4
Peri mǝnana a kùli ka
1 Anzǝm mǝno ka, ǝn soa mǝsǝam kara ǝn sǝn kunkurǝm a kùli mǝnana à mǝnni sǝ à nyi atarǝì ka. Sǝ yì gìu mǝnana ǝn oe atadǝmbe nam cau kǝla ɓua mala njawe ka, bang ama, <<Yiu kani a kùli, mǝ nǝ lǝmdǝo gìr mǝnana nǝ̀ yia kumban anzǝm mǝnia ka.>>*4:1 Ɓalli gbal aɓa: Pur 19:16,24. 2 Kara Bangŋo mala Ɓakuli em. Ən sǝn buno-murǝm a kùli sǝ ǝn sǝn ɓeɓwa aban do amurí.†4:2 Ɓalli gbal aɓa: Ezǝk 1:26-28. 3 Ɓwa mǝno do amur buno-murǝm ngga, ɓamǝsǝi kǝ tâ'nzama, kǝla tǎ mala atali jaspa andǝ kaneliya. Sǝ tà'nzama mala tali emeral ka, kàrì buno-murǝm male kǝla npāring. 4 Aɓea abuno-murǝm lumi-ɓari-nong-ine gumbǝli mǝnia yì buno-murǝm ngga a ɓalǝu, nǝ aɓwana-mǝgule lumi-ɓari-nong-ine aban do amúrià. À oasǝ adaura pwasǝa arǝia andǝ ambulan zǝnariya a ɓamuria. 5 Liki'nzama mala tǎlaban, sǝ akia mala agiu andǝ sàkkya mala mgbarangce ka, à kǝ pur nǝban buno-murǝm nì. A ɓadǝm buno-murǝm nì ka aɓukan nakam tongno-nong-ɓari à kǝ earke nǝ bǝsa. Amǝnia ka, à nda ka bangŋo tongno-nong-ɓari mala Ɓakuli.‡4:5 Ɓalli gbal aɓa: Pur 19:16; Sǝn 8:5; 11:19; 16:18; Ezǝk 1:13; Sǝn 1:4; Zak 4:2. 6 A ɓadǝm mǝnia yì buno-murǝm ɗǝm ngga, ǝn sǝn ɓè gìr sarǝa nongŋo kǝla nggeamùr mǝnana à pè nǝ gǝlas ka. Esǝke kwár gǝraɗau kǝla talimbulo.
Agiryilǝmu ine mǝnana à lùmsǝ nǝ amǝsǝu a ɓadǝmbia andǝ nzǝmia ka, à came a ɓaɓalǝu a koya buban mala buno-murǝm nì.§4:6 Ɓalli gbal aɓa: Ezǝk 1:5,18. 7 Mǝdǝmbe mala amǝnia yì agiryilǝmu ka, nda kǝla im; ɓaria ka nda kǝla jamnda; tàruià ka ndanǝ ɓamǝsǝu kǝla mala ɓwapǝndǝa; sǝ inea ka nda kǝla nkwàng mǝnana kǝ yal ka.*4:7 Ɓalli gbal aɓa: Ezǝk 1:10. 8 Komǝye na atà mǝnia yì agiryilǝmu ka ndanǝ abu-nyál tongno-nong-mwashat. Rǝia kat ka lùmsǝ nǝ amǝsǝu a ɓalǝu andǝ nza. Du andǝ pwari à usǝlǝki ɗang, à nda rǝ tu nggyal ama,
<<Mǝfele, Mǝfele, Mǝfele
nda Mǝtalabangŋo Ɓakuli
mana Karmur Gulo kat,
mana ndakam ɗiɗyal,
ndakam ado,
sǝ nda kǝ yiu ka.>>†4:8 Ɓalli gbal aɓa: Isha 6:2-3.
9 Agiryilǝmu nì lidǝmba nǝ pa ɓwangsǝban, andǝ gulo, andǝ yàwá a ban ɓwa mǝnana do amur buno-murǝm, mǝnana ndanǝ yilǝmu mana málá male pà kàm raka.‡4:9 Ɓalli gbal aɓa: Ang 47:8. 10 Aɓa mǝno anggo ka aɓwana-mǝgule lumi-ɓari-nong-ine ka, à nǝ̀ kpa a nzali a ɓadǝm ɓwa mǝnana do amur buno-murǝm ngga. À nǝ̀ peri a bani, yì ɓwa mana ndanǝ yilǝmu mana málá male pà kàm raka. Lang ɓǝ̀ à nda aɓa peri anggo ka, à nǝ̀ nongsǝ ambulan-murǝm malea a ɓadǝm buno-murǝm nì sǝ à nǝ̀ bang ama:
11 <<A kārǝ́na,
We Mǝtalabangŋo
Ɓakuli ma'sǝm.
A kārǝ́na
ɓǝà ɓwangsǝo,
ɓǝà po gulo,
sǝ wu ak rǝcandǝa.
Acemǝnana a nda mana
a pusǝ agir kat ka.
Kani mala ɓabumo na
sǝ a pusǝia,
sǝ do malea gbal ka,
kani mala ɓabumo na.>>
*4:1 4:1 Ɓalli gbal aɓa: Pur 19:16,24.
†4:2 4:2 Ɓalli gbal aɓa: Ezǝk 1:26-28.
‡4:5 4:5 Ɓalli gbal aɓa: Pur 19:16; Sǝn 8:5; 11:19; 16:18; Ezǝk 1:13; Sǝn 1:4; Zak 4:2.
§4:6 4:6 Ɓalli gbal aɓa: Ezǝk 1:5,18.
*4:7 4:7 Ɓalli gbal aɓa: Ezǝk 1:10.
†4:8 4:8 Ɓalli gbal aɓa: Isha 6:2-3.
‡4:9 4:9 Ɓalli gbal aɓa: Ang 47:8.