5
የሱሳ ዶሬዝ ቲና ታማርታ
(ማቶ. 4:18-22፤ ማር. 1:16-20)
1 ፐቲ ጋላስ የሱሳ ገንሳሬጸ አባ ላንቀ ኤቄዝን ጋመ አሳይ ኤ ካንታ ኡኪ፥ ኤ ታማርስዛ ጾሳ ቃላና ስኦዳይስ ኡርቅንትዛ። ማቶ. 13:1-2፤ ማር. 3:9-10፤ 4:1 2 ኤዛይድ አባይ ጋጻ የዝ ናምኢ ዎጎልታ በኤዛ። ሞሎ አይክዝ አስታይ ዎጎልታይፕ ዎꬊ ፋ ግታ ሜጭዛ። 3 የ ዎጎልታይፕ ስሞናረ ገሊ ቢታፕ ጽቃል ገድ አባይ ጋንጨል ሺሾዳይ ጋርክ ኦይጬዛ። ዬዚ፥ የ ዎጎላታይድ በቲ አሳ ዎንግለ ታማርሴዛ።
4 ፋ ታማርሳ ዉርሴዛይፕ ጉየ ስሞናኮ፥ «ገደ ጪማይኮ ሺሺ ሞሎ አይኮዳይስ ይ ግታ ኦሎይታ» ዬጌዛ።
5 ስሞና ማሂ፥ «አስታማራዮ፥ ቃማ ሙዳ ዳቡርታር አቅ አብካ አይከካያ፥ ዝን ነ ጊኮ ነቃላይር ግታ ኑ ኦሎዳ» ዬጌዛ። ዋን. 21:3
6 ኡ ግታ ኦሌዝ ዎደ ግታይ ፔꬊንቶድ ጋꬆ ጋመ ሞሎ አይኬዛ። ዋን. 21:6 7 ሀራ ዎጎሎ ጋንጨ የዝ ፋ ዣምታይ ይኢ፥ ፋና ማዶድ ጋርክ ዉቲ ጼጌዛ። ኡ ይኢ ናምኢ ዎጎልታ፥ ሃꬃይ ጋንጨ ምትንቶድ ጋꬆ ሞሎ ኩንꬄዛ።
8 ስሞን ጵጽሮሳ የያ በኤዝ ዎደ የሱሳ ቲና ጹጉኒ፥ «ጎዳዮ፥ ታኒ ናጋራንቾ አስ ማቄዝ ግሾስ ታፕ ሻክንቶባ» ዬጌዛ። 9 የያ ኤ ጌዛይ ኤዝኔ ኤዛር የዝታይ አይኬዝ ሞላይ ጋመትꬃይ ማላባዝ ማቄዝ ግሾስ። 10 ማ ስሞና ዣመ ማቄዝ ዛብዶሳ ናእታይ ያይቆባራኔ ዋንሳራ ማላባዝ ጌዛ። የሱሳ ስሞናኮ፥ «ያሽትፐ! Ꮊንፕ ገድ ኔኒ አስ አይክዝ አስ ማቆዳ» ዬጌዛ። 11 ኡ ዎጎልታ ጋጻ ሺሼዛይፕ ጉየ ኡብታ አሺ የሱሳና ካሎ አይኬዛ።
የሱሳ ቦርቆንቶ ሀርገር የዛና ጌሼዛ
(ማቶ. 8:1-4፤ ማር. 1:40-45)
12 የሱሳ ካታምታይፕ ፐታይድ ማቂ የዝን ፐቲ ቦርቆንቶ ሀርገር *ቦርቆንቶ ሀርገ፦ ቦርቆንቶ ሀርገ አስስ ጋላል አፋ ከዝዝ ሀርገ። እስሬለ ቢታ ቦርቆንቶር የዝ Ꮊርጋስታይ ሀራ አሳፕ ዱማቲ የዝዛፕ አትን አስ ሄሎያ። አይክንቴዝ አሲ የ ካታማይድ የዛ። የ አꬃይ የሱሳ ብኢ ኤ ቲናይድ ጹጉኒ፥ «ጎዳዮ፥ ነ ሸነ ማቅኮ ታና ጌሾዳይስ ነ ዳንዳእዛ» ግ ዎሴዛ።
13 የሱሳ ፋ ኩሻ ዳኪ ቦቺ፥ «ኤ፥ ታ ሸነ፤ ጌዦባ» ዬጌዛ። እዝር አꬃይ ጌዤዛ።
14 የሱሳ፥ «Ꮊያ ኦስካ ኦድፐ፥ ዝን Ꮊንጊ ነናትꬃ ቄሳ ቤዞባ። ነ ጌዤዛይስ ማርካ ማቃዳይ ጋርክ ሙሰ ኪቴዝ ያርሻና ያርሾባ» ግ ኪቴዛ። ለዊ. 14:1-32
15 ማቆዝን፥ የሱሳ ዋራይ ካሰሳይፕ ኣꬊ ዳልግታር Ꮊንጌዛ። ጋመ አሳይ ኤ ኦድዛ ባዝ ስኦዳይስኔ ፋ ሀርገፕ ፓጾዳይስ ይእዛ። 16 ዝን ኤዚ ኡባ ዎደ ፋ ኣዳስ ጌማ አቆ Ꮊንጊ ዎስዛ።
የሱሳ ስላ አꬃ ፓꬄዛ
(ማቶ. 9:1-8፤ ማር. 2:1-12)
17 ፐቲ ጋላስ የሱሳ ታማርሶዳር ጋልላፐራ ይሁዳ ሄራ ኡባይፐ ማ የሩሳላመፐካ የኤዝ ፈርሳውታይራ ህገ አስታማርታይ ኤዛይድ በቴዛ። አሳ ፓꬅዛ ጎዳይ ዎልቃይካ ኤዛር የዛ። 18 የ ዎደ አሳይ ፐቲ ስላ አስ ሀላር ቶኪ ከኤዛ። ካራ ገልሲ ኤ ቲናይድ ጋዶዳይስ ኮዬዛ። 19 ዝን አስ ዳሮትꬃይፕ ካራ ገልሶዳይስ ጋምንቲ ኬꬃል አፋ ከዚ፥ ሲትንጋ ቃዉጺ፥ ሀርግንቴዝ አꬃ ሀላር አሳ ሻጊ የሱሳ ቲና ዎꬄዛ።
20 የሱሳ ኡ አማና ብኢ፥ «ናት አꬃዮ፥ ነ ናጋራይ አቶ ግንትንቴዛ» ዬጌዛ።
21 ህገ አስታማርታይኔ ፈርሳወ አሳይ፥ «Ꮊይ ጾስ ጫዥዛይ ኦኖ? ፐቲ ጾሳፕ አትን ሀራ ናጋራ አቶ ጎዳይስ ዳንዳእዛይ ኦኖ?» ዬጊ ቆፔዛ።
22 የሱሳ ኡ ቆፋ ኤሬዝ ግሾስ ኡንትኮ፥ «ይ ዎዝና ጋንጨ የይ ጋርክ አብስ ቆፔ? 23 ‹ነ ናጋራይ ኡጭንቴዛ ግዛይፐነ ደንዲ የꬎባ ግዛይፕ ኣይ ሎኦ?› 24 ዝን ታ የያ ጌዛይ አስ ናአይ ቢታል አፋ ናጋራ ኡጮዳይስ ማዉተ የዛና ይ ኤሮድ ጋርከ።» የይፕ ማቂ፥ ስላ አꬃይኮ፥ «ደንዲ፤ ነ አርሳ ቶኪ ነ ካራ Ꮊንጎባ» ዬጌዛ። 25 ኤ ኤልꬂ ደንዲ ኡ ቲና ኤቄዛ፤ ኤ ቶክንቲ የኤዝ አርሳ ቶኪ ጾሳ ጋላትታር ፋ ካራ Ꮊንጌዛ። 26 የ ዎደ ኡቢታይካ ማላባዝ ጌዛ። ጾሳ ጋላትታር፥ «Ꮊይኖ ኑ ዳማ ማላታ በኤዛ» ዬጊ ያሽቴዛ።
የሱሳ ለዋ ጼጌዛ
(ማቶ. 9:9-13፤ ማር. 2:13-17)
27 የይፕ ጉየ፥ የሱሳ የይፕ ከዚ Ꮊንግታር። ለወ ግንትንትዝ ፐቲ ቃራጸ ጋችስዛይ ቃራጸ ጋችስዛ አቆ በቴዛና ብኢ፥ «ታና ካሎባ» ዬጌዛ። 28 ኤ ኡባ ባዝ አሺ ደንዲ ኤዛ ካሌዛ።
29 የ ለዋይ ፋ ካራ ዳሞ ስብረ ጊግሴዛ። ጋመ ቃራጸ ጋችሽዝታይኔ ሀራ አሳይ ካꬃ ማዳይስ በቴዛ። 30 ፈርሳውታይራ ህገ አስታማርታይ፥ «ቃራጸ ጋችስዝታይራኔ ናጋራ ኦꬅዝታይር አብስ ም ኡዤ?» ዬጊ የሱሳ ታማርታይል ኤዛ ዝግሬዛ። ሉቃ. 15:1-2
31 የሱሳ ኡንትኮ፥ «ሀርግንቴዝታይፕ አትን ፓꬅ አስስ አክመ ኮሾያ። 32 ታኒ ናጋራ ኦꬅዝታ ማሮትꬅኮ ማሆዳይስፕ አትን ጌሽታ ጼጎዳይስ የኤካያ» ዬጊ ማሄዛ።
ጾማ ባጋ ሺቄዝ ኦይች
(ማቶ. 9:14-17፤ ማር. 2:18-22)
33 ኡ የሱሳኮ፥ «ዋንሳ ታማርታይ ጋመ ጾምዛ፥ ማ ፈርሳውታይ ታማርታይካ የይ ጋርክ ኦꬅዛ። ዝን ኔስታይ ኡባ ዎደ ሚዛይ ኡዥዛይ አብሶ» ዬጌዛ።
34 የሱሳ ኡንትኮ፥ «ማቾ ኤክዛይ ኡንታር የዝን ላዛንꬅታይ ጾሞዳይ ጋርክ ኦꬆዳይስ ዳንዳእኔ? 35 ዝን ማቾ ኤክዛይ ኡንታፕ ሻክንቶድ ጋላስ የኦዳ፥ የ ዎደ ኡንቲ ጾሞዳ።»
36 ማ ዬጊ ኣዝሶ ኦዴዛ፤ «ኦሮꬅ ማኦፕ ፔꬊ ጭማ አፍላል አፋ ስክዛ ኦንካ ባያ። የይ ጋርክ ኦꬅኮ ኦሮꬅ አፍላ ፐርእዛ፥ ኦሮꬃይ ጭማይስ ጊጎያ። 37 ማልአንቶ ዎይነ ጭማ ኦጎሮ ጋንጨ ቡልዝ ኦንካ ባያ። የያ ኦꬅኮ፥ ማልአንቶ ዎይናይ ጭማ ኦጎራ ꬉስዛ፤ ዎይናይ ላልንትዛ ኦጎራይካ አዶያ። 38 የይ ግሾስ፥ ማልአንቶ ዎይነ ኦሮꬅ ኦጎሮ ጋንጨ ቡልንቶዳይስ ቤዝዛ። 39 ይኬ፥ ካኤዛይ ሎኦ ግዝ ግሾስ ካኦ ዎይነ ኡዢ ማቂ ማልአንቶ ኮይዛይ ኦንካ ባያ» ዬጌዛ።