IOANE ENA REVAREVA
IHATOINA
1
Lau heitatao taugu ese egu lalokau Gaio na tore henimumu. Hereva momokani ai na lalokau henimumu.
Egu lalokau taumu e, na ura lalo-dikamu oi na ḡau iboudiai lalodiai ba namo, bona tau-animu danu baine namo, laumamu e namomu heḡereḡerena. Varavarada haida ema, e hamaorogu oi na kara momokani taumu eto, bena na moale bada, hereva momokani dalana ai o rakamu dainai. Moale bada-herea egu ai badina binai: natugu haridia na kamonaimu, idia be hereva momokani dalana ai e rakamu.
Egu lalokau taumu e, varavarada bona laolao taudia o abidia dae na heabidadama ḡaukarana namona. Idia ese ekalesia oreana vairadiai oiemu heabi-dae karadia vada e gwaurai hedinarai. Edia laolao ai ba kahadia baine namo herea, Dirava ibadinana karana. Badina be ia ladana dainai e raka lasi, bese idau-idau taudia edia amo ḡau ta asie abia. Taunabunai, ita ese baita abidia dae baine namo; unu amo hereva momokani ikahalaina tauda ai baitala.
Ekalesia oreana na tore henidia, a Diotrefe, sibona e heimodaimu tauna, ese e dadaraimaimu. 10 Una dainai, baina vasi negana ai, ena kara baina lalo tao. Ia ese hereva dikadia amo e maumauraimaimu; a dia una mo, varavarada danu se abidia daemu, bona iabi-daedia e uramu taudia ia ese e gwaudia tubumu bona ekalesia oreana amo e atodia tabemu.
11 Egu lalokau taumu e, dika basio haḡoia, a namo hari. Kara namo e karamu tauna na Dirava ena; a kara dika e karamu tauna ese Dirava se itaia. 12 Demetrio be harina namo tauna, taunimanima iboudiai bona hereva momokani ese namona e gwauraiamu. Ai danu unu a gwauraia tomamu, bona umui dibamui ai emai hereva na momokani.
13 Hereva hoho aina tore henimu na tomu, to ink bona pen amo basina tore. 14 Asi vanahana baina vasi itamu na tomamu, bona baita hereva heheni. 15 Maino emu ai baine mia. Turamu iniseni ai e hahenamo henimumu. Turagu eneseni ai ta ta ladadia ba hato, ladagu ai ba hahenamo henidia.