4
የሱሳ ፓጭንቴዛ
(ማቶ. 4:1-11፤ ማር. 1:12-13)
1 የሱሳ ጌሻ አያናር ኩሚ ዮርዳኖሳ ቦርካፕ ማቆዳር ጌሻ አያናይ ኤዛ ሊዦ ጋꬋ ካንጌዛ። 2 ኤዛይድ ኦይታም ጋላስኔ ኦይታም ቃማ ጻላሄር ፓጭንቴዛ። የ ጋላስታ አብካ ሜካዛር ጋምኤዝ ግሾስ ዉርስꬃል ናይንቴዛ።
3 ጻላሄ ኤዝኮ፥ «ነ ጾስ ናአ ማቅኮ አን Ꮊ ሹቻ ሶሎ ማቆ ግ አዛዞባ» ዬጌዛ።
4 የሱሳ ማሂ፥ «አሲ ጾስ ቃላራፕ አትን ሶሎ ኣዳር የዞያ ግንትንቲ ጌሻ ማጻፋይድ ጻፍንቴዛ» ዬጌዝ። ናምእ. 8:3
5 የይፕ ጉየ፥ ጻላሃይ የሱሳ አዱሰ ደረል አፋ ከሲ Ꮊ አላመ ካተትꬃ ኤልሲ ቤዜዛ። 6 ጻላሄ፥ «Ꮊ ኡቢታይል ማዉተኔ ቦንቾ ታስ እንግንቴዛ። ታኒ ቃꬌዝ ኦስካ እንግዛ ግሾስ ኔስ እማዳ። 7 የይ ግሾስ፥ ኔኒ ታስ ጎይንኮ ኡቢታይ ኔስ ማቆዳ» ዬጌዛ።
8 የሱሳ ማሂ፥ «ነ ጎዳ፥ ነ ጾሳይስ፥ ኣዳ ጎይኖባ፥ ኤዛ ኣዳ አጋዞባ ዬግንቲ ጌሻ ማጻፋይድ ጻፍንቴዛ» ዬጌዛ። ናምእ. 6:13
9 ዉርስꬃል ጻላሃይ የሱሳ የሩሳላመ ካንጊ ጾስ ኬꬅስ ኩስተል አፋ ኤሲ፥ «ኔኒ ጾሳ ናአ ማቅኮ አን ሱለ ሳአ ጉፒ ዎꬎባ። 10 አብስ ጊኮ፥
« ‹ነና ናግዝ ፋ ኪታንችታ፥
ጾሳይ ነ ግሾስ ኪቶዳ። ማዝ. 91:11-12
11 ነ ቶካይ ሹቻር ꬉብንታማይ ጋርክ፥
ኡ ፋ ኩሻይር ነና ደንꬆዳ› ዬግንቲ ጻፍንቴዛ»
ዬጌዛ።
12 የሱሳ ማሂ፥ «ነ ጎዳ ጾሳ ፓጭፐ ግንትንቲ ጌሻ ማጻፋይድ ጻፍንቴዛ» ዬጌዛ። ናምእ. 6:16
13 ጻላሃይ የሱሳ ፓጭታ ኡባ ዉርሴዛይፕ ጉየ ሀራ ጊጋ ዎደ ደማድ ጋꬆ ኤዝፕ ሻክንቴዛ።
የሱሳ ጋልላ ኦሶ አይኬዛ
(ማቶ. 4:12-17፤ ማር. 1:14-15)
14 የሱሳ ጌሻ አያና ዎልቃር ኩሚ ጋልላ ማቄዛ። ኤ ዋራይ ሄራ የዝ ቢታ ኡባይል ስእንቴዛ። 15 ኤ አይሁድታይ ዎሳ ኬꬃ ገሊ ታማርሴዛ፤ አሲ ኡባይ ኤዛ ጋላቴዛ።
16 የይፕ ፋ ድጬዝ ካታማ ናዝረተ የኤዛ። ቲን ኦꬅዛይ ጋርክ ማላ ጋላስ አይሁድታይ ዎሳ ኬꬃ ገሌዛ። ናባቦዳይስካ ደንዴዛ። 17 ናበ ኢሳያሳ ማጻፋይ ኤዝስ እንግንትን፥ ጻꬃ ብሊ፥ Ꮊይ ጋርከ ዬጊ ጻፍንቴዛና ደንጌዛ፦
18 «ጎዳ አያናይ ታል አፋ የዛ፥
ማንቅታይስ ዎንግለ ኦዶድ ጋርክ
ጾሳይ ታና ትዤዛ።
አጭንቴዝታይስ ብልꬅ፥
ቶእታይ በአድ ጋርክ
ኡንእንቴዝታ ብልኦድ ጋርክ፥ ኢሳ. 61:1-2
19 ጾሳይ ኬሆዳይስ ቆፔዝ ላይꬃ ኦዶድ ጋርክ ታና ኪቴዛ»
ዬጌዛ።
20 የይፕ ጉየ፥ ማጻፋ ጻጺ አጋዝዛይስ እንጊ በቴዛ። አይሁድታይ ዎሳ ኬꬃ የዛ አሳይ ኡባይ ዳኪ በኤዛ። 21 ኤ፥ «Ꮊይ ይ ሀየር ስእዝ Ꮊ ማጻፈ ቃላይ Ꮊይኖ ፖልንቴዛ» ዬጌዛ።
22 ኡብታይ ኤ ባጋ ሎኦ ኦድንትዛ። ማ ኤ ዶናፕ ከዝዝ ኣꬎ ኬሃትꬃር ኩሜዝ ቃላር ማላባዝ ጊታር፥ «Ꮊይ ዮሴፋ ናአ ባሳኔ?» ዬጌዛ።
23 ኤ፥ ኡንትኮ « ‹ነኖ ኣክማዮ ነና አሾባ፥ ዬግዝ ኣዝሶ ናሻ ታ ስአሚ የይ ጋርክ ቅፍርናሆመ ነ ኦꬄዝ ባዝ ኑ ስኤዛና ማ Ꮊይዳ ነ ካታማይድ ኦꬆባ› » ዬጌዛ። 24 ማካ ታ፥ «ቱማ ኦድዛ፤ ናበ ፋ የልንቴዝ ቢታ ቦንችንቶያ ዬጌዛ። ዋን. 4:44
25 «ታ ይንትስ ቱሮ ኦድዛ፤ ናበ ኤላሳ ላይꬅ ሀይꬒ ላይꬅኔ ባጋ ሳሎ ጎርድንትን ኢታ ናየ ቢታ ኡባይል የዝ ዎደ ጋመ አዝኒ ባ ማችታይ እስሬለ የዛ። 1ካት. 17:1 26 ኤላሳ ኡ ኡብታይስ ኪትንተካያ። ዝን ሰራፕታ ጋደ የዛ አዝኒ ባ ፐቲ አስትኮ ኪትንቴዛ። 1ካት. 17:8-16 27 ናበ ኤልሳኤ ዎደ እስሬለ ጋመ ቦርቆንቶ ሀርገር የዝ አሳይ የዛ። ዝን ሶረ አꬃ ንእማነፕ አትን ኦንካ ጌዠካያ» ዬጌዛ። 2ካት. 5:1-14
28 አይሁድታይ ዎሳ ኬꬅ የዝ አስ ኡቢታይ የያ ስኤዝ ዎደ ጋመ ካጬዛ። 29 ፋ በቴዝ አቃይፕ ደንዲ አምባል አፋ ኬጽንቴዝ ካታማፕ ጋጻ ከሲ ኡርቂ ዳኮዳይስ አምባ ጼራ ካንጌዛ። 30 ዝን ኤ ኡ ጋንጨር ኣꬊ ቅቴዛ።
የሱሳ ቱና አያና ከሴዛ
(ማር. 1:21-28)
31 ኤዛይፕ ጋልላ ቢታ የዝ ቅፍርናሆመ ካታማ Ꮊንጌዛ። ኤዛይድ ማላ ጋላስ አሳ ታማርሴዛ። 32 ኤ ቃላ ታማርስዛይ ማዉተር የዝ አስ ጋርክ ማቄዝ ግሾስ ኡቢታይ ኤ ትምርታ ማላባዝ ጌዛ። ማቶ. 7:28-29፤ ማዝ. 91:11-12
33 አይሁድታይ ዎሳ ኬꬃ ቱና አያና አይኬዝ አꬃይ የዛ። ኤዚ ፋ ቃላ ꬎቅሲ ኡክታር 34 «ናዝረተ የሱሳ ኔስ ኑር አቢ የኔ? ኑፕ ሃኮባ፤ ነ የኤዛይ ኑና ꬋብሶዳይሶኔ? ኔኒ ኦናዛኮ ታኒ ኤርዛ። ኔኒ ጾሳፕ የኤዝ ጽላያ» ዬጌዛ።
35 የሱሳ ቱና አያናይኮ፥ «ስኤ ግ Ꮊ አꬃይፕ ከዞባ» ዬጊ ካጬዛ። ቱና አያናይ አꬃ አስ ኡቢታይ ቲና ሾጪ ኦሊ አብካ ቆሄካዛር አሺ ከዜዝ።
36 አስ ኡቢታይ ማላባዝ ግ። ዎልኮ፥ «ሀኖስ፥ Ꮊይ አባ ትምርቴ? ቱና አያንታ ማዉተራኔ ዎልቃር ኪትዛ፤ ኡንትካ ከዝዛ» ዬጌዛ። 37 ኤ ዋራይ ሄራ ኡባይል ከዜዝ።
የሱሳ ጋመ ሀርግንቴዝ አስታ ፓꬄዛ
(ማቶ. 8:14-17፤ ማር. 1:29-34)
38 የይፐ ጉየ፥ የሱሳ አይሁድታይ ዎሳ ኬꬃፕ ከዚ ስሞና ካራ ገሌዛ። ስሞና ማቻት እንዳታ ኢታ ኦጸ ምሻ ሀርገር ሀርግንቴዛ። እዞ ፓꬆዳይ ጋርክ የሱሳና ዎሴዛ። 39 እ ሂጻይኮ ሺቂ ዙጊ እ ሀርጋ ካጬዛ። ምሻይ አሽን ኤልሲ ደንዲ ኡንታን ሞኬዛ።
40 አዋ ገሎድ ሀኖዳር ዱማ ዱማ ሀርጋይር አይክንቴዝ አሳ ኤዝኮ ከኤዛ። ኤ ፐታይል ፐታይል አፋ ፋ ኩሻ ጋዲ ፓꬄዛ። 41 ቱና አያንታይ ማ፥ «ኔኒ፥ ጾስ ናአ» ዬጊ ኡክታር ጋመ አሳይፕ ከዜዝ። ዝን ኤ ኡንታን ካጬዛ። ኤ ክርስቶሳ ማቄዛና ኡንቲ ኤርዛ ግሾስ ፐትባዝካ ኦዶድ ጋርክ ኮየካያ።
የሱሳ ይሁዳ አይሁድታይ ዎሳ ኬꬃ ታማርሴዛ
(ማቶ. 4:23-25፤ ማር. 1:35-39)
42 ሀጋ ሳአ ዎንቶዳር የሱሳ ፐቲ ጌማ አቆ Ꮊንጌዛ። አሳይ ኮይታር ኤ የዛ አቃ የኤዛ። ኡንታፕ ኤ ሻክንቲ Ꮊንጋም ጋርክ ኤዛ ዎሴዛ። 43 ዝን ኤ፥ «ታኒ ሀራ ካታምታይድ Ꮊንጊ ጾሳ ካተትꬂ ዎንግለ ማርካቶዳይስ ቤዝዛ። ታ ኪትንቴዛይ የይ ግሾሲ» ዬጌዛ። 44 ይሁዳ ቢታል የዝ አይሁድታይ ዎሳ ኬꬃ ኡባ ዉቲ ሳባኬዛ።