12
ጾስ ኑ አደ
1 ይኬ Ꮊይትታ ኣዝዝ ማርክታይ ሻራ ጋርክ ኑ ላንቃይር የዝኮ ኑካ ቶፎ ኡባ ኤልሲ ኑና ማርዛ ናጋራ ኑፕ ሃሲ፥ ኑ አማናይስ ኦማኔ ፎሎ ማቅዝ የሱሳና ብኢ ኑ ቲናይድ የዝ ዎꬃ ዳንዳአር ዎላ ዎጾዳ። 2 ኤዚ ኢታ ባዝ ኡባ ለቂ ፋ ቲናይድ የዝ ኡፋይሳይስ ማዝቃለል ጋርዢ ጾስ ዙፋነ ኡሻቻ በቴዛ። 3 ይኬ ይ አዛለካዛራኔ ዳቡረካዛር ናጋራንችታይፕ ኤዛ ሄሌዝ እጾ ኡባ ጋርዤዝ የሱሳና ቦኦይታ። 4 ይ ናጋራራ ቡትንትታር ሀጋ ሱꬂ ላልንቶድ ጋꬆ እጸካያ። 5 ጾሲ ፋ ናአ ጋርክ ይንታን፥ ዬጊ ዞሬዛና ይ ዶጌዛ። ኢዮ. 5:17፤ ኣዝ. 3:11-12
«ታ ናአዮ ጎዳይ ሴራ ለቂፐ፥
ኤ ነና ካጭዝ ዎደ ዳቡርፐ፥
6 ጎዳይ ፋ ቃꬍዛ ናአ ካጭዛ»
ፋ ናአ ጋርኪ ኡዲ ቢኢዛና ሴሪዛ።
7 ጾሲ ፋ ናአ ግ ይንታን ሴርዛ ግሾስ ዳንዳኦይታ። አደ ሴሮዋ ናአ ኦኖ? 8 ናአ ማቄዝ ኡቢታይ ኤክዛ ሴራ ይንትካ ኤካም እጽኮ አደ ኤርንቶዋ ናእታፕ አትን ናእታ ባያ። 9 የይፐካ ኣꬅ ኑና ሴርዛ አሾ አድታይስ ኑካ ያሽትዛ፥ የዝን ሸምፖር የዞዳይስ አያና አደ ማቄዛይስ አዛዝንቶዳይስ ዋይዚ ቤዞሳ? 10 ኡንቲ ፓስ ሎኤዛይ ጋርክ ጽቃ ዎደስ ኑና ሴሬዛ፥ ኤዛ ማቅኮ ኑና ኤ ጽሎትꬃ ግሽንቶድ ጋርክ ኑና አዶዳይስ ሴርዛ። 11 ሴራ ኡባይ የ ሳታይድ አዛንꬅዛ ባዛፕ አትን ኡፋይስዛ ኣዞያ፥ ጉየፕ ኤሪ ዉርኮ ሳሮትꬅ ኩሜዝ ጽሎትꬅ ኣፈ ቤዝዛ።
ዞረኔ ናግሶ
12 የይ ግሾስ ዶልኤዝ ኩሽታኔ ልቄዝ ይ ቡንቂታ ምንꬆይታ።ኢሳ. 35:3 13 ሾልዛይ ፓጾድ ጋርከፕ አትን ቡርቃማይ ጋርክ ይ ቶካይስ ሉለ ኦገ ኦꬆይታ።ኣዝ. 4:26
14 ጌሸትꬅ ባይꬂ አሲ ጾሳ በአዳይስ ዳንዳኦዋ ግሾስ አስ ኡባር ሳሮ የዞይታ፥ ጌሸትꬃር የዞዳይስ ሚንጎይታ። 15 ይንትፕ ኦስካ ጾስ ኣꬎ ኬሄትꬅ ፓጫማይ ጋርክ ናግንቶይታ የይ ጋርከካ አባ ጫሞ ኣፈ ኣፍዝ ጻጶ ይ ጋንጨ ዶላማይ ጋርከኔ ይንትፕ ጋምታ ዋይꬃማይ ጋርክ፥ ቱንሳማይ ጋርክ ይ ጋንጨ የዛማይ ጋርክ ናግንቶይታ። ናምእ. 29:18 16 ተንቶትዛኔ ፐቲ ቶኬ ሙስስ ግ ፋ ባይራትꬅ ባይዜዝ ኤሳወ ጋርክ ማቃማይ ጋርክ ናግንቶይታ። መ. 25:29-34 17 ኤሳወ ጉየፕ አንጆ ኤኮዳይስ ኮይንካ አንጆ ካይንቴዛና ይ ኤርዛ፥ ዬኪ አፉጽ ሚንጊ ኮይንካ ደማዳይስ ዳንዳኤካያ፥ ማሮትꬅስካ ዎደ ደንገካያ። መ. 27:30-40
18 ኩሸር አይክንቶዳይስ ዳንዳእንትዛ ኤጽዝ ታማይኮ፥ ሻራይኮ፥ ꬉማይኮ፥ ጎታይኮ፥ ናሳይኮ፥ 19 የ ቱልቱላ ጊርꬃይኮ ዎይ ኦድንትዛ ቃላ ስእንትዛይኮ ይ ሄለካያ፥ ያ ቃላ ስኤዝ አሳይ ሀራ ቃላ ኑስ ጉጅንትፐ ግ ዎሴዛ። ከስ 4:11-12፤ 19:16-22፤ 20:18-21 20 «ሀራ አቶዝን ዶአ የ አምባቶ ቦችኮ ሹቻር ሾጭንቲ Ꮊይቆ» ዬግዝ አዛዛይ ዴጼዝ ግሾስ ጋርዦዳይስ ዳንዳኤካያ። ከስ 19:12-13 21 ሙሰካ «ታ ያሽትዛ ታ ኩኩርዛ» ጎድ ጋꬆ በንትዝ ባዝ ኡባይ ጋመ ያሽዝ ባዝ። ናምእ. 9:19
22 ይንታን ማቅኮ ጽዮነ አምባኮ ኡኬዛ፥ እዛካ ደኦ ጾሳይስ ካታማ ሳሎ የዝ የሩሳላማቶ፥ ይንቲ ፓይዶባ ኪታንችታይኮ ኡኬዛ። 23 ኡ ሱንꬃይ ሳሎ ጻፍንቴዝ፥ ዎሳ ኬꬅስ ባይራ ናአ ማቄዝ አማንዛ አሳይ ሺቆ፥ ኡባይስ ፕርድዝ ጎድ ማቄዛይኮ፥ ፎሎ ደንጌዝ ጌሽ ሸምፕታይኮ ይ ኡኬዛ። 24 ኦሮꬅ ጫቆስ ግዶ ማቄዝ የሱሳኮ፥ አቤላ ሱꬃይፕ ኣꬊ ኦድዝ ዉርጽንቴዝ ሱꬃይኮ ይ ኡኬዛ። መ. 4:10
25 የ ኦድዛና ይ ኤካሚ ጋማይ ጋርክ ናግንቶይታ፥ የይትታይ ሳአ አሲ ኦዴዝ ባዝ ስኤካ አቲ ቡተካዝን ኑኒ ሳሎፕ ኦድንቴዝ ባዝ ኤካም እጺ ዋይዚ ቡቶደ?ከስ 20:22 26 የ ዎደ ኤ ጊርꬃይ ቢታ ኤንእሴዛ፥ Ꮊት ማቅኮ «ታ ሳአ ኣዳ ባዝን ፐቲ ቶኬ ማሂ ሳሎካ ኤንእሶዳ» ዬጊ ቃላ ገሌዛ። ሀጌ. 2:6 27 ሀኖ ዝን ፐቲ ቶኬ ታ ማሂ ግዛይ ኤንኦዋ ባዝታይ ጻጲ የዞዳይ ጋርክ ኤንእዛ ባዝታይ መꬍንቴዝ ባዝ ማቄዛይስ ꬋቦዳና ቤዝዛ። 28 ይኬ ኑኒ ኤንኦዋ ካተትꬅ ኤኮድ ግሾስ ጾሳ ቦንችታራኔ ያሻር ጾሳ ኡፋይስታር ጎይንዛ አያና ዎላ አይኮዳ። 29 ኑ ጾሳይ ጹግዝ ታማ። ናምእ. 4:24