1 የይ ግሾስ፥ ታኒ፥ ጳዉሎሳ፥ አይሁደ ባ ማቄዝ ይ ግሾስ ክርስቶሳ የሱሳር አች አስ ማቄዛ። 2 ታ ይንታን ማዶዳይ ጋርክ ጾሲ ፋ ኣꬎ ኬሃትꬃይር ታስ እንጌዝ Ꮊ ኦሳይ ባጋ ይ ሎእꬂ ስኤዛ። 3 ታ ይንትስ ቲና ሃታር ጻፌዛይ ጋርክ ጾሲ ፋ ጹራ ቆንጭꬃር ታስ ቤዜዛ። 4 ታ ጻፌዛና ይ ናባብዛ ዎደ ክርስቶሳ ጹራ ታ አብ ጋርክ ኤሬዛኮ ይ አካኮዳይስ ዳንዳእዛ። ቆላ. 1:26-27 5 Ꮊ ጹራይ ጌሻ ሀዋርታይስኔ ናብታይስ Ꮊት አያና ባጋር ቆንጭሴዛይ ጋርክ ብኒ ዎደ አሳይስ Ꮊይ ጋርክ ቆንጭሰካያ። 6 Ꮊ ጹራይ ቤዝዛይ፦ አይሁደ ማቀካ አሳይ ዎንግለ ባጋር እስራኤልታይራ ፐትፕ ጾስ እርስተ ላትዛ። እስራኤልታይር ፐቲ አሰትꬅ ማቅዛ፤ ክርስቶሳ የሱሳ ባጋር ጾስ ኡፋይስ ቃላ ኤክዛ።

7 ጾሲ ፋ ኦꬅዛ ዎልቃይ ባጋር ታስ እንጌዝ ኣꬎ ኬሄትꬃይድ ታ Ꮊ ዎንግላይስ ኦሳንቾ ማቄዛ። 8 ታኒ ጌሽታይ ኡባይፕ ላፋ ማቅኮካ አይሁደ ማቀካ አሳይስ ዛዋ ባ ክርስቶሳ ዱረትꬅ ዎንግለ ኦዶዳይ ጋርክ Ꮊ ኣꬎ ኬሃትꬃይ ታስ እንግቴዛ። 9 ማ ብኒ ዎደ ኡባ መꬌዝ ጾሳር ቆስንቲ የዝ ጹራይስ፥ ጾሳ ቆፋይ አብዛኮ ኡባይስ ቆንጭሶዳይስ ኣꬎ ኬሃትꬃይ ታስ እንግንቴዛ። 10 ጾሲ የያ ኦꬄዛይ Ꮊተ ዎደ ዎሳ ኬꬃይ ባጋር ሳሎ የዝ ሀላቅታይስኔ ማዉተር የዝታይስ ፋ ዱማ ዱማ ኤጨትꬃ ኤርሶዳይሲ። 11 ጾሲ ፋ መꬍና ቆፋ ኑ ጎዳ ክርስቶሳ የሱሳ ባጋር ፖሎዳይስ የያ ኡዴዛ። 12 ኑ አማኖር ያሻ ባይꬅ ጾስኮ ሺቆዳይ ጋርክ ክርስቶሳ ኑስ ምኖተꬅኔ ማዉተ እንጌዛ።

13 ታኒ ይ ባጋ ኤክዛ መታይ ይንትስ ቦንቾ። የይ ግሾስ ይ ታን መትንትዛና ብኢ ኡፋይስ ጋቻማይ ጋርክ ይንታን ዎስዛ።

14 ታኒ ጾስ አዳይ ቲና ቡንቂንቲ ዎስዛይ የይ ግሾስ። 15 ሳሎኔ ሳአ የዝ መትꬅ ኡባይስ ሱንꬂ ጾሳፕ እንግንትዛ። 16 ጾሲ ፋ ቦንቾ ዱረትꬃይፕ ይ ጋንጨ አሰትꬃ ምንꬅዛ ዎልቃ ፋ አያና ባጋር እንጎድ ጋርክ ይንትስ ዎስዛ። 17 ማካ አማኖር ክርስቶሳ ይ ዎዝናይድ የሳዳይ ጋርከኔ ይ ሲቆር ጻጶ ዳኪ ሚንጊ የዞዳይ ጋርክ ታ ዎስዛ። 18 የይ ጋርከካ፥ ክርስቶሳ ሲቃይ ዋፋ ጋርክ ዳልጌዛኮ፥ አዱስዛኮ፥ ꬎቃዛኮኔ ጪሞዛኮ ጌሽታይ ኡባይራ ኤርዛ ዎልቃ ይ አካኮዳይ ጋርክ ታ ዎስዛ። 19 ኤራትꬃፕ ኣꬊዝ ክርስቶሳ ሲቆ ይ ኤሮዳይ ጋርክ እንግዛ ጾሳፕ ማቄዝ ኩንꬃትꬃይር ይ ኩሞድ ጋርክ ታ ዎስዛ።

20 ይኬ፥ ኑ ጋንጨ ኦꬅዛ ፋ ዎልቃይ ባጋር ኑኒ ዎስዛይፕ ዎይ ቆፕዛይፕ ኣꬂ ኦꬆዳይስ ዳንዳእዛ ጾሳይስ፥ 21 ዎሳ ኬꬃኔ ክርስቶሳ የሱሳ ባጋር ጾስስ መትꬅ ኡባይፕ ዎደ ኡባይድ መꬊናፕ መꬍና ሄሎዳይስ ቦንቾ ማቆ። አምንኤ።