7
Diosin ciento cuarenta y cuatro mil ahuun yorafo cushushquiai cuscan
1 Ascatan afanan un oian cuscan un mato tapimai. Diosin ahuun oinmati rafu non rafuri afu nai muran imisifo un oian. Futsa fari oaiquiri niaino futsari fari caiquiri nia. Ascan futsa fari oai istafari niaino futsari fari cai istafari nia. Ascaino nihuu nishmapacufoanna. Afananricai nantifi maifoti anoa nii puifo puri puricama. Unuhuanri afanan fuchoima pusiquima raca. 2 Nan rafu non rafuri Diosin ato yonoa mai yafi unuhuan chacana huatirofo. Ascano Diosin oinmati afu nai muran ica futsari nan fari oaiquirinoashu oaiton un oian. Nocon Upa Diosin nan nipanacaton ahuun sello ya oa. Nan Diosin yonocun ahuun yorafotihuun nutatiro nantififain tapinon Diospan ahuun yorafocun.
3 Nan oquin Diosin oinmati rafu non rafuri ato oi ashcafinin yoia isca huaquin, —Manayocahuun. Diosin tanamisifo iquisi fumananqui un ato Diosin anu nutayonon nanfo Diospan yorafocun nantififain tapinonfo. Ascacun non acataima ahuara mai anoafo yafi unuhuan anoafori chacana huariyamacahuun, —ishon ato yoia. 4 Uun nica 144,000 Israelifoan aton fumananqui Diosin oinmatinin Diosin ahuun anu man ato nutan. 5-8 Nocon shuni Israeli ahuun facufo doce furonanfacufo cainni.
Iyoaton ahuun anu Judá.
Judá cachiori Rubén.
Rubén cachiori Gad.
Gad cachiori Aser.
Aser cachiori Neftalí.
Neftalí cachiori Manasés.
Manasés cachiori Simeón.
Simeón cachiori Leví.
Leví cachiori Isacar.
Isacar cachiori Zabulón.
Zabulón cachiori José.
José cachiori chipo facucoin Benjamín.
Nan doce fustirasi pashcanain futsuashu icafo. Ascan nan shoco futsafo anoashu caiafo aton funafo doce mil Diosin ato catonni.
Yorahuanrasifain ato sahuuti oshopa sahuuafo
9 Ascatan Upa Diosin yafi Furun nan chashoanun facu cahuanshara cuscara tsaoano yorahuanrasi niafo tsoancai ato tanan huatiroma. Nan maifoti anoafo manifotifain sahuuti oshopa chainipa sahuucashon upu tsomafo. 10 Nanfoan oi ashcafinin yoiafo isca huaquin,
“Nocon Upa Diosin futan Furun Jesús noco nimapacuafo. Nocon Ifo Jesús nan chashoan facu cahuanshara cuscara nocohuunoashu nani nocon chaca soashoshquin non afu nipanon,”
ishon yoiafo. 11-12 Ascatan Nocon Ifo tsaoano ahuun oinmatifo afu nai muran imisifo non Jesús tanamisifo ato cushumisifo yafi nan rafu non rafuri Diosin onihuani nanfo nanno niafo. Ascashon ratoconun mai chachishon fuoshopacufoantan Dios yoisharaquin isca huafo,
“¡Aicho! Mirus fusti min icocoin. Min isharapacumisi. Mirus fustirifi min noco imasharatiro. Min nantifi onancoian. ¡Aicho! Non yopai cuscan min noco ashomisi. Ascacun nantififain min sharacoinran mia huapanacafo. Minfin ahuamamishti huatiroquin. Min nanscasi huapanaca. Nanscasi ipanon. Amen,”
ishon yoiafo.
13 Ascacun Jesús tanamisifo aton cushumisiton futsan ua yoca isca huaquin, —¿Na yorafo sahuuti osho chainipa sahuuafo raniashu fuafomun min tapiamamun? —ishon ua yoca. 14 Ascaiton un cuma, —Ma. Uncai tapiama. Minfin tapiaquin. Minfin ua yoitiroquin, —un huaiton. —Nanfo fasi omitsiscani. Ascaifoan Diospan Furun nan chashoan facu cahuanshara cuscaraton ato nashonihuunshon ato chaca soashona ato imasharanon. Nanscacun ato sahuuti oshopa shara sahuumana.
15 Ascashu Upa Diosin icano afu imisifo. Afu ishon nan Upa Diosin ato yonoa cuscan ashopacunacafo. Ascacun ato cushufafaini ahuara chacafo atoqui nocononma. 16-17 Diospan Furun nan chashoan facu cahuanshara cuscara Upa Dios fu imisi naanfin ato cushumisi ipashquiquin. Ascanocai afanan tsoa foniyamacai nomipacunacafoma. Afananricai farin ato tsacaima. Ascashon Jesús ato iyoaino unimapacunacafo. Ascacun Upa Diosin aton ointi fupuashoshquin afanan uainonfoma, —ishon yoia.