8
የሱሳ ኦይዲ ሙኩለ አሲ ሙዜዛ
(ማቶ. 15:32-39)
1 ጽቃ ዎደፕ ጉየ፥ ጋመ አሳይ የሱሳኮ ሺቄዛ። አሳይስ ሚዝባዝ ꬋብን የሱሳ ፋ ታማርታ ፋኮ ጼጊ፥ 2 «Ꮊ አሳይ ታር ሀይꬒ ጋላስ ሄሎዳይስ ጋምኢ፥ አብካ ሚዝ ባዝ ደንገካዛይ ግሾስ ታና አሳይ ቃꬊꬂዛ። 3 ታ አሳ ናየር ካራ ዳካሚ፥ አሳይ Ꮊንግታር ኦገላ ዳቡሪ ፖኮዳ፥ ባጋ አሳይ ሃኮፕ የኤዛ» ዬጌዛ።
4 የሱሳ ታማርታይ ማሂ፥ «Ꮊ ሊዣይድ Ꮊ አሳ ኡባ ሙዞዳይስ ግድዛ ካꬃ ደንጎዳይስ ዳንዳእዛይ ኦኖ?» ዬጌዛ።
5 የሱሳ ኡንትኮ፥ «ይንታር ኣፑን ሶሎ የኔ?» ዬጊ ኦይጬዛ።
ኡ ማሂ፥ «ላፑን ሶሎ የዛ» ዬጌዛ።
6 የሱሳ አሳይ ሳአ በቶዳይ ጋርክ ኪቴዛ። ዬዜዛይፕ፥ ላፑን ሶሎ ኤኪ ጾስ ጋላቲ ማቂ የ ሶላ ዱꬅርꬂ፥ አሳይስ ግሾድ ጋርክ ፋ ታማርታይስ እንጌዛ። ኤ ታማርታይ አሳይስ ግሼዛ። 7 ኡንትስ ማ ጽቃ ይሸ ሞልታይ የዛ። የሱሳ የ ሞልታይ ግሾስ ጾስ ጋላቲ፥ አሳይስ ግሾድ ጋርክ ፋ ታማርታ ኪቴዛ። 8 አሳይ ኡቢታይ ም ምዤዛ። ኤ ታማርታይ አቴዝ ጉፋ ላፑን ሌማተ ኩንꬅ ደንꬄዛ። 9 ካꬃ ሜዝ አሳይ ታይባይ ኦይዲ ሙኩለ ማቆዳ። የይፕ ጉየ፥ የሱሳ አሳ ዳኬዛ። 10 ኤ ማ ፋ ታማርታይር ኤልꬂ ዎጎሎ ጋንጨ ገሊ ዳልማኑታ ግንትዝ ቢታ ቅቴዛ።
ማላ ኦꬅንቶዳይ ጋርክ ኦይጬዛ
(ማቶ. 16:1-4)
11 ፈርሳወ አስታይ ይኢ የሱሳ ፓጮዳይስ ኮዪ፥ ሳሎፕ ኡ ፋና ማላ ቤዞዳይ ጋርክ የሱሳር ፓላማ አይኬዛ። ማቶ. 12:38፤ ሉቃ. 11:16
12 የሱሳ ሼምቲ፥ «Ꮊ ዎደ አሳይ አብስ ማላ ኮዬ? ታ ይንትስ ቱማ ኦድዛ፤ Ꮊ ዎደ አስስ አባ ማላካ እንግንቴና» ዬጌዛ። ማቶ. 12:39፤ ሉቃ. 11:29 13 ኤ ኡንታን እዘ ኦሊ አሺ ማቂ ዎጎሎ ጋንጨ ገሊ አባይፕ ሰኮ ፕኖ ፒንጌዛ።
ፈርሳውታይኔ ሄሮዶሳ እርሾ
(ማቶ. 16:5-12)
14 ኤ ታማርታይ ካꬃ ኤኪ Ꮊሞ ዶጌዛ፤ ኡንትስ ዎጎላይ ጋንጨ ፐቲ ሶሎፕ ሀራ ካꬃ ባያ። 15 የሱሳ ኡንትኮ፥ «ይንታን ኤሮይታ። ፈርሳውታይ እርሾፐኔ ሄሮዶሳ እርሾፕ ናግንቶይታ» ዬጊ አዛዜዛ። ሉቃ. 12:1
16 ኡንቲ ዎል ጋንጨ፥ «ኤ Ꮊያ ግዛይ ኑስ ሶሎ ባዛይ ግሾስ» ዬጌዛ።
17 የሱሳ ኡ ግዛና ኤሪ ኡንትኮ፥ «ይንትስ ሶሎ ባዛይ ግሾስ አብስ ኦድንቴ? Ꮊተካ ይ ኤሮሳ? ዎይ ይ አካኮሳ? ይ ዎዝናይ ዶጬኔ? 18 ይንትስ ኣፈ የዝን ቦኦሳ? ሀየ የዝን ስኦሳ? ይንትስ ዋይዚ አካክንቶሳ?ኤርም. 5:21፤ ኢዝቀ. 12:2፤ ማር. 4:12 19 ታ እችን ሶሎ እችን ሙኩለ አስስ ፔꬌዝ ዎደ ኣፑን ሌማተ ኩንꬅ ጉፋ ደንꬄኔ?» ዬጌዛ።
ኡንትካ፥ «ታጶ ናምኢ ሌማተ ኩንꬅ» ዬጌዛ።
20 «የይ ጋርክ፥ ታ ላፑን ሶሎ ኦይዲ ሙኩለ አስስ ፔꬊን ኣፑን ሌማተ ኩንꬅ ጉፋ ደንꬄኔ?» ዬጌዛ።
ኡንቲ፥ «ላፑን ሌማተ ኩንꬅ ደንꬄዛ» ዬጌዛ።
21 የዝን፥ «Ꮊተካ ይንትስ ቆፍንቶሳ?» ዬጌዛ።
የሱሳ ቤተሳይዳ ፐቲ ኣፈ ቶአ ፓꬄዛ
22 ኡንቲ ቤተሳይዳ ካታማ Ꮊንጌዛ። ጽቃ አስታይ ቶአ አꬃ የሱሳኮ ክኢ የ አꬃ ቦቾድ ጋርክ ኤዛ ዎሴዛ። 23 የሱሳ ቶአ አꬃይ ኩሻ አይኪ ካታማፕ ጋጻ ከሴዛ። ኤ ኣፋተ ጩቲ ፋ ኩሻ ኤዛል አፋ ጋዲ፥ «ኔስ አኮ በንትኔ?» ዬጊ ኦይጬዛ።
24 አꬃይ ꬎቅ ግ ብኢ፥ «ታስ አሳይ በንትዛ፥ ዝን አሳይ የꬍታር ምꬂ ኣዝዛ» ዬጌዛ።
25 የይፕ ጉየ፥ የሱሳ ማሂ፥ አꬃይ ኣፋይል ፋ ኩሸ ጋዴዛ። አꬃይ ሎእꬂ በኤዛ፥ ኤ ኣፋይ ፓጼዛ፥ ኡባ ባዝ ምልጽ ኡዲ በኤዛ። 26 የሱሳ አꬃይኮ፥ «ነ ካራ ቅቶባ፥ ካታማ Ꮊንግፐ» ዬጊ ኪቴዛ።
ጵጽሮሳ አማኖኔ ማርካትꬂ
(ማቶ. 16:13-20፤ ሉቃ. 9:18-21)
27 የሱሳ ፋ ታማርታይር ቅሳረ ፍልጶሳ ካለ የዝ ሄራ Ꮊንጌዛ። ኡ Ꮊማዳር ኦገል አፋ የሱሳ፥ «ታና አሳይ ኦና ግነሻ?» ዬጊ ፋ ታማርታ ኦይጬዛ።
28 ኤ ታማርታይ፥ «ፐቲ ፐቲ አሳይ ነና፥ ‹ጻማቅዛ ዋንሳ› ግዛ፤ Ꮊንክታይ፥ ‹ኤላሳ ግዛ› ማ Ꮊንክታይ፥ ‹ናብታይፕ ፐታ› ግዛ» ዬጌዛ። ማር. 6:14
29 የሱሳ ኡንትኮ፥ «የዝን ይ ታና ኦና ጌ?» ዬጊ ኦይጬዛ።
ጵጽሮሳ፥ «ነ ክርስቶሳ» ዬጊ ማሄዛ።
30 የሱሳ፥ «ታባጋ ኦስካ ኦዳማይ ጋርክ ናግንቶይታ» ዬጊ ኡንታን አዛዜዛ።
የሱሳ ፋና ሄሎድ መቶኔ ዋያ ኦዴዛ
(ማቶ. 16:21-28፤ ሉቃ. 9:22-27)
31 የሱሳ ፋ ታማርታይኮ፥ «አስ ናአይ፥ ጋመ መቶ ኤኮዳይስ ቤዝዛ፤ ጭምታይ፥ ቄሰ ሀላቅታይኔ ህገ አስታማርታይ ኤዛ እጾዳይስ ቤዝዛ። ኡንቲ ኤዛ ዎꬎዳይስኔ ሀይꬒ ጋላሳፕ ጉየ፥ ኤ Ꮊይቆፕ ደንዶዳይስ ቤዝዛ» ዬጊ ኡንታን ታማርሴዛ። 32 ኤ የያ ኡንትስ ጌሺ ኦዴዛ። ጵጽሮሳ ኣዳ ፐቲ ባጋ ኣꬂ ካጬዛ።
33 ዝን የሱሳ ጉየ ማቂ፥ ፋ ታማርታ ብኢ፥ ጵጽሮሳር ካጭንቲ፥ «Ꮊ ጻላሃዮ፥ ታፕ ሃኮባ። ነ አሲ ዶስዝባዝ ቆፕዛፕ አትን ጾስ ዶስዝባዝ ቆፖያ» ዬጌዛ።
የሱሳ ካሎዳይስ ፋና ካዶ ኮሽዛ
(ማቶ. 10:38-39፤ 16:24-28፤ ሉቃ. 9:23-27፤ 14:26-27)
34 ማካ የሱሳ ጋመ አስታይራ ፋ ታማርታ ፋኮ ጼጊ፥ «ታና ካሎዳይስ ኮይዝ ኦንካ ፋና ካዶ፤ ፋ ማዝቃላና ቶኪ ታና ካሎ። ማቶ. 10:38፤ ሉቃ. 14:27 35 ፋ ሸምፖ አሾዳይስ ኮይዝ አꬃይ ꬋብስዛ። ዝን ታ ግሾኔ ዎንግለ ግሾስ ፋ ሸምፖ ꬋብስዛ አꬃይ አሽዛ። ማቶ. 10:39፤ ሉቃ. 17:33፤ ዋን. 12:25 36 አሲ ሳአል የዝ ሻሎ ኡባ ደንጊ ፋ ሸምፖ ꬋብስኮ ኤዛ አብ አዶዴ? 37 አሲ ፋ ሸምፖ ዎዞዳይስ አብ እንጎዳይስ ዳንዳኤ? 38 ጾስ አማኖዋ Ꮊ ኢታ የለትꬃይድ፥ አሲ ታላኔ ታ ቃላይድ ዬላትኮ፥ አስ ናአይ፥ ፋ አዳይ ቦንቻይር ጌሽ ኪታንችታይር ይእታር ኤ ባጋር ዬላቶዳ» ዬጌዛ።