1 ኡሱፑን ጋላሳፕ ጉየ የሱሳ ጵጽሮሳ፥ ያይቆባኔ ኤ እሻ ዋንሳ ፓር ኤኪ ኡ ኣዳ ዳማ አምባል አፋ ከዜዛ። 2ጵጽ. 1:17-18 2 ኤዛይድ ኡ ቲና የሱሳ ማላይ ላምንቴዛ፤ ኤ ስናይካ አዋ ጋርክ ፖኤዛ። ኤ አፍላይካ ቦꬅ ፖኦ ጋርክ ፖጬዛ። 3 ይኬ፥ ሙሰኔ ኤላሳ ኤዛር ናሾዳር በኤዛ። 4 ጵጽሮሳ የሱሳኮ፥ «ኑኒ ነ ኮይኮ ፐቶ ኔስ፥ ፐቶ ሙሰሲ፥ ፐቶ ኤላሳስ Ꮊይዳ ሀይꬒ ሻቃራ አጮዳ» ዬጌዛ። 5 ጵጽሮሳ የያ ሀጋ ኦዶዳር ቦꬅ ሻራ ኡንታን ካሜዛ። ሻራይ ጋንጨ፥ «ታና ኡፋይስዛ፥ ታ ቃꬊዛ ናአይ Ꮊያ፥ ኤዛ ስኦይታ!» ዬግዝ ጊርꬂ የኤዛ። መ. 22:2፤ ማዝ. 2:7፤ ኢሳ. 42:1፤ ማቶ. 3:17፤ 12:18፤ ማር. 1:11፤ ሉቃ. 3:22፤ ናምእ. 18:15 6 የሱሳ ታማርታይ የያ ስኢ ዳጋሚ ፋ ስናይር ሳአ ጉጲንጌዛ። 7 ዝን የሱሳ ኡንትኮ ሺቂ ኡንታን ቦቺ፥ «ደንዶይታ፥ ያሽትፓተ!» ዬጌዛ። 8 ኡ ꬎቅ ግ በአዳር የሱሳፕ ሀራ ኦናካ በኤካያ።

9 ኡ አምባላፕ ዎꬎዳር የሱሳ ኡንትኮ፥ «አስ ናአይ Ꮊይቆፕ ደንዶድ ሄሎዳይስ Ꮊያ ይ በኤዝ ባዛና ኦስካ ኦድፓተ» ግ አዛዜዛ። 10 የሱሳ ታማርታይ፥ «የዝን፥ ህገ አስታማርታይ ኤላሳ ክርስቶሳፕ ቲናቲ የኦድ ጌዛይ አብሶ?» ዬጊ ኦይጬዛ። ሚል. 4:5

11 የሱሳ ማሂ፥ «ኤ! ኤላሳ ቲናꬊ ይኢ ኡባ ባዝ ሎእꬆዳ። 12 ዝን ታ ይንትስ ቱሮ ኦድዛ፤ ኤላሳ ቲናቲ የኤዛ። ኡንትካ ኤዛል አፋ ኮዬዝ ባዝ ኦꬂዛይፕ አትን ኤዛ ሻኪ ኤረካያ። የይ ጋርክ አስ ናአይ ኡ ኩሸ መቶ ኤኮዳ» ዬጌዛ። ማቶ. 11:14

13 የ ዎደ የሱሳ ጌዛይ ጻማቅዛ ዋንሳ ባጋ ማቄዛና ኡ አካኬዛ።

14 ኡ አምባላፕ አሳይኮ ማቄዛን ጋርክ ፐቲ አꬃይ የሱሳ ቲና ቡንቅቲ፥ 15 «ጎዳዮ፥ ማጋነ ታ ናአይስ ቃꬊንቶየ፤ ኤዛ አግናር አግናር ደንዲ ታማ ጋንጨኔ ሃꬅ ጋንጨ ሾጪ ኦልዝ ኢታ ሀርገ የዛ። 16 ነ ታማርታይኮ ታ ክእን፥ ኡ ፓꬆዳይስ ዳንዳኤካያ» ዬጌዛ።

17 የሱሳ ማሂ፥ «ይንታኖ፥ አማኖዋ ዡጫ የለትꬂታዮ አይደ ሄሎዳይስ ታ ይንታር የዞዴ? አይደ ሄሎዳይስ ታ ይንታን ዳንዳኦዴ? አን ናአ Ꮊና ኤኪ የኦይታ» ዬጌዛ። 18 የሱሳ ቱና አያና ቆድን፥ ቱና አያናይ ናአይፕ ከዜዝ፤ የ ሳታተ ናአይ ፓጼዛ። 19 የይፕ ጉየ፥ የሱሳ ታማርታይ ፋ ኣዳስ ኤዝኮ ሺቂ፥ «ኑኒ ቱና አያና ከሶዳይስ ዳንዳኤካዛይ አብሶ?» ዬጊ ኦይጬዛ። 20 ኤ ኡንትኮ፥ «ይንትስ አማኖ ጽቄዝ ግሾሲ። ታ ይንትስ ቱሮ ኦድዛ፤ ሳናፍጨ ኣፈ ጋርክ አማኖ ይንትስ የዛኮ ‹Ꮊ አምባ Ꮊይፕ ደንዲ ገደ ኣꬎባ› ጊኮ ይንትስ ኪትንቶዳ። ይንትስ ዳንዳእንቶዋ ባዝ ባያ። 21 [ዝን የይ ጋርከዛይ ዎሳፐኔ ጾማፕ አትን ሀራር ከዞያ]» ዬጌዛ። ማቶ. 21:21፤ ማር. 11:23፤ 1ቆሮ. 13:2*ፐቲ ፐቲ ብኒ ማጻፍታይድ ታይቦ 21 ባያ።

22 የሱሳ ታማርታይ ጋልላ ቢታ ሺቂ የዝን የሱሳ ኡንትኮ፥ «አስ ናአይ አስ ኩሸ ኣ እንግንቶዳ። 23 ኡንቲ ኤዛ ዎꬎዳ፥ ዝን ኤ ሃይꬒንꬃ ጋላስ Ꮊይቆፕ ደንዶዳ» ዬጌዛ።

ኤ ታማርታይካ ኢታ አዛኔዛ።

24 የሱሳራ ኤ ታማርታይራ ቅፍርናሆመ ካታማ ሄሌዝ ዎደ ጾሳ ኬꬃ ጊራ ኤክዝታይ ጵጽሮሳኮ ይኢ፥ «ይ አስታማራይ ዎሳ ኬꬃ ጊራ ጊርነኔ?» ዬጊ ኦይጬዛ። ከስ 30:13

25 ጵጽሮሳ ማሂ፥ «ጊርዛ» ዬጌዛ። ጵጽሮሳ ካራ ገሎዳር የሱሳ ቲናቲ፥ «ጵጽሮሳ፥ ኔስ አብ ኣዜ? Ꮊ ሳአ ካተትꬃይ ቃራጸኔ ጊራ ኦፕ ኤክኔ? ጋደ አሳይፐኔ አስ ጋደ አሳፕ?» ዬጊ ኦይጬዛ።

26 ጵጽሮሳ «አስ ጋደ አሳፔ» ግ ማሄዛ።

የሱሳ ማሂ፥ «ጋደ አስ ጊራ ጊሮዋ ጉሶ? 27 ዝን ኡ ꬉብንታማይ ጋርክ አባ Ꮊንጊ ሞሎ አይክዝ ማንጻቆ ኦሎባ። ቲና ነ አይክዝ ሞላይ ዶና ዶዪ ጊራስ ግድዛ ሚሸ ኤኪ ነ ግሾኔ ታ ግሾስ ካንጊ ጊሮባ» ዬጌዛ።