1 ይ ጋንጨፕ ፐታይ ፐታይር ሞቶ የዛኮ፥ የያ አማንዛ አሳይ ቲና ፕርድንቶዳና አሺ አማኖዋ አስ ቲና ፕርድንቶዳይስ ዋይዚ ቤዜ? 2 ጌሽታይ አላመል አፋ ፕርዶዳና ይ ኤሮሳ? የዝን፥ ይ አላመል አፋ ፕርድዛ ባዝ ማቅኮ፥ Ꮊይ ጋርክ ጽቃባዝ ፕርዶዳይስ ዋይዚ ዳንዳእንቶሳ? 3 ኑኒ ኪታንችታይል አፋ ፕርዶዳና ይ ኤሮሳ? የዝን፥ Ꮊ ሳአ የሳል አፋ ፕርዶዳይስ ይንታን ዋይዚ ጋመ? 4 የዝን፥ የይ ጋርክ መቶ ይ ጋንጨ መꬍንትኮ፥ ዎሳ ኬꬅ ፐትፐተꬃፕ ባለር የዝታይኮኔ ቦርንቴዝ አሳይ ቲና ፕርድንቶዳይስ ዋይዚ ካንጌ? 5 ታኒ ይንታን ዬላሶዳይስ የያ ግዛ። ይ ጋንጨ ካጭንቴዝ አስታ እንግꬆዳይስ ዳንዳእዛ አካክዛ አሲ ባሳ? 6 የዝን፥ ፐቲ አማንዛ እሻይ Ꮊንኮ አማንዛ እሻና ፕርዳ ኬꬅ አማኖዋ አሳይ ቲና ሞቶዳይስ ቤዝኔ?

7 ይኬ፥ ይ ፐታይ ፐታ ሞትዛባዝ ማቅኮ የይ ይ ፖክꬃ ቤዝዛ። የይፕ ይ ቆህንትኮኔ ዶሽንትኮ ሎኣሞ? 8 ዝን ይ ዎል ጋንጨ አማንዝታይ ፐታይ ፐታ ቆህዛኔ ዶሽዛ፥ የይካ ይ እሽታ።

9 ዎርዥታይ ጾስ ካተትꬃ ላታማና ይ ኤሮሳ? ይንታን ዶሽፓተ፤ ተንቶትዝታይኔ ላግትዝታይ ዎይ ኤቃ ጎይንዝታይ ዎይ ቃይጽንትዝታይ ዎይ ꬊራꬂ ꬊራꬃር ፔዥዝታይ፥ 10 ዎይ ካይዝታይ ዎይ ኡዝታይ ዎይ ማꬅዝታይ ዎይ ጫዥታይ ዎይ ቦንቅዝታይ ጾስ ካተትꬃ ላታሚ። 11 ይንታፕ ፐቲ ፐቲ አሳይ ቲና የይ ጋርከ። ዝን ይ Ꮊት ጎዳ የሱስ ክርስቶሳ ሱንꬃራኔ ጾስ አያናር ሜጭንቴዛ፤ ጌዤዛ፤ ጽሌዛ።

12 «ታስ ኡባ ባዝ እንግንቴዛ» ዝን ኡባይ ታና አዳሚ። «ታስ ኡባ ባዝ እንግንቴዛ»፥ ዝን አብካ ታና ሃራሚ። 1ቆሮ. 10:23 13 «ካꬃ ኡሎስ፤ ኡሎካ ካꬃስ» ዝን ጾሳይ ኡሎካ ካꬃካ ꬋብሶዳና ታ ይንትስ ኦድዛ። ኑ አሰትꬃይ ጎዳይስፕ አትን ላግታስ ባያ። ጎዳይካ ኑ አሰትꬃይስ። 14 ጾሳይ ጎዳ Ꮊይቆፕ ደንꬄዛይ ጋርክ፥ ኑናካ Ꮊይቆፕ ፋ ዎልቃር ደንꬆዳ።

15 ይ አሰትꬃይ ክርስቶሳ አሰትꬃይፕ ባጋ ማቄዛና ኤሮሳኔ? የዝን፥ ታኒ ክርስቶሳ አሰትꬃይፕ ባጋ ካንጊ ላግታ አሰትꬅ ማቆዳይ ጋርክ ኡዶ? ሀነና! 16 ላግትዛ አꬃይ ኤ ፔዥዝ አስትራ ፐቲ አሰትꬅ ማቄዛና ይ ኤሮሳ? ጌሻ ማጻፋይድ፥ «ኡንቲ ናምአይ ፐቲ አሰትꬅ ማቆዳ» ግንትንት ጻፍንቴዛ። መ. 2:24 17 ዝን ጎዳይራ ፐትፕዛ አꬃይ ኤዛር አያናራካ ፐቶ ማቅዛ።

18 ላግታፕ ሃኮይታ። ፐቲ አꬃይ ኦꬅዝ ሀራ ናጋራ ኤ አሰትꬃፕ ባለራ ኦስንትዛ፥ ዝን ላግትዛ አስ ፋ አሰትꬃይል ናጋራ ኦꬅዛ። 19 ይ አሰትꬃይ ጾሳይ ይንትስ እንጌዝ ይንታር የዝ ጌሻ አያና ካራ ማቄዛና ይ ኤሮሳኔ? ይ ይንትስ ባያ። 1ቆሮ. 3:16፤ 2ቆሮ. 6:16 20 ጾሳይ ይንታን ጋተር ዎንጌዛ። የይ ግሾስ፥ ይ አሰትꬃይር ጾስ ቦንቾይታ።