1 «ይንታል አፋ ፕርድንታማይ ጋርክ ሀራ አሳል አፋ ፕርድፓተ። 2 አብስ ጊኮ፥ ሀራ አሳል አፋ ይ ፕርድዛይ ጋርክ ይንታል አፋ ፕርዶዳ ይ ሀራ አስስ ማኬዝ ባዛር ይንትስ ማሂ ማክንቶዳ። ማር. 4:24 3 ነ ኣፈ የዝ ቱሳ በኤካዛር ነ እሻይ ኣፈ የዝ ቡጻ አብስ በኤ? 4 ነ ኣፈ ቱስ የዝን ነ እሻይ ኣፈ የዝ ቡጻ ከሶ ጎዳይስ ዋይዚ ዳንዳኤ? 5 ነኖ ጩባዮ፥ ቲናቲ ነ ኣፋይድ የዝ ቱሳ ከሶባ። ኤዛይፕ ጉየ ነ እሻይ ኣፋይድ የዝ ቡጻ ከሶዳይስ ነ ምልጽ ኡዲ በአዳ።

6 «ጉየ ማቂ ይንታን ꬋቃማይ ጋርክ ጌሽ ባዝ ካንታይስ ኦልፓተ። ፋ ቶካይር የꬊ ኢሳማይ ጋርክ ይ አልኦ እንቁ ጉዱዳይልታይ ቲና ኦልፓተ።

7 «ዎሶይታ ይንትስ እንግንቶዳ፥ ኮዦይታ ይ ደማዳ ባለ ይኢ ጼጎይታ ይንትስ ዶይንቶዳ። 8 ዎስዛ ኦስካ እንግንቶዳ ኮይዝ ኦስካ በንቶዳ ባለ ይኢ ጼግዝ ኦስካ ዶይንቶዳ።

9 «ይንታፕ ናአ ዳቦ ዎስኮ ሹች እንግዛይ ኦኖ? 10 ዎይ ሞሎ ዎስኮ ሾሽ እንግዛይ የኔ? 11 የዝን ይ ኢትታይ ይ ናእታይስ ሎኦ ባዝ እሞ ኤርኮ ሳሎ የዝ ይ አዳይ ፋና ዎስዝታይስ ሎኦ ባዝ ዋይዚ ጋንꬂ እንጋሞ? 12 Ꮊንክታይ ይንትስ ኦꬆድ ጋርክ ይ ኮዥዝ ባዝ ኡባ ይንትካ ሀራ አስስ ኦꬆይታ። አብስ ጊኮ፥ ሙሰ ህጋይኔ ናብታይ ታማርስዛይ Ꮊያ። ሉቃ. 6:31

13 «ኡንአ ፐንገር ገሎይታ፤ ꬋቦ ካንግዝ ኦጋይ ዳማ፥ ፐንጋይካ ዳልገ። ኤዛይር ገልዛ አሳይካ ጋመ። 14 ዝን ደኦኮ ካንግዝ ኦጋይኔ ፐንጋይ ኡንአ፤ ኤዛይር ገልዛ አሳይካ ጽቃ።

15 «አፋ ባጋር ዱረ ኣዚ ጋንጨር ፉገ ማቂ ቦንቆዳይስ ይ ጋንጨ ገልዛ ዎርዶ ናብታይፕ ናግንቶይታ። 16 ይ ኡንታን፥ ኡ ኣፋይር ኤሮዳ፤ አንጉꬂፕ ዎይኔ፥ ግጀፕ ባላሰ ማጽንቶያ። 17 የይ ጋርክ ሎኦ ምꬂ ኡባይ ሎኦ ኣፈ ኣፍዛ፤ ኢታ ምꬂ ኢታ ኣፈ ኣፍዛ። 18 ሎኦ ምꬂ ኢታ ኣፈ ኣፎያ፥ ማ ኢታ ምꬂ ሎኦ ኣፈ ኣፎዳይስ ዳንዳኦያ። 19 ሎኦ ኣፈ ኣፎዋ ምꬂ ኡቢታይ ጋችንቲ ታማ ጋንጨ ኦልንቶዳ። ማቶ. 3:10፤ ሉቃ. 3:9 20 የይ ግሾስ፥ ይ ኡንታን፥ ኡ ኣፋትር ኤሮዳ። ማቶ. 12:33

21 «ሳሎ የዝ ታ አዳይ አዛዞ ኦꬂዛ አꬃይ ሳሎ ካተትꬃ ገሎዳይፕ አትን ጨር ታና ‹ጎዳዮ፥ ጎዳዮ› ግዝ ኡባይ ሳሎ ካተትꬅ ገሎያ። 22 የ ዎደ ጋምታይ፥ ‹ጎዳዮ፥ ጎዳዮ፥ ነ ሱንꬃር ትንቢተ ኑ ኦደካሳ? ነ ሱንꬃር ቱና አያንታ ኑ ከሰካሳ? ነ ሱንꬃር ጋመ ማላታ ኑ ኦꬃካሳ?› ዬጎዳ። 23 የ ዎደ፥ ‹ታ ይንታን የሻ ኤሮያ፥ ይንቲ ዉጭታይ ታፕ ሃኮይታ› ዬጎዳ። ማዝ. 6:8

24 «ይኬ፥ Ꮊ ታ ቃላ ስኢ ኦꬅዛ ኦንካ ፋ ኬꬃ ዛላል አፋ ኬጼዝ ዎዛናማ አስ ጋርከ። 25 እራ ቡኬዛ፥ ድኦ ድኤዛ፥ ጫርኮካ ጫርኪ የ ኬꬃና ኡርቄዛ። ዝን ኬꬃይ ዛላል አፋ ኬጽንቴዝ ግሾስ ዎደካያ። 26 Ꮊ ታ ቃላ ስኢ ኦꬆዋ ኦንካ ፋ ኬꬃ ሻፈል አፋ ኬጼዝ ቦዞ አꬃይ ጋርከ። 27 እራ ቡኪ፥ ድኦ ድኢ፥ ጫርኮካ ጫርኪ፥ የ ኬꬃ ኡርቅን፥ የ ኬꬃይ ዎዴዛ፤ ኤ ዎድꬃይካ ዎልቃማ» ዬጌዛ።

28-29 የሱሳ ፋ ኦዳ ዉርሴዛይፕ ኤ ትምርታይ ህገ አስታማርታይ ጋርክ ማቀካ ማዉተር የዝ አሳይሳይ ጋርክ ማቅዝ ግሾስ አሳይ ኤ ትምርታ Ꮊይ ማላባዝ ጌዛ። ማር. 1:22፤ ሉቃ. 4:32