5
Mǝgam ak malǝmce
mana à kǝ̀ karì ka nǝ̀ panzǝi
mana à kǝ̀ karì ka nǝ̀ panzǝi
1 A ɓabù mǝlì mala Yì ɓwa mǝnana do amur buno-murǝm ngga, ǝn sǝn ɓè malǝmce mana à kǝ̀ karì ka, mǝnana à gilǝ cau kàm ɓālǝi andǝ nzǝmi, sǝ à lanzǝ kúni nǝ agbatali myang arǝ abanì tongno-nong-ɓari ka.*5:1 Ɓalli gbal aɓa: Ezǝk 2:9; Isha 29:11. 2 Sǝ ǝn sǝn ɓè nggea kanggǝrang mǝturonjar mala Ɓakuli came loasǝ gì bàng-bàng, aban hama ama,
<<Yana ɓwe kārǝa nǝ fasǝki amyang mǝnia à lanzǝkina kún mǝnia yì malǝmce nǝi ka, sǝ nǝ̀ panzǝi?>>
3 Sǝ ko kǝɓwa pà kàm a kùli, ko a nzali, ko a tà-nzali, mǝnana kārǝa nǝ̀ mǝn mǝnia yì malǝmce, ko nǝ̀ sǝn gìr mǝnana à gilǝì aɓalǝi ka ɗàng.
4 Pǝlǝa ǝn kpa ɓua kǝ̀rkǝ́r, acemǝnana à kum kǝɓwa mǝnana kārǝa nǝ̀ mǝn mǝnia yì malǝmce, ko nǝ̀ sǝn ɓālǝi ka ɗàng. 5 Pǝlǝa mwashat atà aɓwana-mǝgule mǝno lumi-ɓari-nong-ine ka nam ama, <<Pwalo, ce a ɓua ɗàng! Sǝni, ɓwa mǝnana à tunǝki ama Im, a tàu mala Yahuda, sǝ ɗǝm ngga Mǝkà murǝm Dauda na ka, linamurǝm mǝnana tsǝì kārǝ́na nǝ̀ fasǝki amyang-kun yì malǝmce, mǝnana à lanzǝi nǝia ka, sǝ nǝ̀ mǝnni.>>†5:5 Ɓalli gbal aɓa: Tite 49:9.
6 Pǝlǝa ǝn sǝn Mǝgam mǝnana pa kǝla à pwan-myali ka, nda aban came nǝ ɓaɓalǝu a ban buno-murǝm, sǝ agiryilǝmu mǝno ine andǝ aɓwana-mǝgule ka, à kàrì aɓalǝu. Ndanǝ anjawe tongno-nong-ɓari andǝ amǝsǝu tongno-nong-ɓari, amǝnana à nda ka bangŋo tongno-nong-ɓari mala Ɓakuli mǝnana à tasǝia arǝ aban kat aɓa ɓanza ka.‡5:6 Ɓalli gbal aɓa: Isha 53:7; Zak 4:10.
7 Mǝgam nì pǝlǝa yiu yi ak malǝmce nî a bù-mǝlì mala Yì ɓwa mǝnana do amur buno-murǝm ngga. 8 Lang angŋǝna malǝmcenî ka, agiryilǝmu mǝno ine andǝ aɓwana-mǝgule lumi-ɓari-nong-ine ka, à sarǝa a nzali a ɓadǝm Mǝgam. Koyana ateà ka ndanǝ zangŋan, sǝ à bwal amuna-nkenye bolo-njengǝlan a buia mǝnana à lùmsǝia nǝ muku-gìr ace loasǝ yele mǝ'rǝmɓoarne ka; yì muku-gìr ace loasǝ yele mǝ'rǝmɓoarne ka nda ka ahiwi mala aɓwana mala Ɓakuli.§5:8 Ɓalli gbal aɓa: Ang 141:2. 9 Pǝlǝa agiryilǝmu andǝ aɓwana-mǝgule mǝno tù bǝsa nggyal ama:
<<A kārǝ́na wu ak
malǝmce nî,
sǝ wu fasǝki amyang-kuni.
Acemǝnana we ka
à pwan-myalo,
sǝ nǝ nkilio sǝ a akmúr
aɓwapǝndǝa ace Ɓakuli,
aɓa koya kún,
andǝ koya lasǝu,
andǝ aɓwana arǝ
anzali ɗàngɗáng.*5:9 Ɓalli gbal aɓa: Ang 33:3; Isha 42:10.
10 A nyésǝnia à
pǝlǝna aɓwana
mǝnana Ɓakuli ma'sǝm
nda murǝm amúrià,
sǝ apǝris ace
pakki wi túró,
sǝ à nǝ̀ duk agbani†5:10 à nǝ̀ duk agbani ko à nǝ̀ duk amǝ'yálmúrû ko à nǝ̀ duk amurǝma
a ɓanza.>>‡5:10 Ɓalli gbal aɓa: Pur 19:6; Isha 61:6.
11 Lang mǝ ndaban sǝnban ngga, ǝn ok gì amǝturonjar mala Ɓakuli pas. Làkkì malea na á-pas andǝ amilǝyan amur amilǝyan! À gumbǝli buno-murǝm andǝ agiryilǝmu andǝ aɓwana-mǝgule aɓalǝu.§5:11 Ɓalli gbal aɓa: Dan 7:10. 12 À loasǝ già a kùli à tu-nggyal ama:
<<Mǝgam mǝnana à
pwan-myali ka,
kārǝ́na ɓǝ̀ ak gara-murǝm,
andǝ kume,
andǝ sǝlǝe, andǝ rǝcandǝa,
andǝ gusǝlǝban,
andǝ ɓoarɓwa,
andǝ ɓwangsǝban!>>
13 Pǝlǝa ǝn ok agir mǝnana kat Ɓakuli pusǝia ka, amǝnana a kùli, andǝa mǝnana a nzali, andǝa mǝnana a tǝta nzali, andǝa mǝnana a tamur ka, andǝ koya gìr mǝnana kat aɓalǝia ka aban ɓwangsǝki Ɓakuli. À tu-nggyal ama:
<<Ɓwangsǝban andǝ gulo,
andǝ ɓoarɓwa,
andǝ rǝcandǝa ka,
ɓǝà pè Yì ɓwa mǝnana
do amur buno-murǝm ngga
sǝ ɓǝà pè Mǝgam,
málá male pà kàm ɗàng!>>
14 Agiryilǝmu mǝno ine ka, à ear ama, <<Amin, ɓǝ̀ do anggo!>> Sǝ aɓwana-mǝgule ka, à kpa a nzali aban peri.
*5:1 5:1 Ɓalli gbal aɓa: Ezǝk 2:9; Isha 29:11.
†5:5 5:5 Ɓalli gbal aɓa: Tite 49:9.
‡5:6 5:6 Ɓalli gbal aɓa: Isha 53:7; Zak 4:10.
§5:8 5:8 Ɓalli gbal aɓa: Ang 141:2.
*5:9 5:9 Ɓalli gbal aɓa: Ang 33:3; Isha 42:10.
†5:10 5:10 à nǝ̀ duk agbani ko à nǝ̀ duk amǝ'yálmúrû ko à nǝ̀ duk amurǝma
‡5:10 5:10 Ɓalli gbal aɓa: Pur 19:6; Isha 61:6.
§5:11 5:11 Ɓalli gbal aɓa: Dan 7:10.