22
Yohana sǝn nggeasala
mala mùr yilǝmu
mala mùr yilǝmu
1 Ɗǝm ngga mǝturonjar lǝmdǝam nggeasala mala mùr pa yilǝmu. Mùr nî kwar gǝraɗau kǝla kǝrstal. Kǝ ɓun aban buno-murǝm mala Ɓakuli andǝ mala Mǝgam sǝ kǝ ɓangŋa. 2 Ɓangŋa kǝ kútí nǝ ɓaɓalǝu mala njar mǝgule mala ɓá nggea-là. A koya nkaring mala kun mùr mala nggeasala ka, nggun nda kam mǝnana kǝ pa yilǝmu ka. Nggunî kǝ pusǝ a'ulang aɓǝle ɗàngɗáng lum-nong-ɓari aɓa pǝlǝa mwashat; koya zongŋo ka, kǝ pusǝ ulang male yì ɓǝle. Ambu nggunì ka ɓuri na ace walkwánó mala anzali mala aɓwapǝndǝa*22:2 ɓuri na ace walkwánó mala anzali mala aɓwapǝndǝa Ko <<nda ace twalban atanni mala aɓwapǝndǝa.>>.†22:2 Ɓalli gbal aɓa: Tite 2:9.
3 Súban ngga pà nǝ̀ pàk kàm ɗǝm amur kǝgìr aɓa mǝno yì nggea-là ka ɗàng. Ɓakuli nǝ nggearǝì, andǝ Mǝgam ngga, à nǝ̀ do aɓalǝi amur abuno-murǝm malea, sǝ aɓwana male nǝ̀ nggǝ peri a baní.‡22:3 Ɓalli gbal aɓa: Zak 14:11. 4 À nǝ̀ sǝn ɓamǝsǝi sǝ lùllǝì ka à nǝ̀ gilǝì a kundǝmbǝia.§22:4 Ɓalli gbal aɓa: Ang 17:15. 5 Dù pà nǝ̀ nyare nǝ̀ pak ɗǝm ɗàng. À pà nǝ̀ earce pitǝla ko pwari ace pa tǎlaban ɗǝm ɗàng, acemǝnana Mǝtalabangŋo Ɓakuli ka, nda tǎlaban, nǝ̀ tǎ amúrià. Sǝ à nǝ̀ duk amurǝma masǝlǝate pà kàm ɗàng.
6 Pǝlǝa mǝturonjar banggàm ama:
Amǝnia yì acau ka mǝsǝcau na sǝ à nǝ̀ earnǝia. Mǝtalabangŋo Ɓakuli mǝnana gingginǝ bangŋo mala amǝ'ɓangnǝa male ka, nda tasǝ mǝturonjar male ɓǝ̀ yì banggi aguro male, agir mǝnana à nǝ̀ yia pur púp banì pà nǝ̀ sau raka.
Yesu nia kǝ yiu ka
7 Yesu kǝ na ama, <<Wu sǝni, mǝ ndya ǝn nggǝ yiu adyan tù ka! Aɓwana mǝnana à kǝ kpata acau mala ɓangnǝa mǝnana à gilǝia aɓa mǝnia yì malǝmce ka, à ndanǝ tsǝkbu!>>
8 Mim Yohana, mǝ nda mǝnana ǝn ó sǝ ǝn sǝn amǝnia yì agir ka. Lang ǝn ongŋǝnia sǝ ǝn sǝnǝnia ka, kara ǝn kpa a nzali mǝ nǝ peri a kusǝ mǝturonjar mala Ɓakuli mǝnana lǝmdǝam mia ka. 9 Sǝ yì ka, nam ama:
Awo, kǝa peri abanam ɗang. Mǝ nda guro mala Ɓakuli, kǝla we wunǝ amǝ'eambo, amǝ'ɓangnǝa mala Ɓakuli, andǝ aɓwana mǝnana kat à kǝ kpata gir mǝnana à gilǝì aɓa mǝnia yì malǝmce ka. Peri aban Ɓakuli nǝmurǝì ɓǝ̀rɓǝ̀r!
10 Pǝlǝa kwarkiram ama:
Kǝa na ama awu nǝ sǝmbǝrǝ ce acau mala ɓangnǝa mǝnana aɓa malǝmce mǝnia ka ɗàng, acemǝnana pwari gbàshìnà tù mana amǝnia yì agir kat ka à nǝ̀ kumban ngga.
11 Ɓwa mǝnana kat kǝ pak gìr mǝɓane ka, ɓǝ̀ lidǝmba aɓa pàkkiagir mǝɓane. Ɓwa mǝnana kat mǝɓealɓikea na ka, ɓǝ̀ lidǝmba aɓa ɓealɓikea male. Ɓwa mǝnana mǝɓealɓoarna na ka, ɓǝ̀ lidǝmba aɓa do-ɓealɓoarna. Ɓwa mǝnana tàr ɓamúrì ɓǝ̀ duk mala Ɓakuli ka, ɓǝ̀ lidǝmba aɓa do tàr ɓamuru aban Ɓakuli.*22:11 Ɓalli gbal aɓa: Dan 12:10.
12 Yesu kǝ na ama, <<Wu sǝni, mǝ ndya ǝn nggǝ yiu adyan tù ka! Atangnakusǝu mem na a buam, mǝ nǝ yia pè koya ɓwa ka tangnakusǝi mala gìr mǝnana karǝ arǝ túró mǝnana pàk ka.†22:12 Ɓalli gbal aɓa: Isha 40:10; Ir 17:10. 13 Mǝ nda Alfa andǝ Omega, Mǝdǝmba andǝ Mǝtankwang, Tite andǝ Masǝlǝate.>>‡22:13 Ɓalli gbal aɓa: Isha 44:6; 48:12.
14 Aɓwana mǝnana à kǝ lákkí anggea-daura malea, à do aɓa ɓoarnsari mala ɓabum ngga, à ndanǝ tsǝkbu. Ɓakuli nǝ̀ nyinggia wia ban arǝ kunɓala ɓǝà kutio aɓa yì nggea-là sǝ ɓǝà lì ɓǝlanggun mala nggun yilǝmu. 15 A nza nǝ nggea-là ka à nda ka amǝ do kiɗìkì kǝla anvwa, andǝ amǝ pakkia gir monzǝo, andǝ amǝ pak cauɓikea nonggi nǝ rǝarǝu, andǝ amǝ walki-alú, andǝ amǝ peri aban ankúl andǝ alú, andǝ aɓwana mǝnana kat à kǝ earce pak túró nyir, sǝ amǝ swarkiban na ka.
16 Mim Yesu, ǝn túr mǝturonjar mem ɓǝ̀ bangga wun amǝnia yì agir ka ace a'ikǝlisiya. Mǝ nda Mǝkà Murǝm Dauda, ǝn pur a tàu male. Mǝ nda nlero dǝmbari mǝ tàne.§22:16 Ɓalli gbal aɓa: Isha 11:1,10.
17 Bangŋo mala Ɓakuli andǝ Māfela, à kǝ na ama, <<Yiu!>>
Ɓwa mǝnana kat ok mǝnia yì cau ka, ɓǝ̀ na ama <<Yiu!>>
Ɓǝ̀ mǝsamur wal kǝɓwa ka, ɓǝ̀ yiu! Ɓwa mǝnana earce ka, ɓǝ̀ yi nu mur yilǝmu ɓà.*22:17 Ɓalli gbal aɓa: Isha 55:1.
18 Ən nggǝ nunkir koya ɓwa na kat kǝ ok acau mala ɓangnǝa mǝnana à gilǝia aɓa malǝmce mǝnia ka:
Ɓǝ̀ kǝɓwa tsǝk ɓe amur agir mǝnana à gilǝe akani ka, Ɓakuli nǝ̀ tsǝki wi ɓe amur agir yinǝ tanni twal la mǝnana à kanicea aɓa mǝnia yì malǝmce ka. 19 Sǝ ɓǝ̀ kǝɓwa amsǝ ɓekǝ gìr aɓalǝ acau mala malǝmce ɓangnǝa mǝnia ka, Ɓakuli nǝ̀ amsǝi wi kāmbe male. Pà nǝ̀ kùmô nǝ̀ li ɓǝlanggun yilǝmu ɗang, sǝ pà nǝ̀ kutio aɓa nggea-là mǝfele mǝnana à kaniki ce aɓa mǝnia yì malǝmce ka ɗang.
20 Yì, yì ɓwa mǝnana kǝ bang ama amǝnia yì agir ka mǝsǝcau na ka, kǝ na ama, <<E, mǝ ndya ǝn nggǝ yiu adyan tù ka!>>
<<Ɓǝ̀ do anggo! Yiu, Mǝtalabangŋo Yesu!>>
21 Ɓǝ̀ ɓwamuru mala Mǝtalabangŋo Yesu do atà aɓwana mala Ɓakuli.†22:21 Ɓalli gbal aɓa: 2Tas 3:18.
*22:2 22:2 ɓuri na ace walkwánó mala anzali mala aɓwapǝndǝa Ko <<nda ace twalban atanni mala aɓwapǝndǝa.>>
†22:2 22:2 Ɓalli gbal aɓa: Tite 2:9.
‡22:3 22:3 Ɓalli gbal aɓa: Zak 14:11.
§22:4 22:4 Ɓalli gbal aɓa: Ang 17:15.
*22:11 22:11 Ɓalli gbal aɓa: Dan 12:10.
†22:12 22:12 Ɓalli gbal aɓa: Isha 40:10; Ir 17:10.
‡22:13 22:13 Ɓalli gbal aɓa: Isha 44:6; 48:12.
§22:16 22:16 Ɓalli gbal aɓa: Isha 11:1,10.
*22:17 22:17 Ɓalli gbal aɓa: Isha 55:1.
†22:21 22:21 Ɓalli gbal aɓa: 2Tas 3:18.