1 የ ዎደ ፋዝቃ ዬግንትዝ ቦራ ባለ ኡኬዛ። ከስ 12:1 2 ቄሰ ሀላቅታይኔ ህገ አስታማርታይ አሳይስ ያሽቴዝ ግሾስ ዋይዚ የሱሳ ፋ ጋንጨፕ ꬋብሶዳዛኮ ኦገ ኮይዛ። 3 ጻላሄ ታጶ ናምእታይፕ ፐታ ማቄዝ አስቆሮንቶ ይሁዳ ግንትንትዛይ ጋንጨ ገሌዛ። 4 ይሁዳ ቄሰ ሀላቅታይኮራ ጾሳ ካራ ናግዝታይስ ሀላቅታይኮ Ꮊንጊ የሱሳ ዋይዚ ኣꬂ እንጎዳዛኮ ኡንታር ማቅንቴዛ። 5 ኡንትካ የይድ ኡፋይቲ ሚሸ እንጎዳይስ ኤዛር ቶቤዛ። 6 ኤዝካ የ ዞራይድ ጊጌዛ። ኡንትስ አሲ ኤረካዝን ኣꬂ እማዳይስ ጊጋ ዎደ ናግታር የዛ።

7 የይፐ ጉየ፥ ፋዝቃ ዱር ሹክንትዛ ቦራ ባለ ሄሌዛ። 8 የሱሳ፥ «ፋዝቃ ካሆ ማዳይ ጋርክ Ꮊንጊ ኑስ ጊግሶይታ» ዬጊ ጵጽሮሳኔ ዋንሳ ኪቴዛ። 9 ኡ፥ «ኑ አባ ጊግሶድ ጋርክ ነ ኮዬ» ዬጊ ኦይጬዛ። 10 ኤ ኡንትኮ፥ «ዬዛኮ ይ ካታማ ገሎዳር ሃꬅ ኦታ ቶኬዝ አꬃይ ይንታን ሄሎዳ። ኤ Ꮊንጊ ገልዛ ካራ ኤዛ ካል ገሎይታ። 11 የ ካራ አዳይኮ አስታማራይ፥ ‹ታ ታ ታማርታይራ ዎላ ፋዝቃ ካሆ ማዳይስ እማꬂ ሸምፕዛ ካራ አባ የኔ? ዬጌዛ› ጎይታ። 12 ኤ ፖቄል አፋ ሂጽንቲ ጊጊ የዝ ዳልገ ክፍለ ይንታን ቤዞዳ፥ ኤዛይድ ማኮይታ» ዬጌዛ። 13 ኡ Ꮊንጊ የሱሳ ጌዛይ ጋርክ ሀንን ደንጌዛ። ፋዝቃ ባለ ካሆ ኤዛይድ ጊግሴዛ።

14 ሳታይካ ሄሌዝ ዎደ የሱሳ ሀዋርታይር ዎላ ካሆል አፋ በቴዛ። 15 ኤ ኡንትኮ፥ «ታ ዋየ ኤኮዳይፕ ቲና Ꮊ ካሃ ይንታር ማዳይስ ሎእꬂ አሞቴዛ። 16 ይኬ፥ ስኦይታ! ጾስ ካተትꬃ Ꮊይስ ብርሽꬃይ ፖልንቶድ ጋꬆ Ꮊይኖፕ ጉየ Ꮊ ካሃ ማሂ ማሚ» ዬጌዛ። 17 ኡሻ ኤኪ ጋላቲ ማቂ፥ «Ꮊሽተ Ꮊያ ይ ጋንጨ ሻግንቶይታ። 18 ስኦይታ! ጾስ ካተትꬃይ የኦድ ጋꬆ Ꮊይኖፕ አይኪ Ꮊ ዎይነ ኡሻይፕ ማቂ ታ ኡዣሚ» ዬጌዛ።

19 ቦራ ደንꬂ ኤኪ፥ ጋላቲ ማቂ፥ «Ꮊይ ይንትስ እንግንትዛ ታ አሾ። Ꮊያ ኦꬅታር ታና ቆፖይታ» ዬጊ ኡንትስ ባጺ እንጌዛ። 20 የይ ጋርከካ፥ ካሆፕ ጉየ ኡሻ ኤኪ፥ «Ꮊ ኡሻይ ይንትስ ላልንቴዝ ታ ሱꬅ ማቅዝ ኦሮꬅ ጫቆ። ኤርም. 31:31 21 ማቆዝን፥ ታና ኣꬂ እንጎድ አꬃይ ኩሻይ ታር ዎላ ፕልኦ ጋንጨ የዛ። ማዝ. 41:9 22 አስ ናአይ ኤዝስ ጊንትንቴዛይ ጋርክ Ꮊይቆዳይስ የዛ፥ ዝን ኤዛ ኣꬂ እንግዝ አꬃያ አየ» ዬጌዛ። 23 ኡ ፋ ጋንጨ፥ «Ꮊያ ኦኒ ኦꬆዴ» ግ ዎል ኦይጭቼዛ።

24 ማ ኡ ጋንጨ ኣꬎ ማቃዳይ ኦኖ ግዝ ፓላማ መꬍንቴዛ።ማቶ. 18:1፤ ማር. 9:34፤ ሉቃ. 9:46 25 የሱሳ ኡንትኮ፥ «ጋደ ካትታይ ፋ አስታ ዎልቃር ሞድዛ፤ ፋ ጋደል አፋ ጎዳትዝታይካ ፋና፥ ‹ሎኦ ኦꬅዝታ› ዬግንትዛ። ማቶ. 20:25-27፤ ማር. 10:42-44 26 ዝን ይ ጋንጨ የይ ጋርክ ማቅፐ። ይ ጋንጨ ባይራትዛይ ካሎ ጋርክ ሀኖ፤ ማቶ. 23:11፤ ማር. 9:35 ካልꬅዛይ ካልዛይ ጋርክ ሀኖ። 27 ሀኖ ዝን፥ ሞክዛይፐኔ ሞክንትዛይፕ ኣይ ኣꬌ? ሞክንትዛ ባሳ? ዝን ታኒ ይ ጋንጨ ሞክዛይጋርኬ። ዋን. ቆን. 13:12 28 ይንትካ ታ መታይር ታፕ ሻክንቶዋ ታር ሚንጊ ኤቄዝታ። 29-30 ይ ታ ሌማተፕ ማድ ጋርክ፥ ኡዦድ ጋርከኔ ዙፋንታይል አፋ በቲ ታጶ ናምኢ እስሬለ ሼሽታይል አፋ ፕርዶድ ጋርክ ታ አዳይ ታና ሹሜዛይ ጋርክ ታካ ይንታን ታ ካተትትꬃይል ሹሞዳ» ዬጌዛ። ማቶ. 19:28

31 ማቅካ የሱሳ፥ «ስሞና፥ ስሞና፥ ጻላሄ ይንታን ግስተ ጋርከ ሀርቆዳይስ ዎሴዛ። 32 ዝን ታኒ ነ አማናይ ꬋባም ጋርክ ኔስ ዎሴዛ። ኔካ ማቄዝ ዎደ ነ እሽታ ምንꬃꬆባ» ዬጌዛ።

33 ስሞና፥ «ጎዳዮ፥ ታኒ ኔር አጭንቶዳይስኔ Ꮊይቆዳይስ ጊግንቴዛ» ዬጌዛ።

34 የሱሳ ጵጽሮሳኮ፥ «ታ ኔስ ኦድዛ፤ Ꮊይኖ ሹጉላ ኡኮዳይፕ ቲና ነ ታና ሀይꬒ ቶኬ ካዶዳ» ዬጌዛ። 35 ማ ማቅካ፥ የሱሳ ኡንትኮ፥ «ታኒ ይንታን ኮሮጆ፥ ቁርቦኔ ጫማ ባዝን ኪቴዝ ዎደ ይንትስ ፓጬዝ ባዝ የኔ?» ዬጊ ኦይጬዛ። ማቶ. 10:9-10፤ ማር. 6:8-9፤ ሉቃ. 9:3

ኡ ማሂ፥ «አኮካ ፓጨካያ» ዬጌዛ።

36 ኤ ኡንትኮ፥ «Ꮊት ኮሮጆኔ ቁርቦ የዛይ አይኮ፤ ማሻ ባዛይ ፋ አፍላ ባይዚ ማሻ ዎንጎ። 37 Ꮊና ስኦይታ! ‹ዡጭታይር ታይብንቴዛ› ግንትንቲ ጻፍንቴዛይ ታል ፖልንቶዳይስ ቤዝዛ። ኤ፥ ታ ግሾስ ጻፍንቴዝባዝ ፖልንትዛይ ቱማተዛ» ዬጌዛ። ኢሳ. 53:12

38 ኤ ታማርታይ፥ «ጎዳዮ Ꮊይዳ ናምኢ ማሻ የዛ» ዬጌዛ።

ኤ፥ «ግዶዳ» ዬጌዛ።

39 የሱሳ ካሴሳይ ጋርክ ደንዲ ደብሬዘይተ አምባል አፋ ከዜዝ። ኤ ታማርታይ ኤዛ ካሌዛ። 40 የ አቃ ሄሌዝ ዎደ ይ «ፓጨ ጋንጨ ገላማይ ጋርክ ዎሶይታ» ዬጌዛ። 41 ኡንታፕ ሹች ꬎግን ሄልዛ አቆ ጋርክ ሃኪ ቡንቂቲ ዎሴዛ። 42 «ታ አዳዮ፥ ነ ሸነ ማቅኮ Ꮊ መቶ ጹአ ታፕ ኣꬆባ። ዝን ታ ሸነ ማቅፐ ነ ሸናይ ሀኖ» ዬጊ ዎሴዛ። 43 ምንꬃꬅዛ። ኪታንቻይ ሳሎፕ በንቴዛ። 44 ጋመ ኡንእንቲ ሚንꬂ ዎስዛ። ኤ ጫዋይካ ሱꬂ ጾክዛይ ጋርክ ሳአ ጾኬዛ።

45 የሱሳ ዎሳ ዉርሲ ፋ ታማርታይኮ የኤዛ። ኡ፥ አዛኖፐ ደንዴዛይድ ዳቡሪ ገንቴዝን ደንጊ፥ 46 «አብስ ገንቴ? ይ ፓጨ ጋንጨ ገላም ጋርክ ደንዲ ዎሶይታ» ዬጌዛ።

47 ኤ ሀጋ ኦዳል አፋ የዝን ጋመ አሳይ የኤዛ። ታጶ ናምእታይፕ ፐታይ ይሁዳ ግንትንትዛይ ኡንታን ካልꬅዛ። ኤ የሱሳ ዬሮዳይስ ላንቀ ሺቄዛ። 48 ዝን የሱሳ፥ «ይሁዳ፥ አስ ናአ ዬሪ ኣꬂ እማደ?» ዬጌዛ።

49 የሱሳ ታማርታይ የ ሀና ብኢ፥ «ጎዳዮ ኑ ማሻር ጋቾ?» ዬጌዛ። 50 ኡ ጋንጨፕ ፐታይ ቄሰ ሀላቃይ አይላይስ ሾጪ ኡሻች ሀይቶ ጋቺ ኦሌዛ።

51 ዝን የሱሳ፥ «አሾባ!»*አሾባ! ክኦይፓተ፦ የሱሳ Ꮊ በሳይድ አሾባ ዬጌዛይ ኤዛ አሾዳይስ ግ አꬃይ ሀያ ጋቼዛና አሾባ ጋችፐ ጌዛነ፥ ሀራ አሳይ ኤዛ አይኮዳይስ የኤዝታ ካይፓተ Ꮊት ኡ ዎደ የጌዝታ ናምኢ ቆፍታ ዎል ሄልꬂ አይኬዛ። ዬጌዛ። አꬃይ ሀያ ቦቺ ፓꬄዛ።

52 የይፕ ጉየ፥ የሱሳ ፋና አይኮዳይስ የኤዝ ቄሰ ሀላቅታይኮ፥ ጾስ ኬꬅ ናግዝታ ሹምታይኮኔ ጭምታይኮ፥ «ፓኖ አይክዝ አስ ጋርክ ማሻኔ ጉፈ አይኪ የኤኔ? 53 ኡባ ጋላስ ጾስ ኬꬅ ጋንጨ ታ ይንታር የዝ ዎደ ታል አፋ ኩሸ ጋደካያ ዝን Ꮊይ ꬉማ ካተትꬃይ ሞዴዝ ዎደኔ ይ ዎደ» ዬጌዛ። ሉቃ. 19:47፤ 21:37

54 የይፐ ጉየ፥ የሱሳና አይኪ ቄሰ ሀላቃይ ዛባ ካንጌዛ። ጵጽሮሳ ሃኮር የሱሳና ካልዛ። 55 አሳይ ቄሰ ሀላቃይ ዛባይድ ታማ ኤꬂ ዎላ በቴዝን ጵጽሮሳ ኡንታር ዎላ በቴዛ። 56 ፐቲ ጋꬊንዳታ ጵጽሮሳ ታማ ላንቀ በቴዛና ታማ ፎአይር ዳኪ ብኢ፥ «Ꮊ አꬃይ ኤዛር የዛ» ዬጌዛ።

57 ዝን ጵጽሮሳ፥ «Ꮊን አስቴ ታ የ አꬃ ኤሮያ» ዬጊ ካዴዛ።

58 ጽቃ ሳተፕ ጉየ ፐቲ ሀራ አꬃይ ኤዛ ብኢ፥ «ኔካ ኡንታፕ ፐታባይ» ዬጌዛ።

ዝን ጵጽሮሳ፥ «Ꮊ አꬃዮ ታና ባያ» ዬጌዛ።

59 ፐቲ ሳተ ጋርክ ጋምኤዛይፕ ጉየ ፐቲ ሀራ አꬃይ ትልሲ፥ «Ꮊ አꬃይ ጋልላፕ ማቅዝ ግሾስ ስ ባይꬅ ኤዛር የዛ» ዬጌዛ።

60 ዝን ጵጽሮሳ፥ «Ꮊ አꬃዮ፥ ነ ግዛና ታ ኤሮያ» ዬጌዛ። ኤ የ ኦዳ ዉርሰካዝን ሹጉላ ኡኬዛ።

61 ጎዳይ ጉየ ሽርንቲ ኤቂ ጵጽሮሳ በኤዛ። ጵጽሮሳ፥ «Ꮊይኖ ሹጉላ ኡኮዳይፕ ቲና ነ ታና ሀይꬒ ቶኬ ካዶዳ» ዬጊ፥ ጎዳይ ኦዴዝ ቃላይ ኤዝስ ኤልቂ ጌዛ። 62 ጵጽሮሳስ ባለ ከዚ ዱካ ሱꬅ ዬኬዛ።

63 የሱሳ ናግዝ አሳይ ኤዛ ላቃሶኔ Ꮊꬎ አይኬዛ። 64 ኤ አፋ ጎዚ «አን ነ ናበዛኮ ኤሮባ፤ ነና ሾጬዛይ ኦኖ?» ዬጊ ኦይጭዛ። 65 ሀራ ጋመ ጫሺ ጫዢ ካዉሽሴዛ።

66 ሳአ ዎንትዛ ዎደ አይሁደ ጋደ ጭምታይ፥ ቄሰ ሀላቅታይኔ ህገ አስታማርታይ ሺቂ፥ የሱሳና ፋ ቲና ሺሼዛ። 67 ኡ፥ «ነ ክርስቶሳ? አን ኑስ ኦዶባ?» ዬጊ ኦይጬዛ።

የሱሳ፥ «ታ ኦድዛኮን ይ አማናሚ። 68 ታ ኦይጭዛኮ ይ ማሃሚ። 69 ዝን አስ ናአይ Ꮊይፕ ገደ ዎልቃማ ጾስ ኡሻች ባጋር በቶዳ» ዬጌዛ።

70 የ ዎደ ኡቢታይ፥ «የዝን፥ ነ ጾሳ ናአ?» ዬጌዛ።

ኤ፥ «ታ ጾስ ናአ ማቄዛና ይ ጌዛ» ዬጌዛ።

71 ኡ፥ «ይኬ፥ ሀራ ማርካ አብ ኮሼ? ኤ ፋ ዶናር ኦዶዳር ኑ ስኤዛ» ዬጌዛ።