4
1 ይኬ፥ ጾሲ ኑና ፋ ሸምፖ አቆ ገልሶዳ ጌዝ ቃላይ ሀጋ ቲናፕ የዝ ግሾስ ይንትፕ ኦንካ የ ሸምፖ አቃ ገለካ አታማይ ጋርክ ዎላ ናግንቶዳ። 2 ኡንትስ ዎንግላይ ሳባክንቴዛይ ጋርክ፥ ኑስካ ሳባክንቴዛ። ዝን ኡንቲ ስኤዝባዝ አማኖር ኤከካ ግሾስ ኡንታን ማደካያ። 3 ሀኖ ዝን፥ አላመ መꬊንቴዛይፕ አይኪ ጾሳ ኦሳይ ፖልንቴዝ ማቅኮካ፥ ጾሲ፥
«ታኒ ታ ካቻይድ ጫቄዛ፥
ታ ሸምፖ አቆ ኡባራካ ኡ ገላሚ»
ጌዛይ ጋርክ፥ ኑኒ አማኔዝታይ ኤ ሸምፖ አቆ ገሎዳ። ማዝ. 95:11 4 ላፑንꬃ ጋላስባጋ ፐቲ አቆ፥ «ጾሲ ላፑንꬃ ጋላሳ ፋ ኦሶ ኡባይፕ ሸምፔዛ» ዬጌዛ። መ. 2:2 5 ማካ የ አቃይድ፥ «ኡንቲ ታ ሸምፖ አቃ ኡባራካ ገላሚ» ዬግዛ። ማዝ. 95:11 6 ቲና ዎንግለ ስኤዝታይ ኪትንታም እጺ ሸምፖ አቃ ገለካያ። የያ ማቅኮካ፥ Ꮊተካ የ ሸምፖ አቃ ገሎ ግንትንቴዝ ፐቲ ፐቲ አስታይ የዛ። 7 የይ ግሾስ፥ ጾሲ፥ «Ꮊይኖ» ግ ጼጎዳር ፐቲ ጋላስ ኑስ ቃማ ጋዴዛ። ጋመ ዎደፕ ጉየ ጾሲ ዳዉተ ባጋር፥
«ጾሲ ግዝባዝ Ꮊይኖ ይ ስእዝ ዎደ
ይ ዎዝና ምንꬅፓተ»
ዬጊ ኦዴዛ። ማዝ. 95:7-8 8 ኢያሶ ኡንትስ ሸምፖ እንጌዝባዝ ማቄዛኮ፥ ጾሲ ሀራ ጋላሰ ባጋ ጉየፐ ኦዳምዝን። ናምእ. 31:7፤ ኢያ. 22:4 9 ይኬ፥ ጾስ አሳይስ ማላ ጋላስ ሸምፖ ጋርክ ሸምፓይ ናግንቲ የዛ። 10 ጾስ ሸምፖ አቃ ገልዛ ኦንካ፥ ጾሲ ፋ ኦሳይፕ ሸምፔዛይ ጋርክ ኤካ ፋ ኦሳይፕ ሸምፖዳ። መ. 2:2 11 የይ ግሾስ፥ ኦንካ የ አሳይ ኪትንቶ እጻ ካሊ፥ ፖካማይ ጋርክ ዎላ ጾስ ሸምፖ አቃ ገሎዳይስ ምንጎዳ።
12 ጾስ ቃላይ ደኦር የዛኔ ኦꬅዛያ። ናምኢ ባጋር ሌፍንቴዝ ማሻፕ ኣꬊ ኦጮ። ኤ ሸምፖ፥ አያና፥ ጻጶኔ ኮልእዘ ሄሎዳይስ ሳትሲ ጫድዛ። ማ አስ ዎዛና የዝ ቆስንቴዝ ቆፋኔ አሞ ሻኪ ፕርድዛ። 13 ጾስ ቲናፕ ቆስንቴዝ አባ መትꬅካ ባያ። ኤ ኣፈ ቲና ኡባ ባዝ ቆንጨኔ ካሎ የዛ። ኑኒ ማህꬅ እንጎዳይስ ቤዝዛይ ኤ ቲናይዳ።
የሱሳ ኡባይፕ ኣꬎ ቄሰ ሀላቃ
14 ይኬ፥ ሳልታይል አፋ ከዜዝ ኡባይፕ ኣꬅ ቄሰ ሀላቃይ፥ ጾስ ናአ የሱሳ፥ ኑስ የዛ ግሾስ ኑ አማና ሚንꬂ ናጎዳ። 15 ኑ ቄሰ ሀላቃይ ኑ ዳቡሮዳር ኑስ ቃꬊንቶዳይስ ዳንዳእዛያ። ኤ ናጋራ ኦꬄካ፥ ዝን ኑ ጋርክ ኡባ ባዛር ፓጭንቴዛ። 16 ይኬ፥ ማሮትꬅ ኤኮዳይስኔ ማዴ ኮሽዛ ዎደ ኣꬎ ኬሃትꬃይፕ ደንጎዳይስ ኣꬎ ኬሃትꬃይ የዛ አቆ ጾስ ዙፋናይኮ ያሽተካ ሺቆዳ።