ኦሮꬅ ጫቆ ማቶሳ 5

የሱሳ አምባል አፋ ታማርሴዝ ትምርተ

1 ጋመ ዎያ ሺቄዛና የሱሳ ብኢ አምባል አፋ ከዚ በቴዛ። ኤ ታማርታይ ኤዝኮ ሺቅን፥ 2 Ꮊይ ጋርክ ዬጊ ታማርሴዛ፦

ቱማ ኡፋይስ

(ሉቃ. 6:2-23)

3 «አያናር ማንቅታይ አንጅንቴዝታ፥ *

ሳሎ ካተትꬃይ ኡንትሲ።

4 ዬክዝታይ አንጅንቴዝታ፥

ኡ ምንꬃꬆ ደማዳ።

5 ሃይታይ አንጅንቴዝታ፥

ኡ ሳአ ላቶዳ።

6 ጌሸትꬅ ናይንትዝታይኔ ሳምንትዝታይ አንጅንቴዝታ፥

ኡ ምዦዳ።

7 ማርዝታይ አንጅንቴዝታ፥

ኡ ማሮትꬅ ደማዳ።

8 ዎዝና ጌሽታይ አንጅንቴዝታ፥

ኡ ጾሳ በአዳ።

9 እግንꬅዝታይ አንጅንቴዝታ፥

ኡ ጾስ ናእታ ግንትንቲ ጼግንቶዳ።

10 ጌሽ ባዝስ ግ፥

ባይእንትዝታይ አንጅንቴዝታ፥

ሳሎ ካተትꬃይ ኡንትሲ።

11 «አሳይ ይንታን ታ ግሾስ ግ ጫዢ ባይኢ ይንታል አፋ ኢታ ባዝ ኡባ ዎርዶር ኦድኮ ይ አንጅንቴዝታ። 12 ይ ሳሎ Ꮊንጊ ኤኮድ ዎይታይ ዳማ ማቄዝ ግሾስ ኡፋይቶይታ፥ ሀባ ጎይታ። ይንታፕ ቲና የዝ ናብታ Ꮊይ ጋርክ ባይኤዛ።»

አላማይስ ማጽነኔ ፖኦ ማቅꬅ

13 «ይ ቢታስ ማጽነ፤ ማጽነ ፋ ማጽነትꬅ አሽኮ፥ ፋ ማልኦትꬃ ዋይዚ ማሂ ደማዴ? ባለ ኦልን አሳር የꬍንቶዳይፕ አትን አብስካ ማዶያ።

14 «ይ ቢታስ ፖኦ፤ ደረል አፋ የዝ ካታምታ ጌሞዳይስ ዳንዳኦያ። 15 ጾምፐ አይꬂ ካራ የዝ አስ ኡባይስ ፖኦዳይ ጋርክ ꬎቃ አቆ ጋድዛፕ አትን ኦታ ጋንጨ ጋድዛይ ባያ። 16 የይ ጋርክ አሳይ ይ ሎኦ ኦሳ ብኢ፥ ሳሎ የዝ ይ አዳ ቦንቾዳይ ጋርክ ይ ፖአይ አስ ቲና ፖኦ።

ሙሰ ህገ

17 «ታኒ ሙሰ ህጋኔ ናብታይ ቃላ ሻሮዳይስ የኤዛ ይንትስ ኣዝፐ። ታ፥ ፖሎዳይስ የኤዛፕ አትን ሻሮዳይስ የኤካያ። 18 ታ ይንትስ ቱሮ ኦድዛ፤ ሳሎኔ ሳአ ኣꬎድ ሄሎዳይስ ህገ ኡባይ ፖልንቶዳይፕ አትን ህጋይፕ ፐቲ ቃላ ዎይ ፕዳለ ጹቃካ ኣꬋሚ። 19 የይ ግሾስ፥ Ꮊ ኪትታይፕ ጽቅዛ ፐቲ ኪታ መንꬅዛ ኦንካ ማ Ꮊንክታ የይ ጋርክ ኦꬆድ ጋርክ ታማርስዛይ ኦንካ ሳሎ ካተትꬃ ኡባፕ ላፋ ማቆዳ። ዝን Ꮊ ኪታ ፖልዝታይኔ Ꮊንክታካ ፖሎድ ጋርክ ታማርስዛይ ሳሎ ካተትꬃ ኣꬎ ማቆዳ። 20 ታ ይንትስ ኦድዛ፤ ይ ጽሎትꬃይ ፈርሳውታይ ጽሎትꬃይፐኔ ህገ አስታማርታይ ጽሎትꬃይፕ ኣካ አትኮ፥ ሳሎ ካተትꬃ ይ የሻ ገላሚ።

ሸምፖ ዎꬎ ባጋ

21 «ይ ማይዝታይስ፥ ‹ዎꬍፓተ፤ ሸምፖ ዎꬍዝ ኦንካ ፕርድንቶዳ› ግንትንቴዛና ይ ስኤዛ። 22 ዝን ታ ይንትስ ኦድዛ፤ ፋ እሻይር ካጭንትዝ ኡባይ ፕርድንቶዳ። ፋ እሻ ጩርቃይ ግዝ ኦንካ ዳይና ቲና ፕርዳስ ሺቆዳ። ፋ እሻይኮ፥ ‹ቱላይ› ግዝ ኦንካ ጋናመ ታማ ፕርድንቶዳ።

23 «የይ ግሾስ፥ ኔኒ ነ ያርሻ ያርሾዳር ነ እሻ ሽፍሼዝ ባዝ ኔስ ቆፍንትኮ፥ 24 ነ ያርሻ ያ አቃይድ አሺ ቅቶባ፤ ቲናቲ Ꮊንጊ ነ እሻይር ጊጎባ፤ ዬዚ ማቂ፥ ነ ያርሻ ጾስስ ያርሾባ።

25 «ነና ሞትዛይራ ፕርደ ኬꬅ Ꮊንግታር ኦገል አፋ ኤዛር ዳቦቶባ። የይ አቶ ጊኮ ኤ ነና ዳይና ቲና ካንጎዳ። ዳይናይ ነና አጭዛይስ ኣꬂ እማዳ፤ ኤ ነና ዎይነ ኦሎዳ። 26 ታ ቱሮ ኦድዛ፤ ሚሻይፕ ፐቲ ሳንትፈ አተካዝ ጭጊ ሃሶድ ሄሎዳይስ አች ኬꬃፕ ነ ኬዛሚ።

ላሞዳይስ ቤዞያ

27 « ‹ላምፓተ› ግንትንቴዛና ይ ስኤዛ። 28 ዝን ታ ይንትስ ኦድዛ፥ ማች ብኢ፥ አሞቴዝ ኡባይ ፋ ዎዝና ጋንጨ እዝር ላሜዛ። 29 ነ ኡሻች ኣፋይ ነና ናጋራ ቤዝዛ ማቅኮ፥ ከሲ ኦሎባ። ነ አሻይ ኩንꬅዝን ጋናመ ታማ ጋንጨ ዎꬋዳይፕ ነ አሳተꬃይፐ ፐታይ ꬋብኮ ኔስ ሎኦ። 30 ነ ኡሻች ኩሻይ ነና ናጋራ ኦꬅስዛ ማቅኮ፥ እዞ ጋቺ ኦሎባ። ነ ጋላይ ኩንꬅዝን ጋናመ ታማ ጋንጨ ዎꬋዳይፕ ነ አሳተꬃይፐ ፐታይ ꬋብኮ፥ ኔስ ሎኦ።

ማቾ አንጆ ባጋ

(ማቶ. 19:9፤ ማር. 10:11-12፤ ሉቃ. 16:18)

31 «ፋ ማቻቶ ዳክዝ ኦንካ አንጆ ዋርቃተ እንጎ» ግንትንቴዛ። 32 ዝን ታ ይንትስ ኦድዛ፤ ፋ ማቻቶ ላግተካዝን ብልእዝ ኦንካ እዛ ላሞድ ጋርክ ኦꬅዛ። የይ ጋርከካ፥ አንጅንቴዝ አስቶ ኤክዛ ኡባይ ላምዛ።

ጫቆ ባጋ

33 «ይ ማይዝታይኮ፥ ‹ዎርዶር ጫቂፓተ፤ ይ ጾስ ቲና ጫቀዛና ፖሎይታ› ግንትንቴዛ ይ ስኤዛ። 34 ዝን ታ ይንትስ ኦድዛ፤ ኡባራካ ጫቂፓተ። ጾሳይ በትዛ ዙፋነ ማቄዝ ግሾስ ሳሎር ጫቂፓተ። 35 ኤ ቶካይ የꬍዝ አቆ ማቄዝ ግሾስ ሳአራካ ጫቂፓተ። ግታ ካት ካታማ ማቄዝ ግሾስ የሩሳላመራካ ጫቂፓተ። 36 ይ ብናናይፕ ፐታካ ቦꬅ ዎይ ካርꬅ ኡዶዳይስ ዳንዳኦዋ ግሾስ ይንቲ ይ ኡባራካ ጫቂፕፓተ። 37 የይ ግሾስ፥ ይ ቃላይ፥ ‹ኤ› ዎይ ‹ዋኣ› ማቆ። የይፕ አቴዛይ ኢታፕ ይእዛ።

ኩሸ ከሶዳይስ ቤዞያ

38 « ‹ኣፈ ግሾስ ኣፈ፤ አች ግሾስ አች› ግንትንቴዛ ይ ስኤዛ። 39 ዝን ታ ይንትስ ኦድዛ፤ ይንታል አፋ ኢታ ባዝ ኦꬅዝ አꬃካ እጽፓተ። ኦንካ ነ ኡሻች ሻንጋላ ባቂኮ ነ ሀድርስ ሻንጋላካ ቤዞባ። 40 ፐቲ አሲ ነ ሻምዥቶ ኤኮዳይስ ነና ዳይናል ሞትኮ፥ ነ ኮታቶ ጉጂ እንጎባ። 41 ኦንካ አሲ ነና ዎልቃር ፋባዝ ቶሲ ፐቲ ክሎ ምትረ ባጋ ኦገ ፋር Ꮊንጎድ ጋርክ ነና ጭጵችኮ፥ ኤዛር ናምእ ዳኮ ኦገ Ꮊንጎባ። 42 ዎስዛ ኦስካ እንጎባ፤ ኔፐ ጋርጾዳይስ ኮይዝ ኦናካ ካይፐ።»

ነ ሞርክታ ቃꬎባ

(ሉቃ. 6:27-28፥ 32-36)

43 « ‹ነና ቃꬍዛና ቃꬎባ፤ ነና እጽዛና እጾባ› ግንትንቴዛና ይ ስኤዛ። 44 ዝን ታ ይንትስ ኦድዛ፤ ይ ሞርክታ ቃꬎይታ፤ ይንታን ቆህዝታይስ ዎሶይታ። 45 የይ ጋርክ ይ ኦꬅኮ፥ ሳሎ የዝ ይ አዳይስ ይ ናእታ ማቆዳ። ኤ ኢትታይስኔ ሎእታይስ አዋ ከስዛ፤ ጽልታይስኔ ናጋራንችታይስ ፋ እራ ቡክስዛ። 46 ይንታን ቃꬍዛ አስ ኣዳ ይ ቃꬍኮ፥ ይንትስ አባ ዎይቶ የኔ? ሀራ አቶዝን፥ ቃራጸ ጋችስዝታይካ ይኖ ኦꬆሳ? 47 ይንቲ፥ ይ እሽታይ ኣዳ ሳሮꬅኮ፥ Ꮊንክታይፕ አብ ሀራ ኣꬍዝባዝ ኦꬅኔ? ሀራ አቶዝን፥ ጾስ አማኖዋ አሳይካ ይኖ ኦꬆሳ? 48 ይኬ፥ ሳሎ የዝ ይ አዳይ ፎሎ ማቄዛይ ጋርክ ይንትካ ፎሎ ማቆይታ።»

*5:3 አያናር ማንቅታይ ጉሳይ ጾሳል አፋ ካትዝታኔ አማንንትዛ አሳ ጉሲ።

5:4 ኢሳ. 61:2

5:5 ማዝ. 37:11

5:6 ኢሳ. 55:1

5:8 ማዝ. 24:3

5:10 1ጵጽ. 3:14

5:11 1ጵጽ. 4:14

5:12 2ዜና. 36:16፤ ሀዋ. ኦ. 7:52

5:13 ማር. 9:50፤ ሉቃ. 14:34-35

5:14 ዋን. 8:12፤ 9:5

5:15 ማር. 4:21፤ ሉቃ. 8:16፤ 11:33

5:16 1ጵጽ. 2:12

5:18 ሉቃ. 16:17

5:21 ከስ 20:13፤ ናምእ. 5:17

5:27 ከስ 20:14፤ ናምእ. 5:18

5:29 ማቶ. 18:9፤ ማር. 9:47

5:30 ማቶ. 18:8፤ ማር. 9:43

5:31 ማቶ. 19:7፤ ማር. 10:4

5:32 ማቶ. 19:9፤ ማር. 10:11-12፤ ሉቃ. 16:18፤ 1ቆሮ. 7:10-11

5:33 ለዊ. 19:12፤ ታይ. 30:2፤ ናምእ. 23:21

5:34 ማቶ. 23:22

5:35 ኢሳ. 66:1፤ ማዝ. 48:2

5:38 ከስ 21:24፤ ለዊ. 24:20፤ ናምእ. 19:19

5:48 ለዊ. 19:2፤ ናምእ. 18:13