1 Ascatan ahuara iishquiai cuscan ua oinmayoa. Jesús Diospan facu nan chashoanun facu cahuanshara cuscaraton cunu tashna huamua siete man fupuquin tau huayoa. Ascan natian ahuun unutaquin futsari fupuaiton un oian. Diosin icano nai murannoashu nantifi media hora puusiyoafoma.

2 Ascatan Diosin ahuun oinmati siete afu nai muran icafoan atoti manuti inanpacua chipo ato yoiaitian chaan chaan ashquinonfo.

3 Ascaino Diospan oinmati futsan paran uhuapamashta oro faca facaitsa tsomashu Upa Dios cufiti ano nia un oian. Nan paran uhuapamashtanun ahuara inin shara coaino fia. Ascan nantifi Diospan yorafoan cufimisifo cuscan osishon Dios cufiti camaqui huaa. Nannori chaima Diosin tsaoa. 4 Ascano nan oinmati Dios fu nai muran imisi paran uhuapamashta tsomashon ahuun coin tipoi inin shara nai muran man foa. Nanscarifiai Diospan yorafoan cufiaifo cuscan Upa Diosin nan icarishon nicatiro. 5 Ascacun Upa Diosin man itishara huaa maifoti anoafo nan icoinra huafoma ato onaintimashqui. Ascashon ahuun oinmati yonoa afanan paran uhuapamashtanun cufiti sapa muran chi fospi huanon. Fospi huatan nai muranshon mai ano man pota. Ascaino mai ano fasi curushcai turuica achacoin nicafain canan piishicain mai nayanaiyaica.

6 Ascatan Diosin ahuun oinmati siete afu nai muran icafo atoti manuti inan itishara huafo chaan chaan ashcaquin.

7 Ascan futsan ahuun manuti chaan chaan acaino unu matsi tocoromishti yafi chii imia osia mai ano pacua. Ascaino mai cashcu futsa man coi cuyoa. Un tercero del maitio man coi cuyoa. Nantifi mai anoa fasifo yafi ihuifo man coi cuyoari.

8 Ascatan Diosin oinmati futsanri ahuun manuti chaan chaan acaino machi uhuapa chi urumanhuan ointsa Diosin nai muranshon potaino unuhuan muran pacua. Ascano unuhuan cashcu futsa imi ica. La tercera del unuhuan imi ica. 9 Ascaino atirifi unuhuan muran icafo man nai cuyoafo. Atirifi la tercera de shashohuanfori man coi cuyoafo.

10 Ascaino Diosin oinmati futsan arifi ahuun manuti chaan chaan acaino fishi uhuapacoin chi uruai cuscara nai murannoashu pacua. Atirifi unufo muran man pacua. Fishihuan chi uruai cuscara la tercera unufoqui man pacua. Ascashu unu tsosia sharafoquiri man pacua.

11 Nan fishihuan ahuun anu mocacoinran huamisifo. Nan unu muran pacuano la tercera unu moca ica. Ascacun yora ichaparasi nan unu ayacanashu nai futsuafo.

12 Ascatan Diosin oinmati futsan arifi ahuun manuti chaan chaan acaino farin la tercera afanan chashasharama oshuri la tercera afanan chashama. Ascaino la tercera fishifoanri afanan chashafoma. Ascashu shafata cuatro horas faquishia. Yamuri cuatro horas fasi faquishcoin.

13 Nanfo un oiainno un oianri Diospan oinmati tutumanhuan cuscara fasi cuya noyaiton un nica. Naanton oi ashcafinin yoiquin isca huaa, —¡Ohuashta! Diosin oinmati afu nai muran icafo rafu non fusti futsan aton manuti chaan chaan acaino mai ano icafo fasi mimacaia omitsiscashcani. Ascacun ¡Ai timafin! —ishon yoia.