IUDA ENA REVAREVA
1
Lau luda, Iesu Keriso ena hesiai taugu, Iakobo tadina, e abimui hidi taumui, Tamada Dirava ese e lalokau henimuimu bona Iesu Keriso ese e gimamuimu taumui, na tore henimuimu: hebogahisi bona maino bona lalokau emui ai bae bada.
Egu revareva badina
Egu lalokau taumui e, iseda hahemauri herevana baina tore henimui nato, to, kara ta dainai na tore henimuimu. Na haduamuimu, ta abia daemu herevana, helaḡa taudia e heni-dia vaitani herevana, ba gimaia goadagoada. Badina be haida ese dekemui ai vada e rau vareai hehuni, idau nega ai davadia e gwaurai guna taudia, Dirava asie badinaiamu taudia; idia ese iena harihari-bada na lebulebu ḡauna ai e halaoamu, bona biaguda tamona, Lohiabada Iesu Keriso, e ḡoreamu.
Nahuamui ba toho, koikoi garina
Lau na uramu gunaguna o dibava ḡaudia baina hahelalolaimui une. Lohiabada ese bese ta Aigupto tanona amo e hamauridia, a gabeamo asie kamonai henia taudia na e habuadia. Aneru haida danu, edia dagi korikori asie laloa tao, bona edia gabu korikori e rakatania; bena ia ese dibura gabuna ai e atodia, mia-hanaihanai gadeadia ai e ḡuidia, unuseni ai bae noho ela bona dina badana hahemaorona negana. Sodoma bona Gomora bona dekedia hanuadia danu unuheto: heuda-hanai bona kara bodagadia e karava mai lalodia idoidiai, davadia na mia-hanaihanai lahina ai e abi, ita matada ihakanidia.
Ini nihi taudia ese danu tau-anidia unu e hadikadia tomamu, siahu taudia e dadaraidiamu, bona hairai anerudia e ḡonaḡonalaidiamu. A Mikael, aneru ikwaradia, diabolo ida e hepapahuahu, Mose tau-anina e hepapahuahulaia, negana ai na se ere dika henia, a e hereva henia, eto “Lohiabada ese baine gwau henimu”. 10 A ini na herevalaidiamu taudia ese asi dibadia ḡaudia e ḡonaḡonalaimu, bona boroma edia diba heḡereḡeredia dibadia ḡaudia na sibodia ihadikadia ḡaudia ai e halao. 11 Madi, ihabaidia! Kain ena dala ai vada e raka. Balaam ena kerere vada e heau henia, kohu iabina totona. Kora ena gwau-hemuri ai do bae mase.
12 Idia na umui ida o anibou negadia ai, emui anibou e hadikamu, e anianimu, bogadia e hakunumu, asie garimu. Idia na dagadaga asi medudia, lai ese e odadia lao odadia maimu, na heheto. Idia na au na heheto, raudia e hehuhumu, huahuadia na lasi, vada e mase vaitani, mai ramudia ida e ragadiamu. 13 Idia na davara hurehuredia na heheto, edia hemarai e hedinaraimu gwaragwara na heheto. Idia na e morumu hisiudia na heheto, mia-hanaihanai diburana ai bae bodo.
14 Adam ena amo uru ihahituna tauna, Enok, ese idia e gwauraidia guna, eto “A itaia, Lohiabada vada ema, mai ena helaḡa taudia gerebu gerebu ida; 15 taunimanima iboudiai baine hahemaoro henidia, bona Dirava asie badinaiamu taudia baine dunidia dae, Dirava idadaraina karadia e kara daidiai bona Dirava ihadikalaina herevadia aukadia e gwaurai daidiai”. 16 Idia na ḡonaḡona bona maumau taudia; edia heḡahusi karadia mo e karamu. Ududia amo heaḡi herevadia e lasimu; taḡa taudia danu e imodaidiamu, kohu iabina totona.
Ba goada
17 Egu lalokau taumui e, iseda Lohiabada Iesu Keriso ena aposetolo taudia ese e hamaorolaimuiva herevadia na ba lalo tao. 18 Idia ese e hamaoromui, eto  “Nega dokona ai ḡonaḡona taudia bae hedinarai, sibodia edia heḡahusi karadia bae kara”. 19 Heiri-heiri ihavaradia taudia bunu, tau-anidia e lalomu taudia, Lauma na asie abia. 20 A umui, egu lalokau taumui e, emui abidadama helaḡana latanai emui mauri ba hadaia. Lauma Helaḡa ai ba ḡuriḡuri. 21 Dirava ena lalokau ai ba noho. Lohiabada Iesu Keriso ena hebogahisi ba laroa; ia ese mauri hanaihanai dalana ai baine hakaumui. 22 Daradara taudia ba bogadia hisi. 23 Haida lahi lalona amo ba veridia oho, ba hamauridia. Ma haida ba bogadia hisi, to mai garimui ida; tau-anina ese e hamiroamu dabuana na ba inai henia.
Heimodai
24 Mai siahuna ida baine gimamui bena basio keto Diravana, asi bebekabebekamui ia hairaina vairanai baine atomui mai moalemui ida Diravana, 25 Dirava tamona, eda Lohiabada Iesu Keriso bagunai e hamauridamu Diravana: hairai bona dagi bona goada bona siahu baine abi, harihari ela bona hanaihanai. Amen.