1 Yesu apa me: «A moko, ma apa pɨ yi na paká me: kpála ɨnde ɨ lɨ bhʉ́ aga gba okandɵlɵ lɨ bhɵbhɵ-o de-e, engʉ́ bini, ɨnde ngaꞌʉ lɨ pabu aga lɨ pápá koko-o, kpála ango-o ne bhʉlʉ ’zɨ. Anɨ la di ne bhʉlʉ nagbʉlʉ ’he gba okpála ne kpéke. 2 Kpála ɨnde alɨ la naae lɨ bhɵbhɵ-o, a ko mʉlila gba okandɵlɵ-o. 3 Mʉlila na ’bhɵ aga-a ngaꞌʉꞌʉ pɨ anɨ. Okandɵlɵ-o ngadje la di ’li anɨ. Anɨ ngaꞌɨ okandɵlɵ gba e bini ne bini lɨ ’lɨ e. Anɨ la di ngapandja uo kilidjo. 4 Lɨ anɨ apandja uo hana lɨe kilidjo-o, anɨ kɵ́ kala uo, u tsia holo nakpata anɨ. Padhá de, anga u mbɨla ’li anɨ hana. 5 Engʉ́ bini, kpála bhende u mbɨla e de-e, u kpáta anɨ de. U kpé de anɨ tsutsu. Padhá de, anga u mbɨla ’li anɨ de.»

6 Yesu akpokpo gbitaku bhomʉ-o pɨ okpála ɨnde adʉ adje anɨ-o. La-a, u mbɨla nanɨ ta engʉ́ ɨnde anɨ adʉ apa e pɨ uo-o de.

7 Abhomʉ-o, Yesu atsia apa matá me: «A moko, ma apa pɨ yi na paká me: ma ne ’bhɵ aga gba okandɵlɵ-o. 8 Ndʉ okpála hana ɨnde ago mʉma kalanʉ-o, a ko obhʉlʉ ’zi. A ko la di obhʉlʉ nagbʉlʉ ’he gba okpála ne kpéke. Engʉ́ bini, okandɵlɵ-o dje uo de. 9 Ngama-a, ma ne ’bhɵ bhotɨ. Kpála ɨnde alɨ́ lɨ pá bɨlɨ gba ma-a, anɨ kóbho. Anɨ tɨ́ da nalɨ, anɨ kóto, anɨ tsia sía di ehe nazʉ mazʉ. 10 Bhʉlʉ ’zi ago bha naae ngʉbula nazi ’he. Anɨ ago ngʉbula nabhɵbhɵlɵ mabhɵlɵ. Anɨ ago ngʉbula nasisiti masiti. La ngama-a, ma ago ngʉbula me okandɵlɵ sia mʉkobho, u sia mʉkobho ango-o bhelé.

11 Ma ne bádha mʉlila gba okandɵlɵ. Mʉlila na babadha gba okandɵlɵ-o bedhe ngʉ́ naha mʉkobho gba e pɨ okandɵlɵ gba e-o. 12 Kpála ɨnde ngamene kulu bha bini ngʉbula tɨa-a, a ko kʉkʉlʉ mʉlila gba okandɵlɵ-o de. A ko okandɵlɵ ka anɨ de. Lɨ anɨ u me sia ngago-o, anɨ há holo, anɨ ꞌó ká uo. Abhomʉ-o, lɨ sia-a tɨ́ pɨ́ uo, anɨ tsia tsámbala uo. 13 Padhá de, anga anɨ ngamene bha naae kulu ngʉbula tɨa. Anɨ la di ne ndjinga uo ade. 14-15 Ngama-a, ma ne mʉlila na babadha gba okandɵlɵ. Maka lɨ ’Dyɨ ma ambɨla ma lɨe, ma atsia ambɨla di anɨ-e, ma ambɨla okandɵlɵ gba ma-o, okandɵlɵ gba ma-a atsia ambɨla di ma. Ma la di bedhe ngʉ́ naha mʉkobho gba ma-a pɨ okandɵlɵ gba ma-o. 16 A ka ma ne okandɵlɵ koko ɨnde bhʉ́ aga ɨnde-e ade. A ayo me ma go di ne uo. U adjé ’li ma. U akólo koli piga okandɵlɵ bini, u tsia dʉ́ ne koli mʉlila bini.

17 ’Dyɨ ma ngakʉnda ma, anga ma bedhe ngʉ́ naha mʉkobho gba ma-a, amba pɨpɨta-a, ma sia matá. 18 Kpála bini ha mʉkobho gba ma-a ne kpéke de. Engʉ́ bini, ma ngahaha bha ngama. Ma ne angu ngʉ́ nahaha, ma la di ne angu ngʉ́ nasisia. Ma asia lɨ́lɨ bhomʉ-o ka ’Dyɨ ma.»

19 OmaYuda atsia agbogbo matá bhʉsʉ o ka oeli bhomʉ-o. 20 Bhelé bhʉ́ ká uo adʉ apa me: «A abhʉ́ anɨ ne siti bua ! A ko la di bhʉlʉ pele! Yi ngadje anɨ ka nɨ?» 21 Okoko adʉ apa me: «Kpála ɨnde bhʉ́ e ne siti bua-a tɨ da napa ’ngʉ́ mo-o de. Siti bua tɨ da nabhulu djila okpála ɨnde ɨ u ’kpɨ́ de-e uu?»

22 Abhomʉ-o, bhʉ́ gʉdhʉ na Yelusalema-a, bhʉ́ nedhɨnga na zini-e, u amene anokomɨa Naleke ’ngbé ’tɨ Ebhe gba omaYuda-o . 23 Bhʉ́ ’ngbé ’tɨ Ebhe-e , Yesu adʉ adhʉkʉ sa ngba ’tɨ gba Salomo-o. 24 Abhomʉ-o, omaYuda asa lɨo dengo anɨ ngbalina. U atsia apa pɨ anɨ me: «Bua ya adʉ́ bha ka mʉ me a nde alʉ abhʉ́lá má gba me-e ngʉbula ekpɨ́ madho? Ɨ dʉ me mʉ nde ne Masɨya-a , mʉ de pa pɨ ya mbámbá.» 25 Yesu agie pɨ uo me: «Ma apa pɨ yi apa. Engʉ́ bini, yi zɨba ma de. Ongamba ’ngʉ́ ɨnde ma ngamene e ne ’lɨ ’Dyɨ ma-a, a ngakpokpo ’ngʉ́ gba ma-o. 26 Engʉ́ bini, yi bhuka de anga yi ne okandɵlɵ gba ma-a ade. 27 Okandɵlɵ gba ma-a ngadje ’li ma. Ma ambɨla uo, u la di ngakpata ma. 28 Ma ngaha mʉkobho na dʉdʉma pɨ uo. U mú dʉdʉma de. Kpála bini tɨ́ la di da nagbʉlʉ uo ka ma de. 29 ’Dyɨ ma ɨnde aha uo mʉma-a, anɨ ngbéngbé ane ndʉ ’ngʉ́ hana. Kpála bini tɨ́ la di da nagbʉlʉ ’he bini ka ’Dyɨ ma de. 30 Ngaya ne ’Dyɨ ma-a, koli ya bha bini.»

31 Abhomʉ-o, omaYuda abha matá teme ngʉ́ natʉtʉlʉ anɨ ne di. 32 Yesu agie pɨ uo me: «Obabadha ’ngʉ́ bhelé ɨnde ma asuno e pɨ yi-e, ayie ka ’Dyɨ ma. A ko ngʉbula obabadha ’ngʉ́ bhedho yi ngakʉnda nabhɵlɵ ma lɨe ne teme?» 33 OmaYuda agie pɨ anɨ me: «A ko de me ya ngakʉnda nabhɵlɵ mʉ ne teme ka bádha ’ngʉ́-o de. Engʉ́ bini, a ko anga mʉ ngasobho Ebhe. Ngamʉ ɨnde bha ne kpála-kʉtɨ-e, mʉ ngaꞌo lɨmʉ maka Ebhe.»

34 Yesu agie pɨ uo me: «U aye bhʉ́ lɨ́lɨ gba yi-e me, ngama-a, ma apa me: ‹Yi ne oebhe.†10:34 Tsia bhʉ́ Ets. 82:6.› 35 Ya ambɨla me, u tɨ da nabʉlʉ engʉ́ ɨnde lɨ Bhuku gba Ebhe-e apa e de. Okpála ɨnde lɨ eli gba Ebhe-e akolo nanɨ gba o-o, u aꞌɨ uo me oebhe. 36 Engʉ́ bini ngama-a, Ebhe abhʉ ma, anɨ atsia atima ma pɨ́la doto. Lele pɨ yi ngapa la lɨe me ma ngasobho Ebhe, anga ma ngapa me ma ne Ndɨlɨ gba Ebhe-e? 37 Ɨ dʉ me ma nde ngamene ngamba ’ngʉ́ gba ’Dyɨ ma ade-e, yi abhúka ma de. 38 Ɨ dʉ la me ma nde ngamene ngamba ’ngʉ́ gba ’Dyɨ ma-a, abana yi bhuka ma de-e, yi de bhuka ngabha mbo ongamba ’ngʉ́ ango-o. Yi bhuka ongamba ’ngʉ́ ango-o ngʉbula nambɨla ndjɨndjɨ me ’Dyɨ ma ngakobho bhʉ́ ma, ma la di ngakobho bhʉ́ anɨ.» 39 Abhomʉ-o, u agɨlɨ matá naholo anɨ. Engʉ́ bini, anɨ atsia akobho sa ’kpa uo.

40 Yesu atsia agie matá lɨe ayi ’ngu na Djʉlʉdanɨ, lɨ bɨlɨ ɨnde lɨ Djaa adʉ nanɨ abatisa okpála lɨ e kalanʉ-o. Anɨ atsia adʉ oo. 41 Okpála bhelé ago nabhaka anɨ. U adʉ apa me: «Djaa mene ngamba ’ngʉ́ belegʉ de bini. Engʉ́ bini, ndʉ ’ngʉ́ hana ɨnde anɨ apa nanɨ e pɨndjɨ kpála ɨnde-e, a ko kʉkʉlʉ ’ngʉ́.» 42 Oo, okpála bhelé abhuka anɨ.