Aposel Yon bung xailongdi mala rangua riang hatuminga haringinamdi. Tauxu xailong luwa li ba,
2 Yon
Namua Yon Bung Xailonginoa
Aposel Yon, Sebedi garanoa bung xailongga li. Mana bungina baguba lipuadi daxap ulek xaiyua mala dahaxa mauli, saing lipu hatuminga haringinamdi bagula daxapdi bu lobu ranguadi. Ne lipu tubatubainga languangamdi dilibu bila ba xauna, binabu Yon bung, bo ba lipu hatuminga haringinamdi dimaxania bu daxap lipu maxunamdi ding ganiding. Bung xailongga li bila niani AD 87.
Haruanga Tuandi
• Haruanga mugamugangam (1-3)
• Gamona yaha (4)
• Bo ba dimaxania (5-11)
• Haruanga kimuam (12-13)
1
1 Nga sabunga yanaminoa.
Ngabung xailongga li mala ranguaung haingga Urana mogung ugabu garamdi.*Lipu teladi dahatum ba Yon bung xailongga li na haing tela, ne teladi daharua ba harua saha mana bakbak hatuminga haringinama duwa mana long sabangga ba. Garandi bing lipu taining tainina maluxuʼm bakbakka ba. Mana maxixinga 13, hamunganoa bing bakbak hatuminga haringinam tela wa mana long sabanga tela. Maxung sibuna nga murugu sibuna mang. Nga ganigu te, ne lipu longgalo daxap ulek maxunama masup ba, ding muruding sibuna mang xauna. 2 Am murumam sibuna mang namua na ulek maxunama wa maluxu makira, saing bagula wa rangua kira bungingbunginalo.
3 Urana Tibura xaung Garanoa Yesu Kristo tang atiding dimoti makira, xaung tang dusinga kira, xaung tang dilibu gamoradi duwa mosiu. Kuboluding tuwadi ba bagula tung duwa rangua kira bungina tahaxa walingaria tatuxu haruanga maxunama xaung kubolu murungam sibuna.
4 Gamogua yaha sibuna ba ngabagu garam teladi dahaxa disu mana ulek maxunama, bila Tibura hanaunau kira ba. 5 Baing haing, hatata ngabung hanaunaunga haun tela naung te. Ne ngabung hanaunaunga taxap muga bungina tahatum haringina. Ngaxusungaung ba murura sibuna makira. 6 Baing kubolu murungam sibuna bing: Tahaxa walingaria tasu mana hanaunaungandi. Hanaunaungua sina bing ahaxa walingaimia muruim sibuna mang. Hanaunaunga taininau bila alungu bungina ahatum haringina muga ba.
7 Ngaharua bila ba namua na lipu murakkam xumana dila mana titi hataing hataina, saing dibaxanga ba Yesu Kristo ma titia sok lipu sibun te. Lipua na bila ba lipu murakkam xaung Kristo bixuanoa. 8 Amaxania xai, nam axamana awaxata haringina mana hanggalang. Ne amaxania xai bu axap haxuyangaim longgalo. 9 Lipu gaxarea didali Kristo tubatubainganoa xaung diyunga daxanganoa, ding ditaga rangua Urana te. Ne lipu gaxarea duwauyu Kristo tubatubaingania ditaga rangua Tibura Garanoa tang. 10 Nabu lipu tela ma ranguang, ne xap tubatubaikka li rangua te, bing labu axap lipua ba lobu ranguanggu tai. Baing labu aharua xaidap xai nau tai. 11 Namua na lipu gaxarea harua xaidap xai na lipua na bila ba, bing baba oxatang dianoa.
12 Haruangagu xumana ba ngabung mala ranguang, ne heku ngabungdi xailongia xaung xaswia. Ne ngabo ba ngama ngabagu ramramoimdi saing taharua suxunguria, bu gamoradi dibaxagi mana yahangua.
13 Hamungama†Ubagu haruanga hawama mana maxixinga 1. Lipu teladi dahatum ba hamunganoa bing bakbak hatuminga haringinam tela wa mana long sabanga tela. Urana mogu ba, garandi daharua xaidap xai naung.
*1:1 Lipu teladi dahatum ba Yon bung xailongga li na haing tela, ne teladi daharua ba harua saha mana bakbak hatuminga haringinama duwa mana long sabangga ba. Garandi bing lipu taining tainina maluxuʼm bakbakka ba. Mana maxixinga 13, hamunganoa bing bakbak hatuminga haringinam tela wa mana long sabanga tela.
†1:13 Ubagu haruanga hawama mana maxixinga 1. Lipu teladi dahatum ba hamunganoa bing bakbak hatuminga haringinam tela wa mana long sabanga tela.