1 የይፕ ጉየ፥ ጎዳይ ሀራ ላፑን ታማኔ ናምኢ *ላፑን ታማኔ ናምኢ፦ ፐቲ ፐቲ ማጻፍታይ ላፑን ታም ግዛ። አስታ ዶሬዛ። ኤ Ꮊማዳይስ ቆፔዝ ካታማኔ ሄራ ኡባ ቲናቲ Ꮊማድ ጋርክ ናምኤ ናምኤ ኡዲ ኪቴዛ። 2 የሱሳ ኡንትኮ፥ «ይኬ ሺቆድ ቶርቼ ካꬃይ ጋመ ዝን ቶርቼ ኦሶ አሳይ ጽቃ። ዬዬዝ ግሾስ፥ ቶርቼ ካꬃ ጎዳይ ኦሶ አስታ ኪቶዳ ጋርክ ዎሶይታ። ማቶ. 9:37-38 3 ይኬ፥ Ꮊንጎይታ፥ ዱርታይ ጋርክ ፉግታይ ጋንጨ ይንታን ታ ዳኮዳ። ማቶ. 10:16 4 ይ Ꮊንግታር ኦገስ Ꮊይትታ አይክፓተ፥ ሚሸ ማቅን ካꬃ ማቅን ጫማ አይክፓተ። ኦገል አፋ ኦናካ ሳሮꬅታር ዎዴ ኣꬅፓተ።ማቶ. 10:7-14፤ ማር. 6:8-11፤ ሉቃ. 9:3-5 5 ይ ገልዛ ኬꬃ ኡባ ቲናቲ፥ ‹ሳሮ Ꮊ ኬꬃይስ ማቆ› ዬጎይታ። 6 ሳሮ ቃꬍዛ አስ የ አቃይድ የዝኮ፥ ይ ሳራይ ኤዛይድ አቆዳ፤ እጽኮ ይ ሳራይ ይንትስ ማቆዳ። 7 ኦሶ አስስ ዳሞዘ ቤዝዛ ግሾስ ይ ገሌዝ ኬꬃ ይንትስ ሺሼዝ ባዝ ኡባ ሚታራኔ ኡዥታር ኤዛይድ ጋምኦይታ። ፐታይ ካራፕ ፐታይ ካራ ዩይፓተ። 1ቆሮ. 9:14፤ 1ጽማ. 5:8 8 አባ ካታማካ ይ ገሎዳር አሳይ ይንታን ሞኪ፥ ይንትስ ሺሼዝ ባዝ ኡባ ሞይታ። 9 የ ካታማ ጋንጨ የዝ ሀርግንቴዝታ ፓꬅታር፥ ‹ጾሳ ካተትꬃይ ይንትኮ ኡኬዛ› ዬጊ ኦዶይታ። 10 ዝን ፐቲ ካታማ ገሎዳር አሳይ ይንታን ሞካም እጽኮ ዞዘል ከዚ Ꮊይ ጋርከ ጎይታ:ሀዋ. ኦ. 13:51 11 ‹ኑ ቶካይል አፋ የዝ ይ ካታማይ ቡልአ ኑ ፕቶዳ፥ ዝን ጾስ ካተትꬃይ ይንትኮ ኡኬዛና ኤሮይታ›ማቶ. 10:7-14፤ ማር. 6:8-11፤ ሉቃ. 9:3-5 12 ፕርዳ ጋላስ Ꮊ ካታማትፕ ሶዶመ ካታማስ ፕርዳይ ካዉሻ ማቃዳና ታ ይንትስ ኦድዛ» ዬጌዛ። መ. 19:24-28፤ ማቶ. 10:15፤ 11:24

13 ማ ማቅካ፥ የሱሳ፥ «ነኖ ኮራዝኔ፥ ነኖ ቤተሳይዳ፥ አየ፥ ይንታል ኦስንቴዝ ማላትታይ ጽሮሳኔ ስዶና ኦስንቴዛኮ ኤዛይድ የዝ አሳይ ካዮ አፍላ ማኢ፥ ቡዶል አፋ በቲ ብኒ ማሮተꬅ ገሊ አቶዳዝን። ኢሳ. 23:1-18፤ ኢዝቀ. 26:1-21፤ ኢዩ. 3:4-8፤ አሞ. 1:9-10፤ ዛክ. 9:2-4 14 የይ ግሾስ፥ ይንትፕ ኣꬂ ጽሮሳስኔ ስዶናስ ጾስ ፕርዳይ ካዉዦዳ። 15 Ꮊኔ ቅፍርናሆመ፥ ሳሎ ሄሎዳይስ ነ ꬎቅ ጌኔ? ነ ሱል ስኦለ ዎꬎዳ» ዬጌዛ። ኢሳ. 14:13-15

16 ማካ የሱሳ ፋ ታማርታይኮ፥ «ይንታን ስእዛይ ታና ስእዛ፥ ይንታን ኤኮዛይ ታና ኤኮያ፥ ታና ኤኮዛይ ታና አዛዜዛና ኤኮያ» ዬጌዛ። ማቶ. 10:40፤ ማር. 9:37፤ ሉቃ. 9:48፤ ዋን. 13:20

17 ላፑን ታማኔ ናምኢ ታማርታይ ኪትንቴዝ አቃይፕ ሎእꬂ ኡፋይትታር ማቄዛ። የሱሳኮ ሺቂ፥ «ጎዳዮ፥ ነ ሱንꬃር ቱና አያንታይካ ኑስ አዛዝንቴዛ» ዬጌዛ።

18 የሱሳ ኡንትኮ፥ «ጻላሄ ሳሎፕ ዳዳ ጋርክ ዎꬎዳር ታ በኤዛ። 19 ዬዛኮ፥ ሾሽኔ Ꮊንጋርጮ የꬎድ ጋርከኔ ሞርከ ዎልቃር ኤቅንቶድ ጋርክ ይንትስ ታ ማዉተ እንጌዛ። ይንታን ቆሆድ ባዝ አኮካ ባያ። ማዝ. 19:13 20 ማቆዝን፥ ይ ሱንꬃይ ሳሎ ማዝጋባይድ ጻፍንቴዝ ግሾስ ኡፋይቶይታፕ አትን ቱና አያንታይ ይንትስ ኪትንቴዝ ግሾስ ኡፋይትፓተ» ዬጌዛ።

21 የ ዎደ የሱሳ ጌሻ አያናር ኡፋይቲ፥ «ሳሎ ሳአ ጎዳዮ፥ Ꮊያ ኤጭታይፐኔ ኤራንችታይፐ ቆሲ ዱደ ናእታይስ ቤዜዝ ግሾስ ታ ነና ጋላትዛ። ኤ ታ አዳዮ፥ የያ ነ ኦꬆዳይስ ሎኦ ሸነ ማቄዛ።

22 «ኡባ ባዝ ታ አዳይፕ ታስ እንግንቴዛ። ናአይ ኦናዛኮ አዳይፕ አትን ሀራ ዎይ ናአይ ቆንጭሶዳይስ ኮይዛይፕ ሀራ ኦንካ ኣዳ ኤርዛይ ባያ» ዬጌዛ። ዋን. 3:35፤ 10:15

23 ማ ማቅካ፥ የሱሳ ዱማ ፋ ታማርታይኮ፥ «ይ በኤዛና ብእዝታይ አንጅንቴዝታ። 24 ቱማ ጋመ ናብታይኔ ካትታይ ይ ብእዛኔ ስእዛና በአዳይስኔ ስኦዳይስ አሞቴዛ፥ ዝን ኡ በኤካያ፥ ስኤካያ» ዬጌዛ።

25 ዬዛኮ፥ ፐቲ ጋላስ ሙሰ ህገ ኤርዛ ፐቲ አꬃይ ደንዲ የሱሳ ዬጊ ፓጨ ኦይች ኦይጬዛ። «አስታማራዮ፥ መꬍናስ ደኦ ላቶዳይስ ታኒ አብ ኡዶ?» ዬጌዛ። ማቶ. 22:35-40፤ ማር. 12:28-34

26 የሱሳ፥ «ሙሰ ማጻፋይድ ጻፍንቴዛይ ዋጌ? ነ ዋይዚ ናባብ አካኬ?» ዬጌዛ።

27 አꬃይ ማሂ፥ « ‹ነ ጎዳ ነ ጾሳ፥ ነ ኩንꬅ ዎዝናፐ፥ ነ ኩንꬅ ሸምፖፕ፥ ነ ኩንꬅ ዎልቃፐኔ ነ ኩንꬅ ቆፋፕ ቃꬎባ። ማካ ነ ላጋ ነ ኡባይ ጋርክ ቃꬎባ› ዬግዛ» ዬጌዛ። ለዊ. 19:18፤ ናምእ. 6:5

28 የሱሳ ኤዝኮ፥ «ኔኒ ይኖ ልኬ ማሄዛ፥ ኔካ Ꮊይ ጋርክ ኦꬆባ። ነ መꬍናስ ደኦ የዞዳ» ዬጌዛ። ለዊ. 18:5

29 ዝን አꬃይ ፋና ጌሽ ኦꬆዳይስ ኮዢ፥ «ሀኖስ ኤ ታ ላጋይ ኦኖ?» ዬጌዛ።

30 ኤ ኦይቻይስ የሱሳ ዬጊ ማልሰ እንጌዛ፥ «ፐቲ አሲ የዛይ የሩሳላመ ካታማፐ ሱለ ኢያርኮ ካታማ Ꮊማዳር ኦገል አፋ ፓንታይ ከዚ ሾጬዛ። ኤ አፍላ ቃሪ ኤኪ Ꮊይቆፐኔ ፓꬃፕ ጋንጨ ኦሊ ቅቴዛ። 31 ጉየፕ፥ አይሁደ ቄሰ ፐታይ የ ኦጋይር ፋ Ꮊሞ Ꮊንግታር አꬃ ብኢ ደሽ ግ ኣꬌዛ። 32 ማካ ፐቲ ለዋይ የ አቃ ሄልታር አꬃ ብኢ ሀራ ኦገር ኣꬊ ቅቴዛ። 33 ዝን፥ ፐቲ ሳማረ ቢታ አስ የዛይ የ ኦጋይር ይእታር አꬃ ብኢ ኤስ ቃꬊንቴዛ2ዜና. 28:15 34 ኤዝኮ ሺቂ፥ ኤ ማዶꬃይል አፋ ዛይተኔ ዎይነ ቆል አጬዛ። ፋ ሀረል አፋ በትꬂ እማꬂ አቅዝ ኬꬃ ካንጌዛ። የ አቃይድ ኤዝስ ኮሽዛ ባዝ ኡባ ኦꬄዛ። 35 ዎንትꬃ ናምኢ ዲናረ ማሂ እማꬅ ካራ አዳይስ እንጊ፥ ‹ሀያና Ꮊ አꬃ ሎእꬂ ቦኦባ። ታኒ ኔስ እንጌዛይፕ አፋር ነ ከስዛ ባዝ ኡብታ ታ ኔስ ጭጎዳ› ዬጌዛ።

36 «ይኬ፥ Ꮊ ሀይꬒ አስታይፕ ፓንታይ ሾጬዝ አꬃይስ ላጌ ማቄዛይ ኔስ ኦና ኣዜ?»

37 አꬃይ ማሂ፥ «ኤዝስ ቃꬊንቴዛያ» ዬጌዛ።

የሱሳ፥ «ኔካ Ꮊንጊ Ꮊይ ጋርክ ኦꬆባ» ዬጌዛ።

38 የሱሳ ፋ ታማርታይር ኦገ Ꮊንግታር ፐቲ ሄራ ሄሌዛ። ኤዛይድ ማርታ ግንትንትዝ ፐቲ አስታ ኤዛ ፋ ካራ ሞኬዛ። ዋን. 11:1 39 እዝስካ ማይራሞ ግዝ ምሽታ የዛ፥ ማይራማ ቃላ ስእታር ጎዳይ ቶኬ ካለ በቴዛ። 40 ዝን ማርታ ጋመ ኦሶር ኡንእንቲ የሱሳኮ ሺቂ፥ «ጎዳዮ፥ ታ ምሽታ ኦሶ ታ ኣዳስ አሺ በቲ አትን ታ ዳቡሮዳር ነ ብእታር ስኢ ግኔ? እዛ ታና ማዶድ ጋርክ ኦዶሳ» ዬጌዛ።

41 ዝን ጎዳይ Ꮊይ ጋርክ ግ ማሄዛ፥ «ማርታ፥ ማርታ፥ ነ ጋመባዛር ቱርቱሪ መትንትዛ። 42 ማቆዝን፥ ኮይንትዛይ ፐትባዝ ኣዳ። ማይራማ ሎኦ ባዝ ዶሬዛ፥ የይካ እዝፐ ኤክንታሚ» ዬጌዛ።