝì aguro male agir mǝnana duk púp à nǝ̀ yia kutio, banì pà nǝ̀ sau raka.*1:1 banì pà nǝ̀ sau raka ko <<akaurǝa, dǝndi pà kàm ɗàng>> Yesu túr mǝturonjar male ɓǝ̀ yì mǝngi mǝnia yì girsǝna aɓa bangŋo ka a ban guro male, Yohana. 2 Yohana yì bang gìr mǝnana kat sǝna, amur Cau mala Ɓakuli, andǝ agir mǝnana Yesu Kǝrǝsti pea sǝ nea ka.
3 Ɓwa mǝnana kǝ ɓal acau mala ɓangnǝa†1:3 Ɓwa mǝnana kǝ ɓal acau mala ɓangnǝa: Ko <<Ɓwa mǝnana kǝ ɓallia aɓwana acau mala ɓangnǝa mǝnia ɓǝà oè.>> mǝnia nǝ loasǝ giu, andǝ aɓwana mǝnana à kǝ oe, sǝ à kǝ kpata agir mǝnana à gilǝia aɓalǝi ka, à ndanǝ tsǝkbu, acemǝnana pwari pa mala agir mǝnia ka gbàshìnà tù.
Makkun mala Yohana aban ká
aban a'ikǝlisiya tongno
nong-ɓari
aban a'ikǝlisiya tongno
nong-ɓari
4 Cautera mǝnia ka pur a banam, Yohana, aban ká a ban a'ikǝlisiya tongno-nong-ɓari aɓa nzali Asiya.‡1:4 nzali Asiya: Mǝnia ka nda nzali Asiya a nza mala nggwamnati mala amǝ Roma.
Ən nggǝ shamba wun ɓwamuru andǝ do rǝpwala mǝnana à kǝ pur nǝban Ɓakuli ka. Yì Ɓakuli ka nda mana ndakam ado, mǝnana ndakam a pwarian, sǝ nda mǝnana nǝ̀ pàk kàm a dǝmba ka.
Ɗǝm ngga ǝn nggǝ shamba wun ɓwamuru andǝ do rǝpwala mǝnana à kǝ pur nǝban abangŋo tongno-nong-ɓari mǝnana à nda a ɓadǝm buno-murǝm mala Ɓakuli ka.§1:4 Ɓalli gbal aɓa: Pur 3:14.
5 Sǝ ǝn nggǝ shamba wun ɓwamuru andǝ do rǝpwala mǝnana à kǝ pur nǝban Yesu Kǝrǝsti ka. Yì Yesu Kǝrǝsti ka nda mǝ'nakún mala Ɓakuli aɓa mǝsǝcau, mǝdǝmba mala aɓwana mǝnana à kǝ loapi ɓembe anzǝm lú ka. Sǝ yì nda mǝ'yálmúrû amur amurǝma mala ɓanza. Yì nda mǝnana earmǝsǝ sǝm, sǝ panzǝna sǝm aɓalǝ acauɓikea ma'sǝm nǝ nkila male,*1:5 Ɓalli gbal aɓa: Ang 89:27. 6 sǝ nyesǝ sǝm, sǝm pǝlǝna apǝris a Domurǝm mala Ɓakuli, yì Tárrí ka. Ɓǝ̀ gulo kat andǝ rǝcandǝa duk male, masǝlǝate pà kàm ɗang!†1:6 Ɓalli gbal aɓa: Pur 19:6; Isha 61:6. Ɓǝ̀ do anggo.
7 Wu sǝni! Ndya kǝ yiu
andǝ apǝrɓang ngga.
Koya mǝsǝu ka nǝ̀ sǝni,
kat andǝ aɓwana mǝnana
à zuɓi nǝ kaɗa ka;
sǝ akún mǝnana kat a ɓanza ka,
à nǝ̀ ɓua atàcau male.
E, anggo sǝ ɓǝ̀ pa!‡1:7 Ɓalli gbal aɓa: Dan 7:13; Mat 24:30; Mar 14:62; Yoh 19:34-37; Zak 12:10. Ɓǝ̀ do anggo.
8 Ɓakuli Mǝtalabangŋo na ama, <<Mǝ nda Alfa, ǝn tita agir kat, sǝ mǝ nda Omega, mǝ nǝ masǝlǝ ta agir kat. Mǝ nda mǝnana mǝ ndakam ado, andǝ mǝnana a pwarian, andǝ mǝnana kǝ yiu a dǝmba ka. Mǝ nda mǝnana nǝ Rǝcandǝa ǝn Karmur Gulo kat ka!>>§1:8 Ɓalli gbal aɓa: Pur 3:14.
Yohana sǝn Mǝtala sǝm
mǝnana loapi ɓembe ka
mǝnana loapi ɓembe ka
9 Mim Yohana, mǝ'eam wun andǝ ɓi wun aɓa nutanni, sǝ aɓa Domurǝm mala Ɓakuli, andǝ gandǝrǝu, amǝnana à dumǝna ma'sǝm aɓa Yesu ka, mǝ nda aɓa luran mǝnana à tunǝki ama Patmos ka. À twalam à yì túrǎm akani acemǝnana ǝn hamnǝ cau mala Ɓakuli, sǝ ace nakún Yesu ka. 10 A pwari mǝnana à tàrrì ace Mǝtalabangŋo ka, Bangŋo mala Ɓakuli em, kara ǝn ok ɓekǝ giu mǝcandǝe kǝla ɓua mala njawe, a nzǝmam. 11 Kǝ na ama, <<Gilǝ agir mǝnana a kǝ sǝnia ka aɓa malǝmce. Sǝ wu teri aban a'ikǝlisiya mǝnia tongno-nong-ɓari ka, amǝnana arǝ anggea-là Afisu, andǝ Sǝmirna, andǝ Pargamu, andǝ Tiyatǝra, andǝ Sardis, andǝ Filadefiya, sǝ Lawodisi ka.>>
12 Lang ǝn pǝlǝa mǝ nǝ sǝn yana ɓwe nakiyiam cau ka, kara ǝn sǝn apitǝla zǝnariya tongno-nong-ɓari. 13 Aban came aɓalǝ apitǝla mǝnia à cam ka, ɓeɓwa ndakam <<kǝla Muna mala Ɓwa.>>*1:13 Ɓalli gbal aɓa: Dan 7:13; 10:5. Ɓwe oasǝ daura mǝlime mǝnana yi sulǝo arǝ akusǝi, sǝ mārǝ́ bugir zǝnariya a kikili. 14 Ɓamuri andǝ nyang-múrí ka amǝpwasǝe na kǝla buke, à pwasǝ pwapwat kǝla talimbulo; sǝ amǝsǝì na kǝla lasǝ bǝsa mǝnana kǝ earki ka. 15 Akusǝi kǝ tà'nzama kǝla bolo-ntùl mǝbangŋe mǝnana nggangsǝa aɓa bǝsa-ntul ka, sǝ nacau male ka gì na kǝla gǝshi gǝggǝli mala nggeamùr aɓa songnǝo male.†1:15 Ɓalli gbal aɓa: Ezǝk 1:24; Dan 10:5,6. 16 Bwal anlero tongno-nong-ɓari a buì-mǝlì, sǝ nggeabyau mǝnana nǝ akúní mǝceauwe ɓari ka, puro a ɓakuni. Ɓamǝsǝi kǝ tà'nzama kǝla ta mala pwari aɓa zǝkya male.‡1:16 Ɓalli gbal aɓa: Pur 34:29.
17 Lang mǝ nǝ yia sǝni ka, kara ǝn kpa a nzali a kusǝì kǝla ɓwa mǝnana wuna ka. Pǝlǝa yi tsǝk buì-mǝlì a muram sǝ nam ama:
Ɓangciu ɓǝ̀ kǝa pakko ɗàng! Mǝ nda Mǝdǝmba, ǝn tita agir kat, sǝ mǝ nda Mǝtankwang, mǝ nǝ masǝlǝ agir kat!§1:17 Ɓalli gbal aɓa: Isha 44:2,6. 18 Mǝ nda mǝnana nǝyilǝmu ka. Ɗiɗyal ka ǝn wú, sǝ sǝni, mǝ ndya nǝ amǝsǝam ngga, masǝlǝate pà kàm ɗàng. Akyî mala Lú andǝ Domurǝm mala Lú ka à nda aɓa buam.
19 Gìr mǝnana a sǝni ka gilǝì; amǝnana ado, andǝa mǝnana à nǝ̀ yia pǎ anzǝm amǝnia ka. 20 Mǝnia ka nda ɓá cau ɓa-sǝmbǝrǝa amur anlero tongno-nong-ɓari mana a sǝnia aɓa buam-mǝlì, andǝ ɓá cau ɓa-sǝmbǝrǝa amur apitǝla zǝnariya tongno-nong-ɓari ka. Anlero mǝnia tongno-nong-ɓari ka, à nda ka amǝturonjar mala a'ikǝlisiya tongno-nong-ɓari, yì akpapi mala amǝkpata Yesu. Sǝ apitǝla tongno-nong-ɓari ka, à nda ka yià a'ikǝlisiya tongno-nong-ɓari.
*1:1 1:1 banì pà nǝ̀ sau raka ko <<akaurǝa, dǝndi pà kàm ɗàng>>
†1:3 1:3 Ɓwa mǝnana kǝ ɓal acau mala ɓangnǝa: Ko <<Ɓwa mǝnana kǝ ɓallia aɓwana acau mala ɓangnǝa mǝnia ɓǝà oè.>>
‡1:4 1:4 nzali Asiya: Mǝnia ka nda nzali Asiya a nza mala nggwamnati mala amǝ Roma.
§1:4 1:4 Ɓalli gbal aɓa: Pur 3:14.
*1:5 1:5 Ɓalli gbal aɓa: Ang 89:27.
†1:6 1:6 Ɓalli gbal aɓa: Pur 19:6; Isha 61:6.
‡1:7 1:7 Ɓalli gbal aɓa: Dan 7:13; Mat 24:30; Mar 14:62; Yoh 19:34-37; Zak 12:10.
§1:8 1:8 Ɓalli gbal aɓa: Pur 3:14.
*1:13 1:13 Ɓalli gbal aɓa: Dan 7:13; 10:5.
†1:15 1:15 Ɓalli gbal aɓa: Ezǝk 1:24; Dan 10:5,6.
‡1:16 1:16 Ɓalli gbal aɓa: Pur 34:29.
§1:17 1:17 Ɓalli gbal aɓa: Isha 44:2,6.