ዋንሳ ጻፌዝ የሱስ ክርስቶሳ ዎንግለ
ገሎ
ዋንሳ የሱሳ «አስ ማቂ አስ ጋንጨ በንቴዝ ጾስ ቃላ» ዬጊ ኤርሴዛ። Ꮊ ዎንግላይ ጻፍንቴዛይ፥ ኤዛ ናባብዛ አሳይ የሱሳ አስ አሽዛያ ማቂ የኦዳ ግንትንቴዝ ጾስ ናአ ማቅዛና አማኖድ ጋርከኔ ኤዛ አማንዝታይስ መꬍና ደኦ የዛና ኡንቲ ኤሮድ ጋርከ (20:31)።
ዎንግላይስ ቲና ክፍላይ መꬍና ጾሳ ቃላይኔ የሱሳ ፐቶ ማቄዛና ኦዲ ማቂ፥ የሱሳ አሽዛያ ማቂ የኦድ ግንትንቴዝ ጾስ ናአ ማቄዛና ቤዝዛ ዱማ ዱማ ማልታይር ፋልሲ ቤዝዛ። ጻፋይ፥ የሱስ ክርስቶሳ ፋ ኡባስ ቱማ ጾስ ናአኔ ጾስ አዳይር ፐቶ ማቄዛና (1:1) አፋ ቆንጨ ኦዴዛ። የሱሳ ፋ ኡባስ ታ አፍራመፕ ቲን የዛ (8:58) ዬጌዛ። ዉርስꬃል ቶማሳ፥ «ታ ጎዳዮ፥ ታ ጾሳዮ» ዬጊ ጼጌዛ (20:28)። የይፕ ካሊ ማ Ꮊ ማልታይፕ አባ ኣፈ በንቴዛኮ ኦድዝ ታርክታይ ካልዛ። Ꮊ ክፍላይ ፐቲ ፐቲ አሳይ የሱሳ አማኒ ኤዛ ካልዝታ ማቄዛና ኦድዛ፤ ማ Ꮊንክታይ ኤዛር ዋይዚ ኤቅንቴዛኮኔ ዋይዚ አማናም እጼዛኮ ኦድዛ። ሸምፖ 13-17 ሄሎዳይስ የሱሳ አይክንቴዝ ኦማꬅ ኤዝስ፥ ኤ ታማርታይር አብ ጋርክ ምኖ ዳቦትꬅ የዛኮ፥ ማ ዎንትꬃ ጋላስ ሶትንቶዳይፕ ቲና ጊግንቶ ቃላኔ ምንꬃꬆ ቃላ ኡንትስ ኦዴዛና ፋልሲ ቤዝዛ። ዉርስꬅ ሸምፕታይ የሱሳ አይክንቴዝ ባጋኔ ፕርዳስ ሺቄዝ ባዝ፥ ኤ ሶትንቴዛኔ ኤ ደንዶ፥ የይ ጋርከካ ደንዳይፕ ጉየ ፋ ታማርታይስ ኤ በንቴዝ በንትꬃ ኦድዛ።
ዋንሳ ዎንግላይ አይኬዝ ቆፍታ
ገሎ 1:1-18
ጻማቅዛ ዋንሳኔ የሱሳ ቲና ታማርታ 1:19-51
የሱሳ ኦሶ አይኬዛ 2:1—12:50
ዉርስꬅ ቃምታ የሩሳላመ ሄራ 13:1—19:42
ጎዳይ ደንዳኔ በንትꬅ 20:1-31
ኩስተ ቆፋ፦ ጋልላ ማቂ ፋ ታማርታይስ በንትꬅ 21:1-25
1
ደኦ ቃላ
1 ቃላ ቲናፕ የዛ። ቃላይካ ጾሳር የዛ፤ የ ቃላይ ጾሰ። 2 ቲና ቃላይ ጾሳር የዛ። 3 ጾሳይ ኡባ ባዝ ቃላ ባጋር መꬌዛ። መꬍንቴዝ ባዛፕ ፐቲ ባዝካ ኤ ባጋር መꬍንተካባዝ ባያ። 4 ኤዛር ደኦ የዛ፤ የ ደአይ አስስ ፖኦ። 5 ፖአይ ꬉማ ፖእዛ፤ ꬉማይ ፖአና ጋመካያ።
6 ጾሲ ኪቴዝ፥ ፐቲ ዋንሳ ግዝ አሲ የዛ። 7 አሲ ኡባይ ኤ ባጋር ፖአ አማኖድ ጋርክ ኤ ፖኦስ ማርካ ማቂ የኤዛ። 8 ኤ ፖኦ ባጋ ማርካቶዳይስ የኤዛፕ አትን ፋ ኡባስ ፖኦ ባያ። 9 አስ ኡባስ ፖእስዛ ቱማ ፖአይ አላመ ይእዛ።
10 ኤዝካ አላመል የዛ። አላማይካ መꬍንቴዛይ ኤ ባጋራ፥ ዝን አላማይካ ኤዛ ኤረካያ። 11 ኤ ፋስታይኮ የኤዛ፥ ዝን ኤስታይ ኤዛ ኤከካያ። 12 ዝን ኤ ፋና ኤኬዝታይስንኔ ኤ ሱንꬃ አማኔዝታይስ ጾስ ናእታ ማቃድ ጋርክ ማዉተ እንጌዛ። 13 ኡንትካ ጾሳፕ የልንቴዛፕ አትን አሲ የልንትዛ ዎጋይ ጋርክ ꬊራꬅ ሸነፕ ዎይ አሾፐኔ ሱꬅ ሸነር የልንተካያ።
14 ቃላይ አስ ማቄዛ፤ አꬎ ኬሄትꬃኔ ቱማትꬅ ኩሚ ኑ ጋንጨ የዜዛ። ኤ ፋ አዳይስ ፐቲ ናአ ማቂ ኤኬዝ ኤ ቦንቻ ኑ በኤዛ።
15 ዋንሳ ኤ ባጋ ማርካቴዛ። ፋ ቃላ ꬎቅ ኡዲ፥ «ታኒ፥ ‹ታፕ ጉየር ይእዛይ ታፕ ቲን የዛ ግሾስ ታፕ ኣꬍዛ› ግ ማርካቴዛይ Ꮊያ» ዬጌዛ።
16 ኑኒ ኡቢታይ ኤ አꬎ ኬሄትꬅ ኩንꬃይፕ አንጆል አፋ አንጆ ኤኬዛ። 17 ጾሳይ ህገ ሙሰ ባጋር እንጌዛ፥ ዝን አꬎ ኬሄትꬅኔ ቱማትꬂ የሱሳ ክርስቶሳ ባጋር የኤዛ። 18 ጾሳ ኣፈር በኤዝ አስ ኦንካ ባያ፤ ፋ አዳይ ላንቀ የዝ ፐቲ ናአይ ኣዳ ኤ ፋ ኡባስ ጾስ ማቄዛይ ኤዛ ቆንጨ ኦዴዛ።
ጻማቅዛ ዋንሳ ማርከትꬅ
(ማቶ. 3:1-12፤ ማር. 1:1-8፤ ሉቃ. 3:1-8)
19 የሩሳላመ የዝ አይሁድታይ ሀላቅታይ፥ ቄስታይኔ ለዊታይ፥ «ኔኒ ኦኖ?» ግ፥ ዋንሳ ኦይጮድ ጋርክ ኤዝኮ ኪትን፥ ዋንሳ ኡንትስ ማርካቴዝ ማርካትꬃይ Ꮊያ።
20 ዋንሳ፥ «ታኒ ክርስቶሳ ባያ» ዬጊ፥ ምልጽ ኡዲ ማርካቴዛፕ አትን ካድበኤካያ።
21 ኡንትካ፥ «የዝን፥ ነ ኦኖ? ነ ኤላሳኔ?» ዬጊ ኦይጬዛ።
ዋንሳ ማሂ፥ «ታ ኤላሳ ባያ» ዬጌዛ።
ማ ኡንቲ፥ «ነ የኦድ ግንትንቴዝ ናባይ ነናኔ?» ዬጊ ኦይጬዛ።
ዋንሳ፥ «ዋኣ» ግ ማሄዛ።
22 የዝን፥ «ነ ኦኖ? ኑኒ ኑና ኪቴዝታይስ ኦዶድ ጋርክ ነ ነና ኦና ጌ?» ዬጌዛ።
23 ዋንሳ ማሂ፥ «ናበ እሳያሳ ጌዛይ ጋርክ፥
«‹ጎዳይስ ኦገ ሉልሶይታ!›
ግ ሊዦ ደምባ ኡክዛ አꬃይ ቃላይ ታና»
ዬጌዛ።
24 ማ ፈርሳወ አስታይ ኪቴዝ አሳይ 25 ዋንሳኮ፥ «ነ ክርስቶሳ ዎይ ኤላሳ ዎይ ናበ ባ እጽኮ፥ የዝን አብስ ጻማቄ?» ግ ኦይጬዛ።
26 ዋንሳ ማሂ፥ «ታኒ ሃꬃር ጻማቅዛ፥ ዝን ይ ኤሮዋ አሲ ይ ጋንጨ ኤቄዛ። 27 ኤ ታፕ ጉየር ይእዛ። ታኒ ሀራ አቶዝን ኤ ጫማ ዎዶሮ ብሎዳይስ ቤዞያ» ዬጌዛ።
28 የይ ኡባይ ዮርዳኖሳ ቦርካፕ ሰኮ ፕኖ፥ ብታና ካታማ፥ ዋንሳ ጻማቅዛ አቃይድ ሀኔዛ።
ጾስ ዱረ
29 ዋንሳ ዎንትꬃ ጋላስ የሱሳ ኤኮ የኦዳር ብኢ፥ «አላመ ናጋራ ባራንችዛ ጾስ ዱራይ Ꮊያ! 30 ታኒ፥ ‹ታፕ ጉየር ፐቲ አሲ የኦዳ። ኤ ታፕ ቲን የዛ ግሾስ ታፕ ኣꬍዛ ግ ኦዴዛይ Ꮊያ። 31 ኤ ኦናዛኮ ታኒ ኤሮያ። ዝን እስሬለ አሳይስ ኤዛ ቆንጨ ከሶዳይስ ሃꬃር ጻማቅታር የኤዛ» ዬጌዛ።
32 ዋንሳ Ꮊይ ጋርክ ዬጊ ማርካቴዛ፦ «ጌሻ አያናይ ሳሎፕ ሆለ ጋርክ ዎꬎዳራኔ ኤዛል ሸምፖዳር ታ በኤዛ። 33 የይ ሀኖዳይፕ ቲና ታ ኤዛ ኤሮያ። ዝን ሃꬃር ጻማቆዳይስ ታና ኪቴዝ ጾሳይ፥ ‹ጌሻ አያናይ ዎꬊ ኤዛር የዝን ኔኒ በአዳይኔ ጌሻ አያናር ጻማቆዳይ ኤዛ› ዬጊ ታስ ኦዴዛ። 34 ታ የይ ሀኖዳር ብኢ፥ ኤ ጾስ ናአ ማቄዛና ማርካትዛ» ዬጌዛ።
የሱሳ ካሌዝ ቲና ታማርታ
35 ማ ዎንትꬃ ጋላስ ዋንሳ ፋ ታማርታይፕ ናምእታይር ዎላ ኤቄዛ። 36 የሱሳ ኣꬎዳር ዋንሳ ብኢ፥ «ጾስ ዱራይ Ꮊይሸ!» ዬጌዛ።
37 ናምኢ ዋንሳ ታማርታይ ዋንሳ ግዛና ስኢ የሱሳና ካሌዛ። 38 የሱሳ ፋና ካልዝታ ጉየ ሽርንቲ ብኢ፥ «ይ አብ ኮይኔ?» ዬጊ ኦይጬዛ።
ኡንቲ ማቂ፥ «አስታማራዮ፥ ነ አባ የሳዴ?» ዬጌዛ።
39 የሱሳ ኡንትኮ፥ «Ꮊና ይኢ ቦኦይታ» ዬጌዛ። ኡንቲ Ꮊንጊ ኤ የዛ አቃ በኤዛ። የ ጋላስ ሳአይ ታጲ ሳተ ሄራ ማቅዝ ግሾስ ኤ ላንቀ ፔዤዛ።
40 ዋንሳ ጌዛና ስኢ፥ የሱሳና ካሌዝ ናምኢ ታማርታይፕ ፐታይ፥ ስሞን ጵጽሮሳ እሻ እንድራሰ። 41 እንድራሰ ቲና ፋ እሻ ስሞናር ዎልሄሊ፥ «ኑኒ ክርስቶሳ ደንጌዛ» ዬጌዛ። 42 እንድራሰ ስሞና የሱሳኮ ከኤዛ።
የሱሳ ስሞና ብኢ፥ «ኔኒ ዮና ናአ ስሞና፤ ነ ሱንꬃይ ኬፋ ግ ጼግንቶዳ» ዬጌዛ።
የሱሳ ፍልጶሳራኔ ናትናኤላራ ጼጌዛ
43 ዎንትꬃ ጋላስ የሱሳ ጋልላ ቢታ Ꮊማዳይስ ሙርቴዛ። ኤ ፍልጶሳና ደንጊ፥ «ታና ካሎባ!» ዬጌዛ። 44 ፍልጶሳ፥ እንድራሰኔ ጵጽሮሳ የዜዝ ቤተሳይዳ ግዝ ካታማፕ የኤዝ አሲ።
45 ፍልጶሳ ናትናኤላና ሄሊ፥ «ሙሰ ህገ ማጻፋይ ጋንጨ፥ ማ ናብታይካ ኤባዝ ጻፌዝ ዮሴፋ ናአ ናዝረተ የሱሳ ኑ ደንጌዛ» ዬጌዛ።
46 ናትናኤላ ማሂ፥ «ናዝረተ ካታማፕ ሎኦ ባዝ ከዞዳይስ ዳንዳእኔ?» ዬጌዛ።
ፍልጶሳ፥ «ይኢ ቦኦባ» ዬጌዛ።
47 የሱሳ ናትናኤላ ፋኮ ይእዛና ብኢ፥ «ገነ ባ ቱማ እስሬለ አስ Ꮊያ!» ዬጌዛ።
48 ናትናኤላ የሱሳኮ፥ «ኔኒ ታና አባ ኤሬ?» ዬጌዛ።
የሱሳ ማሂ፥ «ፍልጶሳ ነና ጼጎዳይፕ ቲና፥ ኔኒ ባላሰ ምꬂ ኦሞ የዝን ታኒ ነና በኤዛ» ዬጌዛ።
49 ናትናኤላ ማሂ፥ «አስታማራዮ፥ ኔኒ ጾስ ናአ! ኔኒ እስሬለ ካተ!» ዬጌዛ።
50 የሱሳ ኤኮ፥ «ታ ነና ባላሰ ምꬂ ኦሞ በኤዛ ጌዝ ግሾስ ነ አማንኔ? ኔኒ Ꮊይፕ ኣꬅባዝ በአዳ!» ዬጌዛ። 51 ማ የሱሳ፥ «ታኒ ይንትስ ቱሮ ኦድዛ፤ ሳሎ ዶይንትን፥ ጾስ ኪታንችታይ አስ ናአ አፋ ከዞዳራኔ ዎꬎዳር ይ በአዳ» ዬጌዛ።