6
የሱሳ ማላ ባጋ ኦይጭንቴዛ
(ማቶ. 12:1-8፤ ማር. 2:23-28)
1 ፐቲ ማላ ጋላስ የሱሳ ጋደ ጋንጨር ኣꬍዛ። የሱሳ ታማርታይ ባንጋ ትዣ ዱꬂ ፋ ኩሸር ምርኪ ሚዛ። ናምእ. 23:25 2 ዝን ፈርሳውታይ ጋንጨፕ ፐታይ ፐታይ፥ «ማላ ጋላስ ኦꬆዳይስ ኑ ህጋይድ ቤዞዋ ባዝ አብስ ኦꬄ?» ዬጌዛ።
3 የሱሳ ኡንትኮ ማሂ፥ «ዳዉተ ናይንቴዝ ዎደ ፓር የዝታይራ ዎላ ኦꬅዛና ይ ናባበካሳ?1ሳም. 21:1-6 4 ጾስ ኬꬃ ገሊ አይሁድታይ ቄስታይ ኣዳስ ቤዝዛ ዳቦ ሜዛ፤ ፓር የዝታይስካ እንጌዛ» ዬጌዛ። ለዊ. 24:9 5 ማ የሱሳ፥ «አስ ናአይ ማላስ ጎዳ» ዬጌዛ።
የሱሳ ኩሸ ስላ አꬃ ፓꬄዛ
(ማቶ. 12:9-14፤ ማር. 3:1-6)
6 ሀራ ማላ ጋላስ የሱሳ አይሁድታይ ዎሳ ኬꬅ ገሊ ታማርስዛ። የ አቃይድ ኡሻች ኩሸ ስሌዝ ፐቲ አሲ የዛ። 7 ህገ አስታማርታይኔ ፈርሳወ አሳይ ኤዛ ሞቶዳይስ ሳንከ ኮዢ ማላ ጋላስ ፓꬅኮ በአዳ ግ ናግዛ። 8 ዝን የሱሳ ኡ ቆፋ ኤሪ ኩሻይ ስሌዝ አꬃይኮ፥ «ደንዲ አሳይ ጋንጨ ኤቆባ» ዬጌዛ፥ አꬃይካ ደንዲ ኤቄዛ።
9 የሱሳ፥ «አን ታ ይንታን ፐትባዝ ኦይጭዛ፤ ማላ ጋላስ ኦꬆዳይስ ቤዝዛይ ሎኦ ባዞኔ ኢታባዞ? ሸምፖ አሾኔ ꬋብሶ?» ዬጌዛ።
10 ማ የሱሳ ኤ ላንቃይር የዝ አሳ ኡባ ዩዪ ብኢ አꬃይኮ፥ «ነ ኩሻ ፕድ ኡዶባ» ዬጌዛ፥ አꬃይካ ኤ ጌዛን ጋርክ ኡድን ኩሻይ ፓጼዛ። 11 ዝን ህገ አስታማርታይኔ ፈርሳወ አሳይ ኢታ ይላꬌዛ። የሱሳል አፋ አብ ኡዶ ግ ዎላ ቶቤዛ።
የሱሳ ታጶ ናምኢ ሀዋርታ ዶሬዛ
(ማቶ. 10:1-4፤ ማር. 3:13-19)
12 የ ዎደ ጋላስታይፕ ፐቲ ጋላስ የሱሳ ዎሶዳይስ ደረል አፋ ከዜዛ። ቃማ ሙዳ ጾሳ ዎስታር አቄዛ። 13 ዎንትꬃ ፋ ታማርታ ጼጊ ኡ ጋንጨፕ ታጶ ናምእታ ዶሪ፥ ኡንታን፥ «ሀዋርታ» ግ ጼጌዛ። 14 ኡንትካ፥ ጵጽሮሳ ግ ጼግዝ ስሞና፥ ኤ እሻ እንድራሰ፥ ያይቆባ፥ ዋንሳ፥ ፍልጶሳ፥ ባርቶሎሞሳ፥ 15 ማቶሳ፥ ቶማሳ፥ እልፎሳ ናአ ያይቆባ፥ ፋ ቢታይስ ምጭንትዝ ስሞና፥ 16 ያይቆባ ናአ ይሁዳራኔ የሱሳ ኣꬂ እንጌዝ አስቆሮንቶ ይሁዳ።
የሱሳ ታማርሶኔ ፓꬆ
(ማቶ. 4:23-25)
17 የሱሳ ሀዋርታይር ዎላ ደረላፕ ዎꬊ ደንባ አቆ ኤቄዛ። ኤ ታማርታይፕ ጋምታይ የ አቃይድ የዛ። ይሁዳ ቢታ ኡባፐ የሩሳላመፐ፥ ጽሮሳፐኔ ስዶና አባ ጋጻፐ ጋመ አሳይ ኤ ታማርስዛ ባዝ ስኦዳይስኔ ፋ ሀርገፕ ፋጾዳይስ የኤዛ። 18 ቱና አያናር መትንትዛ አስታይካ ይኢ ፓጼዛ። 19 ፓꬅዛ ዎልቃ ኤዝፕ ከዚ አሲ ኡባ ፓꬅዛ ግሾስ አሳይ ኤዛ ቦቾዳይስ ኮይዛ።
አንጆኔ መቶ
(ማቶ. 5:1-12)
20 ፋ ታማርታይኮ ብኢ Ꮊይ ጋርከ ዬጌዛ፦
«ይንታኖ፥ ማንቅታዮ፥ ይ አንጅንቴዝታ፤
ጾስ ካተትꬃይ ይንትሲ።
21 ይ Ꮊት ናይንትዝታይ አንጅንቴዝታ፥
ይ ምዦዳ።
ይ Ꮊት ዬክዝታይ አንጅንቴዝታ
ይ ሚጮዳ።
22 አሳይ ይንታን ታ ግሾ፥ አስ ናአይ ግሾስ
እጽዛ ዎደ
ይንታን ፕልዛ ዎደ
ይንታን ኡ ቶችዛ ዎደኔ፥
ኢታ ሱንꬅ ኡ ይንትስ እንግዛ ዎደ
ይ አንጅንቴዝታ። 1ጵጽ. 4:14
23 «ዬዛኮ፥ ይ ጋታይ ሳሎ ዳማ ማቄዝ ግሾስ የ ዎደ ኡፋይሳር ጉፖይታ። አብስ ጊኮ፥ ብኒ ኡ አድታይ ናብታይል አፋ Ꮊይ ጋርክ ኡዴዛ። 2ዜና. 36:16፤ ሀዋ. ኦ. 7:52
24 «ዝን ዱርታዮ ይንታን አየ፤
ይ Ꮊት ሎኦ የስ ኤኬዝታ።
25 Ꮊት ምዤዝታዮ ይንታን አየ፤
ይ ናይንቶዳ።
Ꮊት ሚጭዝታዮ አቦ ይንታኖሾ
ይ ካያꬎዳኔ ዬኮዳ።
26 አሲ ኡባይ ይ ሎኦትꬃ ኣዳ ኦድዝ ዎደ ይንታን አየ።
ኡ አድታይ ብኒ ዎርዶ ናብታይል አፋ Ꮊይ ጋርክ ኦꬄዛ።
ሞርክታ ሲቆ ባጋ
(ማቶ. 5:38-48፤ 7:12)
27 «ዝን ታና ስእዝ ይንትስ ታ ኦድዛ፤ ይ ሞርክታ ሲቆይታ፤ ይንታን እጽዝታይስ ሎኦ ባዝ ኦꬆይታ። 28 ይንታን ባድዝታ አንጆይታ፥ ይንታን ናቅዝታይስ ዎሶይታ። 29 ፐቲ ባጋ ሻንጋላ ባቅዝታይስ Ꮊንኮ ባጋካ ቤዞባ። ነ ኮታ ኤኮዳ ግዛይስ ነ ሻምዣካ ጉጂ እንጎባ። 30 ነና ዎስዛ ኡባይስ እንጎባ፤ ኔፕ ኤኬዝ ኦናካ ማሆ ግ ኦይጭፐ። 31 አሳይ ይንትስ ኦꬆድ ጋርክ ይ ኮይዝ ባዝ ኡባ ይንትካ አስስ ኦꬆይታ።ማቶ. 7:17
32 «ይ ይንታን ቃꬍዛ አሳ ኣዳ ቃꬍኮ፥ አባ ጋላታ ይንትስ የኔ? ሀራ አቶዝን፥ ናጋራንችታይካ ፋና ሲቅዝታ ሲቅዛ። 33 ይንትስ ሎኦ ባዝ ኦꬅዝታይስ ኣዳ ሎኦ ባዝ ኦꬅኮ ይንትስ አባ ጋላታ የኔ? ናጋራንችታይካ Ꮊይ ጋርክ ኦꬅዛ። 34 ታልኤ ማሆድ አስስ ኣዳ ይ ታልእኮ አብ ዱማ ጋላትንትኔ? ናጋራንችታይካ ጉየ ማሆድ አሲ ብኢ ታልእዛ።» 35 «ዝን ይ ሞርክታ ሲቆይታ፤ ኡንትስ ሎኦ ባዝ ኦꬆይታ። ጉየ ኤኮዳይስ ቆፐካዛር ታልኦይታ። የይድ ይ ኤኮድ ጋታይ ዳማ ማቆዳ። ይ ኡባይፕ ኣꬎ ጾስ ናእታ ማቆዳ። ኤ ፋና ጋላቶዝታይስኔ ኢትታይስካ ኬሃ። 36 ይ አዳይ ማርዛ ማቄዛይ ጋርከ ይንትካ ማርዝታ ማቆይታ።
ሀራ አሳል አፋ ፕርድፓተ
37 «አሳል አፋ ፕርድፓተ፤ ይንታል አፋ ፕርድንታሚ። ይ ቦርንታማይ ጋርክ ኦናካ ቦርፓተ። አቶ ጎይታ፤ ጾሳይ ይንትስ አቶ ጎዳ። 38 እንጎይታ፤ ይንትስ እንግንቶዳ። ይ ማኬዝ ባዛር ይንትስ ማሂ ማክንቶዳ፥ ኡባራካ ሎኦ ማክዝ ባዛር ባቂ፥ ሱዲ ኩንꬂ፥ ላልንቶዳር ይንትስ ማክንቲ እንግንቶዳ» ዬጌዛ።
39 ማካ የሱሳ ዬጊ ኡንትስ ኣዝሶ ኦዴዛ፤ «ቶአይ ቶአ ካልꬆዳይስ ዳንዳእኔ? ካልꬅኮ ናምእታይካ ዎል ኤኪ ጋጋ ቅቶሳኔ?ማቶ. 15:14 40 ታማራይ አስታማራይፕ ኣꬎያ። ዝን ሎእꬂ ታማሬዝ አꬃይ ፋ አስታማራይ ጋርክ ሀንዛ። ማቶ. 10:24-25፤ ዋን. 13:16፤ 15:20 41 ነ እሻይ ኣፋይድ የዛ ቡጻ አብስ ነ ብእኔ? ነ ኣፋይድ የዛ ቱስ ኣዝዛና አብስ ቦኦሳ? 42 ነ ኣፋይድ የዛ ቱስ ኣዝዛና በኤካዛር ነ እሻይኮ፥ ‹ታ እሻዮ ነ ኣፋይድ የዝ ቡጻ ከሶ› ጎዳይስ ዋይዚ ዳንዳኤ? ነኖ ጩባዮ፥ ቲናቲ ነ ኣፋይድ የዝ ቱስ ኣዝዛና ከሶባ። የይፕ ጉየ፥ ነ እሻይ ኣፋይድ የዝ ቡጻ ከሶዳይስ ነ ጌሺ በአዳ።
ምꬅኔ ምꬅ ኣፈ
43 «ሎኦ ምꬂ ኢታ ኣፈ ኣፎያ፤ የይ ጋርከካ ኢታ ምꬂ ሎኦ ኣፈ ኣፎያ። 44 ኣፈ ኣፍዝ ምꬅ ኡባይ ፋ ኣፈር ኤርንትዛ። አንጉꬅፐ ባላሰ ኣፈ ማጽንቶያ ማ ጎምኦረፐ ዎይነ ኣፋይ ማጽንቶያ። ማቶ. 12:33 45 ሎኦ አስ ፋ ዎዛና ጋንጨ ኩሜዝ ሎኦ ባዛፕ ሎኦ ባዝ ከስዛ። ኢታ አሲ ፋ ዎዝናይድ ኩሜዝ ኢታ ባዛፕ ኢታ ባዝ ከስዛ። አሲ ፋ ዎዝና ኩሚ ፉጬዛይፕ ፋ ዶናር ኦድዛ። 12:34
ኬꬄ ኬጽዝ ናምኢ አስታ
(ማቶ. 7:24-27)
46 «ታ ግዛና ኦꬆዋዛር፥ አብስ ታና፥ ‹ጎዳዮ፥ ጎዳዮ፥ ጌ?› 47 ታኮ ይእዛይኔ ታ ቃላ ስኢ ፖልዛ ኡቢታይ ኦና ኣዝዛኮ ታ ይንታን ቤሳዳ። 48 ኤ ኬꬅ ኬጾዳይስ ዎꬍሲ፥ ኦላ ቦኪ፥ ኦሞ የዝ ዛላይል አፋ ኬꬅ ኤሴዝ ኤጫ አꬃ ኣዝዛ። ድኦ ድኢ የ ኬꬃ ኡርቄዛ፥ ዝን ሚንꬂ ኬጼዝ ግሾስ ኤንኦዳይስ ዳንዳኤካያ። 49 ዝን ታ ቃላ ስኢ ኦꬆዛይ ፋ ኬꬃ ሻፈል አፋ ኬጼዝ አꬃ ኣዝዛ። ድኦ ድኢ የ ኬꬃ ኡርቄዝ ዎደ ኤልሲ ዎዴዛ። የ ኬꬃይ ዎድꬃይካ ዎልቃማ ማቄዛ» ዬጌዛ።