1 Toxoratamona owa masok mana Ebraham haxek mana xai sabangadi Mamre bungina rung ginak xaluya ila xahina, longa sala mana xaidapka baguba. 2 Ebraham bagu mahaing mala saing bagu ba lipu tuwadi dili haxek. Bungina bagudi luki xahi xaluxinia mala ranguadi saing gung king tuxundi xaung turu mari titia.✡Hibru 13:2

3 harua ba, “Lipu sabanga, nabu uyaha manga, bing uwa mongaita rangua nga lipuxim oxata olanggama. Lipu sabanga ngayua labu udali lipuxim oxata loanggamau tai. 4 Lipuxigua oxatama bagula xap lang kaxukang tela ma bu adamia kimdi xaung ayagua hawa’m xai. 5 Bagula ngaxauxau anginga teladi nang bu axang to, binabu axap haringingua baing alauba, hatata ang ba ama mana lipuxim oxata olanggama.”

Dahaxuya ba, “Xai sibuna, ulibu bila uharua ba.”

6 Bina Ebraham luki sap maluxu xahia na Sara, saing harua ba, “Ugoligoli, oxop wit gagabin mina tuwadi saing uxugiadi rangua langa bu utau salangadi.”

7 Baing ina luki mala na bulmakau buranga suxuya mana murunganoa, xap garang dungmanangan tela saing sina na lipuxing oxata olanggam tela gaxarea sanga xauxau sap. 8 Baing xap langga bila su langing ramramuniaginganam*Sis anginga ditongtongia mana bulkmakau susuna ne haring monga. xaung su langina xaung bulmakau garan dungmanangana ditau ba ma nadi. Daxang mua baing ina li haxek ranguadi hawa xai namuya.

9 Duxusunga Ebraham ba, “Hainima Sara kabi?”

Haxuya ba, “La lo xahi lunia.”

10 Baing tela liwe mading harua ba, “Maxung sibuna bagula ngagoxoya ma ranguaung mana xaidapka baguli niani etuama saing hainima Sara bagula hayau gara lup tela.”✡Rom 9:9

Sara lungu mua taxa xaluya ila xahia, ala wa kimuya maina. 11 Ebraham wa duanga xaung Sara wa xanronggi ba, saing Sara bing dali bunging hayauxingama ba. 12 Binabu Sara masisiaina bila hatumia ba, “Ngawa xanronggi saing lipuxigua sabanga xauna wa duanga ba, baruta bagula ngayaha ba ngakinu rangua?”

13 Baing Toxoratamona harua na Ebraham ba, “Baruta Sara masisi saing harua ba, ‘Ngawa xanronggi ba? Maxunam bagula ngaxap gara?’ 14 Axamang tela haxi mana Toxoratamona?✡Luk 1:37 Bagula ngagoxoya ma mana xaidapka baguli niani etuama, saing Sara bagula xap gara tela.”

15 Sara maxuwa, binabu langua saing harua ba, “Ngamasisi te.”

Ne harua ba, “Wane umasisi baing.”

16 Bungina lipu tuwadi dimesa ba dila, dibagu mari saha na Sodam. Ebraham haxa mala xauna ranguadi ba yungadi mala. 17 Baing Toxoratamona harua ba, “Bagula ngahisa mana Ebraham mana axamang baruamta ngabo ba ngalibu?” 18 Ebraham bakbagindi bagula disok sabanga saing haringingading, numanuma longga titia bagula ngaguxamdi mana ina. 19 Mana ngamogu bagula harua na garandi xaung bakbakkadi kimu mana bu dinaxu’m Toxoratamona haruanganoa bu dilibu kubolu xai maringindi binabu Toxoratamona bagula libu axamang baruamta hau haruangua rangua Ebraham mana ba.

20 Baing Toxoratamona harua ba, “Tinang sabanga xumana Sodam xaung Gomora mana kuboluding diandi libudi ayangading 21 binabu bagula ngari mala saing ngabagu kubolua diang baruamta bila tinang sabanga ma sok manga. Ne tegu, bagula ngaxabia.”

22 Lipuadi duxugia saing dila sanga na Sodam ne Ebraham wauyu rangua Toxoratamona. 23 Baing Ebraham ma haxek saing harua ba, “Bagula usogoxoya maringindi xaung diandi? 24 Baruta nabu 50 lipu maringinamdi duwa gananga sabangia? Bagula maxung sibuna usogoxoya mala kimbo ulibu xai mana longa bila 50 lipu maringindi duwa maluxu? 25 Mana ung na utongtongia axamanoa ba ung lipu maringindi xaung lipu diandi, ulibu maringina xaung diana maxang taininau. Mana ung! Bagula usuxuya titi longgalo maringina?”

26 Toxoratamona harua ba, “Nabu ngabagu 50 lipu maringindi maluxu’m gananga sabangga Sodam nga bagula ngalibu xai mana ding longgalo mana lipu 50 maringindi.”

27 Baing Ebraham harua mahaing muli: “Hatata bing nga sanga ba ngaharua na Toxoratamona, heku nga axamang olang ne gagap xaung hayata, 28 baruta nabu titingua mana lipu maringindi bila 5 hawa mana 50? Bagula uhanggalangia longga mana titinga kaxukana bila lipu 5?”

Harua ba, “Nabu 45 lipu maringinamdi duwa la ba, nga sanga ba ngahanggalangiadi te.”

29 Ebraham harua na muli ba, “Baruta nabu 40 ding ganiding duwa la ba?”

Harua ba, “Mana 40 maringindi la ba bagula ngalibu te.”

30 Baing harua ba, “Bola Toxoratamona atin disala te, ne ngabo ba uyunga nga bu ngaharua. Baruta nabu 30 ding ganiding duwa la ba?”

Haxuya ba, “Nga bagula ngalibu te, nabu 30 duwa la ba.”

31 Ebraham harua ba, “Hatata nga sanga ba ngaharua na Toxoratamona, baruta nabu 20 ganiding duwa la ba?”

Harua ba, “Nabu 20 ganiding bagula ngahanggalangiadi te.”

32 Baing harua ba, “Bola Toxoratamona sanga atim disala manga te, ne ngabo ba ngaharua naung muli, baruta maringindi 10 ganiding duwa la ba?”

Haxuya ba, “Mana 10 ding ganiding bing bagula ngahanggalangiadi te.”

33 Bungina Toxoratamona sahi haruanganoa rangua Ebraham, ila saing Ebraham goxoya ma numia.