1 የሱሳ፥ «ታኒ ይንትስ ቱሮ ኦድዛ፤ ዱር ካለ ጋንጨ ፐንገር ባዝን ሀራ ኦገር ገልዝ ኦንካ ካይዞኔ ፓኖ። 2 የያ ማቆዝን ፐንገር ገልዛይ ዱርታ ሄንግዛያ። 3 ፐንገ ናግዛይ ኤዝስ ፐንጋ ዶይዛ፤ ዱርታይካ ኤ ቃላ ስእዛ። ኤ ፋ ዱርታ ኡ ሱንꬃይር ሱንꬃይር ጼግዛ፤ ኡንታን ካልꬂ ባለ ከስዛ። 4 ኤ ኦꬄዝ ፋስታ ባለ ከሴዛይፕ ጉየ ኡ ቲና ቲና የꬍዛ። ኡንትካ ኤ ቃላ ኤርዛ ግሾስ ኤዛ ካልዛ። 5 ሀራ አስ ቃላ ኡንቲ ኤሮዋ ግሾስ ኤፕ ሃክዛፕ አትን ኤ ላሳ ካሎያ» ዬጌዛ።

6 የሱሳ ኡንትስ Ꮊ ኣዝሳ ኦዴዛ፥ አብ ኦዴዛኮ ኡንቲ አካከካያ።

7 ማሂ የሱሳ ኡንትኮ፥ «ታኒ ይንትስ ቱሮ ኦድዛ፤ ታ ዱርታይስ ፐንገ። 8 ታፕ ቲን የኤዝ ኡቢታይ ካይዞኔ ፓኖ፥ የያ ማቃዳር ዱርታይ ኡንታን ስኤካያ። 9 ፐንጋይ ታና፤ ታ ባጋር ገልዛ ኦንካ አቶዳ። ኤ ታ ባጋር ገሎዳኔ ከዞዳ፤ ሎኦ ሄንግንትዝ አቆ ደማዳ። 10 ካይዞ ካስቶዳይስ፥ ሹኮዳይስኔ ꬋብሶዳይስ ይእዛፕ አትን ሀራባዝስ የኦያ። ታኒ ኡንትስ ደኦ የዞድ ጋርከራኔ ኩሚ ፉጮድ ጋርክ የኤዛ።

11 «ታኒ ሎኦ ሄንꬃንቾ፤ ሎኦ ሄንꬃንቻይ ፋ ዱርታይ ግሾስ ፋ ሸምፖ ኣꬂ እንግዛ። 12 ከራ ሄንግዝ አስ ዱርታይ ጎዳነ ሄንꬃንቾ ባዛይ ግሾስ ፉገ ይእኮ ብኢ ዱርታ አሺ ሀልእዛ። የይ ግሾስ፥ ሱꬉመ ዱርታ አይኪ ላልዛ። 13 ከራ ሄንግዛይ ሚሸስ ሄንግዝ ግሾኔ ዱርታይባዝ ኤዛ ቆፍሶዋ ግሾስ ዱርታ አሺ ላስዛ።

14-15 «ታኒ ሎኦ ሄንꬃንቾ። ታ አዳይ ታና ኤርዛይ ጋርክ ታንካ ታ አዳ ኤርዛ። የይ ጋርከካ፥ ታ ታ ዱርታ ኤርዛ፤ ታ ዱርታይካ ታና ኤርዛ። ታኒ ታ ዱርታይ ግሾስ ታ ሸምፖ ኣꬂ እንግዛ። 16 Ꮊ ዉዳይድ ባ ሀራ ዱርታይ ታስ የዛ። ታኒ ኡንታናካ ኮኦዳይስ ቤዝዛ። ኡንቲ ታ ቃላ ስኦዳ፤ ኡንቲ ፐቲ ዉደ ማቃዳ፤ ሄንꬃንቻይካ ፐታ።

17 «ታኒ ታ ሸምፖ ኣꬂ እንጊ ማሂ ኤክዝ ግሾስ ታ አዳይ ታና ዶሴዛ። 18 ታ ዶስዛ ታ ሸምፖ ኣꬂ እንግዛይፕ አትን ታፕ ኦንካ ኤከና። ታ ታ ሸምፖ ኣꬂ እማዳይስኔ ማሂ ኤኮዳይስ ስልጻኔ ታስ የዛ። ታኒ ኦꬆድ ጋርክ ታ አዳይ ታና ኪቴዛይ Ꮊያ» ዬጌዛ።

19 የያ ኤ ጌዝ ግሾስ አይሁድታይ ጋንጨ ማካ ሻኮተꬂ መꬍንቴዛ። 20 ኡንታፕ ጋመ ባጋይ፥ «ኤዛር ቱና አያና የዛ! ኤ ኤይዛ! ኤ ግዝ ባዝ አብስ ስእኔ?» ዬጌዛ።

21 Ꮊንክታይ ማ፥ «ጻላሄ አይኬዝ አስ Ꮊይ ጋርክ ኦድንቶያ። ቱና አያና ቶአ ኣፈ ቤዞዳይስ ዳንዳእኔ?» ዬጌዛ።

22 የሩሳላመ ጾሳ ኬꬅ ኦሮꬄዝ ጋላስታይ ቦንችዛ ባለ ሄሌዛ፤ የ ዎደ ሳአ ባርጎ። 23 የሱሳ ጾሳ ኬꬅ ሶሎሞነ ባራንዳር ዩይዛ። 24 አይሁድታይ የሱሳ ላንቃይድ ሺቂ ኤቂ፥ «ኔኒ ኑና አይደ ሄሎዳይስ ስር ጋዶዴ? ኔኒ ክርስቶሳ ማቅኮ አን ኑስ ጌሺ ኦዶባ» ዬጌዛ።

25 የሱሳ ማቂ ኡንትኮ፥ «ታኒ ይንትስ ኦዴዛ፤ ዝን ይ ታና አማኖያ። ታኒ ታ አዳይ ታስ እንጌዝ ማዉተር ኦꬅዛ ኦሳይ ታባዝ ማርካትዛ። 26 ዝን ታኒ ይንትስ ኦዴዛይ ጋርክ ይ ታ ዱረ ማቀካ ግሾስ አማኖያ። 27 ታ ዱርታይ ታ ቃላ ስኦዳ። ታ ኡንታን ኤርዛ፤ ኡንትካ ታና ካልዛ። 28 ታኒ ኡንትስ መꬍና ደኦ እንግዛ፤ ኡንቲ ኡባራካ ꬋባሚ። ኦንካ ታ ኩሸፕ ኡንታን ቦንቂ ኤኮዳይስ ዳንዳኦያ። 29 ኡንታን ታስ እንጌዝ ታ አዳይ ኡባፕ ኣꬍዛ ኦንካ ታ አዳይ ኩሸፕ ኡንታን ቦንቂ ኤኮዳይስ ዳንዳኦያ። 30 ታኔ ታ አዳይ ፐቶ» ዬጌዛ።

31 አይሁድታይ የሱሳ ሾጮዳይስ ማካ ሹች ደንꬄዛ። 32 የሱሳ ኡንትኮ፥ «ታኒ ኦꬆድ ጋርክ ታ አዳይ ታስ እንጌዝ ጋመ ሎኦ ኦስታ ይንታን ኦꬂ ቤዝዛ። የይትታይፕ ኣያይ ግሾስ ታና ሹቻር ሾጮዳይስ ኮይኔ?» ዬጌዛ።

33 አይሁድታይ ማሂ፥ «ኑኒ ነና ነ ሎኦ ኦሶ ግሾስ ሹቻር ሾጮዳይስ ኮዮያ። ዝን ኔኒ ጾስ ጫዤዝ ግሾኔ አስ ማቅታር ነ ነና ጾስ ግዝ ግሾስ» ዬጌዛ።

34 የሱሳ ማሂ፥ «ጌሻ ማጻፋይድ ጾሳይ፥ ‹ይ ጾስታ› ጌዛይ ጻፍንተካሳ? 35 ጌሻ ማጻፋይ መꬍናስ ላምንታሚ። ጾሳይ ፋ ቃላ እንጌዝ አስታ፥ ‹ጾስታ› ግ ጼግኮ፥ 36 ታ ታና ጾስ ናአ ጌዛይስ፥ አዳይ ማራጺ Ꮊ አላመ ኪቴዝ ታና ጾስ ናአ ዋይዚ ‹ጾሳ ነ ጫዥዛ› ዬጌ? 37 ታኒ ታ አዳይ ኦꬅዛና ኦꬃም እጽኮ ታና አማንፓተ። 38 ዝን ታኒ ኦꬅዛባዝ ማቅኮ ይንቲ ታና አማናም እጽኮካ፥ ታ አዳይ ታር የዛኔ ታካ ታ አዳይር የዛና ይ ኤሮድ ጋርክ ታ ኦሳ አማኖይታ» ዬጌዛ።

39 ማካ ኡንቲ ኤዛ አይኮዳይስ ኮዬዛ፥ ዝን ኤ ኡንታፕ ቡቲ ከዜዝ።

40 ዋንሳ ቲን ጻማቅዛ አቃ፥ ዮርዳኖሳ ቦርካፕ ሰኮ ፕኖ የሱሳ ፒንጊ ኤዛይድ ጋምኤዛ። 41 ጋመ አሳይ የሱሳኮ ይኢ፥ «ዋንሳ ማላታ ኦꬄካያ፥ ዝን ኤ Ꮊ አꬃያባዝ ኦዴዝባዛይ ኡባይ ቱማ» ዬጌዛ። 42 ኤዛይድ ጋመ አሳይ የሱሳ አማኔዛ።